Skip to main content

မေးခွန်း အကြောင်းအရာ 

u mg myintမြန်မာနိုင်ငံတွင် နယ်နိမိတ်ချင်းထိစပ်လျက်ရှိသည့် လာအို၊ ဘင်္ဂလားဒေ့ရှ်နှင့် တရုတ်တို့ဖြစ်ပါကြောင်း၊ အိန္ဒိယနိုင်ငံနှင့် မိုင် ၈၀ ခန့် ကျောက်တိုင်ကိုးတိုင် ကျန်ရှိနေပါကြောင်း၊ ထိုင်းနိုင်ငံမှ ၁၃၁၈ မိုင်ရှိသည့် အနက် မဲဆိုင်-မဲဟောက်ချောင်း ၃၆ မိုင်မှလွဲပြီး တိုင်းတာမှုမရှိသေးပါကြောင်း၊ နိမိတ်သတ်မှတ်မှုကို လွတ်လပ်ရေးရပြီး ချိန်မှစ၍ မြန်မာ့ဆိုရှယ်လစ်လမ်းစဉ်ပါတီ အစိုးရကာလအထိသာ ဆောင်ရွက်နိုင်ခဲ့ပြီး တပ်မတော်အစိုးရကာလတွင် အကြောင်းအမျိုးမျိုးကြောင့် ဆောင်ရွက်နိုင်ခဲ့ခြင်းမရှိပါကြောင်း၊ သမ္မတကြီး ဦးဆောင်သည့် အစိုးရကာလတွင် ထားဝယ်အထူးစီးပွားရေးဇုန်ကို ဆက်သွယ်နိုင်သည့် လမ်း ဖောက်လုပ်ရန် နယ်စပ်ဂိတ်ဖွင့်လှစ်နိုင်ရန်အတွက် မြန်မာနိုင်ငံဘက်မှ ထီးခီးနှင့် ထိုင်းနိုင်ငံဘက်က ဖူးနာမ်းရွန်း ဒေသတွင် နယ်နိမိတ်တိုင်းတာ သတ်မှတ်ရေးကို ကိုက် ၁၀၀၀ ခန့်မျှဆောင်ရွက် နိုင်ခဲ့ပါကြောင်း၊ ထို့ကြောင့် ထိုင်းနိုင်ငံ၊ အိန္ဒိယနိုင်ငံတို့နှင့် တိုင်းတာသတ်မှတ်ရန် ကျန်ရှိနယ်နိမိတ်များကို ပြီးစီးအောင် တိုင်းတာသတ်မှတ်ရေးသည် လက်ရှိအစိုးရအတွက်နှင့် နောင်လာမည့် မျိုးဆက်များအတွက် ကောင်းမွန်သည့် အနာဂတ်ကို ထားရှိနိုင်မည်ဖြစ်ပါကြောင်း၊ အိန္ဒိယနိုင်ငံနယ်နိမိတ်မှ ကျောက်တိုင်ကိုးတိုင် ညှိနှိုင်းသတ်မှတ်ရေးကိစ္စသည်လည်း အရေးကြီးပါကြောင်း၊ နောက်ပိုင်းတွင် O7 တောင်ကုန်းကိစ္စ၊ လွယ်ဒန်းဒေသကိစ္စ၊ သောင်ရင်းမြစ်ကြောင်း နယ်နိမိတ်ကိစ္စ၊ ပါချန်မြစ်ချောင်း နယ်နိမိတ်ကိစ္စ၊ ဘုရားသုံးဆူနယ်နိမိတ်ကိစ္စနှင့် ကျွန်းသုံးကျွန်းပိုင်ဆိုင်မှုများသည် နှစ်နိုင်ငံအကြားတွင် ကောင်းမွန်သည့် ဆက်ဆံရေးနှင့် နယ်စပ်ဒေသ တည်ငြိမ်အေးချမ်းချိန်မှာ ဆောင်ရွက်သင်‌့ပါကြောင်း၊

ဇွန်လ ၂ ရက်နေ့မှ မေးမြန်းခဲ့ပြီး State Counsellor ဖြစ်သည့် ဒေါ်အောင်ဆန်းစုကြည်သည် ဇွန်လ ၂၃ ရက်နေ့ ထိုင်းနိုင်ငံခရီးစဉ်တွင် နှစ်နိုင်ငံနယ်နိမိတ် သတ်မှတ်ရေးကိစ္စများကို ဆွေးနွေးခဲ့ပြီး Joint Boundary Committee ကို မကြာမီ မြန်မာနိုင်ငံတွင်ကျင်းပမည်ဟု သိရှိရ၍ ဝမ်းသာပါကြောင်း၊ မြန်မာ နိုင်ငံ၏ နယ်နိမိတ်ကို ကာကွယ်ရန်အတွက် အသက်၊ သွေး၊ ချွေးများကို မြောက်မြားစွာပေးဆပ်ခဲ့ ပါကြောင်း၊ ထီးခီးနှင့် ဖူးနာမ်းရွန်းဒေသတိုင်းတာ သတ်မှတ်နိုင်ရန်အတွက် လေးလမှနေခြောက်လကြား အချိန်ယူပြီး ဆောင်ရွက်ခဲ့ရပါကြောင်း၊ မိမိမေးမြန်းလိုသည်မှာ ပြည်ထောင်စု သမ္မတမြန်မာနိုင်ငံတော် အနေဖြင့် နယ်နိမိတ်တိုင်းတာ သတ်မှတ်ရေးကိစ္စများကို မပြီးပြတ်သေးသည့် နိုင်ငံများနှင့် သံတမန် လမ်းကြောင်းမှတစ်ဆင့် နှစ်ဖက်ညှိနှိုင်းပြီး တိုင်းတာသတ်မှတ်ရန်အတွက် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။


 

ဖြေကြားချက် 

u kyaw tinမြန်မာနိုင်ငံသည် တရုတ်နိုင်ငံနှင့် ၁၃၄၈ မိုင်၊ လာအိုနိုင်ငံနှင့် ၁၄၉ မိုင်၊ ဘင်္ဂလားဒေ့ရှ်နိုင်ငံနှင့် ၁၆၈ မိုင်၊ အိန္ဒိယနိုင်ငံနှင့် ၁၀၁၀ မိုင်၊ ထိုင်းနိုင်ငံနှင့် ၁၃၁၈ မိုင် နယ်နိမိတ်ချင်း ထိစပ်လျက်ရှိပါကြောင်း၊ လွတ်လပ်ရေးရရှိပြီးနောက် အဆိုပါ နယ်နိမိတ်များကို မြန်မာနိုင်ငံအစိုးရသည် ဗြိတိသျှတို့ထံမှ နိုင်ငံတကာအမွေဆက်ခံခြင်း ဥပဒေအရ လွှဲပြောင်းရယူခဲ့ရခြင်းဖြစ်ပါတယ်။

လွတ်လပ်ရေးရရှိပြီးနောက် မြန်မာအစိုးရအဆက်ဆက်သည် ဗြိတိသျှလက်ထက်တွင် သတ်မှတ်ခဲ့သည့် နယ်နိမိတ်များကို ပြန်လည်တိုင်းတာ သတ်မှတ်မှုများ ပြုလုပ်ခဲ့ကြရာ တရုတ်နိုင်ငံနှင့် နယ်နိမိတ်စာချုပ်ကို ၁၉၆၀ ခုနှစ်၊ အောက်တိုဘာလ ၁ ရက်နေ့တွင် ချုပ်ဆိုခဲ့ပြီး နယ်နိမိတ်အား စနစ်တကျတိုင်းတာ သတ်မှတ်ခဲ့ပြီး ဖြစ်ပါကြောင်း၊ မြန်မာ-လာအိုနယ်နိမိတ်တွင် မဲခေါင်မြစ်အား ပုံသေနယ်နိမိတ်အဖြစ် သတ်မှတ်သည့် မြန်မာ-လာအို နယ်နိမိတ်စာချုပ်ကိုလည်း ၁၁-၆-၁၉၉၄ ရက်နေ့တွင် ချုပ်ဆိုခဲ့ပြီး ဖြစ်ပါကြောင်း၊ ၅-၈-၂၀၁၆ ရက်နေ့တွင် လာအိုနိုင်ငံမှ မြန်မာနိုင်ငံကို လာရောက်ခဲ့သည့် လာအိုသမ္မတကြီး၏ ခရီးစဉ်အတွင်း ချစ်ကြည်ရေးတံတားနှင့် ပတ်သက်ပြီး စီမံခန့်ခွဲမှုဆိုင်ရာ သဘောတူ စာချုပ်တစ်ရပ်ကို ချုပ်ဆိုနိုင်ခဲ့ပါကြောင်း၊ ၎င်း သဘောတူစာချုပ်တွင် ချစ်ကြည်ရေး တံတားပေါ် မြန်မာ-လာအိုနယ်နိမိတ် စာချုပ်နှင့်အညီ ရေပုံပါအတိုင်း နယ်နိမိတ်ကြေးပြား တပ်ဆင်ရေး ကိစ္စကိုလည်း မိမိတို့ သဘောတူညှိနှိုင်းနိုင်ခဲ့ပါကြောင်း၊

မြန်မာ-ဘင်္ဂလားဒေ့ရှ် နယ်နိမိတ်ကို ၂၁-၁-၁၉၆၄ ရက်နေ့တွင် နတ်မြစ်အပိုင်းကို ပုံသေနယ်နိမိတ် သတ်မှတ်ခြင်း စာချုပ်နှင့် ၁၂-၁၁-၁၉၉၈ ရက်နေ့တွင် ကုန်းပိုင်းနယ်နိမိတ်သတ်မှတ်ခြင်း စာချုပ်များကို လက်မှတ်ရေးထိုးချုပ်ဆို သတ်မှတ်ခဲ့ပြီးဖြစ်ပါကြောင်း၊ အဆိုပါ ၁၉၉၈ ခုနှစ်တွင် ချုပ်ဆိုခဲ့သည့် ကုန်းနယ်နိမိတ် စာချုပ်ကိုနှစ်နိုင်ငံ အတည်ပြုစာချွန်လွှာများ လဲလှယ်ရန်သာကျန်ရှိပါကြောင်း၊ နှစ်ဖက် လွှတ်တော်များကလည်း သဘောတူညီထားပြီးဖြစ်သည့်အတွက် မကြာမီကာလအတွင်း လဲလှယ်နိုင်ရေး ကို ဆက်လက်ဆောင်ရွက် သွားနိုင်မည်ဖြစ်ပါကြောင်း၊

မြန်မာ-အိန္ဒိယနယ်နိမိတ်နှင့် ပတ်သက်၍ ၁၀-၃-၁၉၆၇ ရက်နေ့တွင် နယ်နိမိတ် တိုင်းတာရေး စာချုပ်ချုပ်ဆိုခဲ့ပြီးဖြစ်ပါကြောင်း၊ အိန္ဒိယနိုင်ငံနှင့် နယ်နိမိတ်သည် မိုင်ပေါင်း ၁၀၁၀ ထိစပ်နေသည့် အနက်မှ ကဘော်ချိုင့်ဝှမ်းဒေသ မြေပုံနှင့်မြေပြင်ကွဲလွဲမှုကြောင့် ၂၄ မိုင်အတွက်ကို မှတ်တိုင်ကိုးတိုင် စိုက်ထူရန်နှင့် မြောက်ဘက်စွန်းမှာရှိသည့် မြန်မာ-အိန္ဒိယ-တရုတ် သုံးနိုင်ငံ ဆုံမှတ်အထိ ၇၉ မိုင်ခန့်အထိ သတ်မှတ်ရန်ကျန်ရှိပါကြောင်း၊ မြန်မာ-အိန္ဒိယ-တရုတ် သုံးနိုင်ငံ ဆုံမှတ်သတ်မှတ်ရေးကိစ္စကို အိန္ဒိယနှင့် တရုတ်နိုင်ငံအကြား အငြင်းပွားနေဆဲဖြစ်သည့်အတွက် အဆိုပါနှစ်နိုင်ငံအကြား ပြေလည်မှုရရှိမှသာ ကျန်သည့် ၇၉ မိုင်ကိစ္စကို ဆက်လက်ဆောင်ရွက် သွားနိုင်မည်ဖြစ်ပါကြောင်း၊ ကဘော်ချိုင့်ဝှမ်း မှတ်တိုင်ကိုးတိုင် ကိစ္စဖြေရှင်းရန်နှင့် ပတ်သက်ပြီး အိန္ဒိယဘက်မှ အဆိုပြုချက်အသစ်တစ်ရပ်ကို ပေးအပ်မည်ဖြစ်ကြောင်း ၆-၁-၂၀၁၆ ရက်နေ့တွင် ပြုလုပ်ခဲ့သည့် နှစ်နိုင်ငံပူးတွဲနယ်နိမိတ် လုပ်ငန်းအဖွဲ့ အစည်းအဝေးတွင် ညှိနှိုင်းထားရှိပြီး ဖြစ်သည့်အတွက် အိန္ဒိယဘက်မှ အဆိုပြုချက်အသစ်ရရှိလျှင် နှစ်ဖက်ကွင်းဆင်း လေ့လာတိုင်းတာမှုများ ဆောင်ရွက်သွားမည်ဖြစ်ပါကြောင်း၊

၉-၈-၂၀၁၆ ရက်နေ့ အိန္ဒိယနိုင်ငံ၊ နယူးဒေလီမြို့တွင် ပြုလုပ်ခဲ့သည့် (၁၅) ကြိမ်မြောက် မြန်မာ-အိန္ဒိယ နိုင်ငံခြားရေးဝန်ကြီးဌာနများအကြား ဒုတိယဝန်ကြီးအဆင့် မူဝါဒရေးရာညှိနှိုင်းဆွေးနွေးပွဲတွင် အိန္ဒိယနိုင်ငံ ညွှန်ကြားရေးမှူးချုပ် (Joint Secretary) Mrs. Sripriya ဦးဆောင်သည့်အဖွဲ့သည် သြဂုတ် လ ၂၂ ရက်နေ့တွင် မြန်မာနိုင်ငံကိုလာရောက်ပြီး အဆိုပါကဘော်ချိုင့်ဝှမ်းကိစ္စနှင့် ပတ်သက်ပြီး ညွှန်ချုပ်အဆင့် အစည်းအဝေး ပြုလုပ်သွားမည်ဖြစ်ကြောင်းကို လွှတ်တော်ကိုယ်စားလှယ်များ သိရှိနိုင်ရန်အတွက် တင်ပြအပ်ပါသည်။

မြန်မာ၊ ထိုင်းနိုင်ငံနယ်နိမိတ်နှင့်ပတ်သက်၍ ၁၈-၆-၁၉၉၁ ရက်နေ့တွင် အရှည် ၃၆ မိုင်ရှိသည့် မဲဆိုင်မဲဟောက်ချောင်းကို စနစ်တကျပြန်လည် သတ်မှတ်နိုင်ခဲ့ပါကြောင်း၊ ကျန်နေသည့် နယ်နိမိတ် အစိတ်အပိုင်းများကို စနစ်တကျပြန်လည်သတ်မှတ်နိုင်ရန်အတွက် ၁၉၉၃ ခုနှစ်တွင် ပူးတွဲနယ်နိမိတ် ကော်မတီကို ဖွဲ့စည်းခဲ့ပြီး ၂၀၁၃ ခုနှစ် စက်တင်ဘာလအထိ (၈) ကြိမ်မြောက် အစည်းအဝေးကို ကျင်းပခဲ့ပါကြောင်း၊ ၎င်း အစည်းအဝေးတွင် နယ်နိမိတ်အား အပိုင်းလိုက် တိုင်းတာ သတ်မှတ်သွားရန် တောင်ဘက်စွန်တွင်ရှိသည့် ပတ်ချန်မြစ်နှင့် ယင်း၏ မြောက်ဘက်ကုန်းပိုင်း စုစုပေါင်း မိုင် ၂၀၀ ခန့်ကို တိုင်းတာသတ်မှတ်ရေးအတွက် ကောင်းကင်ဓာတ်ပုံ ရိုက်ကူးရေး၊ မြေပုံထုတ်လုပ်ရေးနှင့် နယ်နိမိတ်တိုင်းတာရေး သဘောတူညီချက် (MOU) ရေးဆွဲချုပ်ဆို နိုင်ရေးတို့ကို ဆောင်ရွက်သွားရန် အတွက် နှစ်ဖက်ညှိနှိုင်းသဘောတူခဲ့ကြပါကြောင်း၊ ယခုအခါ အဆိုပါ နှစ်ဖက်ညှိနှိုင်းထားပြီးဖြစ်သည့် နယ်နိမိတ်တိုင်းတာရေးကိစ္စကို ယခုနှစ် ပွင့်လင်းရာသီတွင် လက်တွေ့ အကောင်အထည်ဖော် ဆောင်ရွက်နိုင်ရန်အတွက် မြန်မာ-ထိုင်းပူးတွဲ နယ်နိမိတ်ကော်မတီ (၉) ကြိမ်မြောက် အစည်းအဝေးကို မြန်မာနိုင်ငံတွင် လက်ခံကျင်းပဆောင်ရွက် သွားရန် အတွက် သံတမန်လမ်းကြောင်းမှ ညှိနှိုင်း ဆောင်ရွက်ထားပြီးဖြစ်ပါကြောင်း၊

လက်ရှိအစိုးရ တာဝန်ယူပြီးနောက် နိုင်ငံတော်အတိုင်ပင်ခံပုဂ္ဂိုလ်နှင့် နိုင်ငံခြားဝန်ကြီး ဒေါ်အောင်ဆန်းစုကြည် သည် ထိုင်းနိုင်ငံကို တရားဝင်ခရီးသွား ရောက်ခဲ့ပါကြောင်း၊ ထို တရားဝင်ခရီး သွားရောက်စဉ်အတွင်း ယခင်က အကြောင်းအမျိုးမျိုးကြောင့် တိုင်းတာနိုင်ခြင်းမရှိခဲ့သည့် နယ်နိမိတ် များကို စတင်တိုင်းတာသတ်မှတ်ရေးအတွက် နှစ်နိုင်ငံခေါင်းဆောင်များအကြား သဘောတူညီခဲ့ကြပါ ကြောင်း၊ စက်တင်ဘာလ ၁၆၊ ၁၇ ရက်ခန့်တွင် ထိုင်းနိုင်ငံမှ ညွှန်ကြားရေးမှူးချုပ်အဆင့် ဦးဆောင်သည့် ကိုယ်စားလှယ်အဖွဲ့သည် မြန်မာနိုင်ငံကိုလာရောက်ပြီး နယ်နိမိတ်တိုင်းတာရေး ကိစ္စများ ပြန်လည်စတင်ရန် အတွက် ကြိုတင်ပြင်ဆင်ညှိနှိုင်းမှုများ ပြုလုပ်သွားရန် စီစဉ်ထားပြီးဖြစ်ပါကြောင်း၊ ယခုအခါ မြန်မာ-ထိုင်း နယ်စပ်ဒေသတွင် ငြိမ်းချမ်းရေးအခြေအနေ တိုးတက်ကောင်းမွန်နေပြီဖြစ်သည့်အတွက် ယခင်က နယ်မြေလုံခြုံရေးကြောင့် မတိုင်းတာနိုင်ခဲ့သည့် နယ်နိမိတ်များကို ပြန်လည်စတင် တိုင်းတာရေးအတွက် ထိုင်းနိုင်ငံအစိုးရနှင့် ယခုနှစ်အတွင်း အမြန်ဆုံးစတင်ဆောင်ရွက် သွားမည်ဖြစ်ပါကြောင်း၊ ပြည်ထောင်စုသမ္မတ မြန်မာနိုင်ငံတော်အနေဖြင့် နယ်နိမိတ်တိုင်းတာမှု မပြီးပြတ်သေးသည့် အိန္ဒိယနိုင်ငံ၊ ထိုင်းနိုင်ငံတို့နှင့် နယ်နိမိတ်တိုင်းတာရေး အတွက် သံတမန်လမ်းကြောင်းမှတစ်ဆင့် စီစဉ်ဆောင်ရွက်လျက် ရှိပါကြောင်း ရှင်းလင်းဖြေကြားပါသည်။


 

ဒုတိယဝန်ကြီး ဦးကျော်တင်