Skip to main content

ဦးမြင့်လွင်( ပုဇွန်တောင်မဲဆန္ဒနယ်)မြန်မာနိုင်ငံသားများသည် ယခုအချိန်တွင် နိုင်ငံခြားကို သွားရောက်အလုပ်လုပ်ကိုင်နေကြသူများသည် လူသုံးသန်းကျော်၊ လေးသန်းခန့် ရှိပါကြောင်း၊ လူသဘာဝအရ ရောက်သွားလုပ်ကိုင်သည့် အရပ်ဒေသများ တွင် လက်ထပ်ထိန်းမြားသည့် ကိစ္စများ ရှိလာပါကြောင်း၊ လက်ထပ်ထိန်းမြားရန်အတွက် သက်ဆိုင်ရာတရားရုံးများ၊ နိုင်ငံခြား သက်ဆိုင်ရာတရားရုံးများရှိ လက်ထပ်မှတ်ပုံတင်ရုံးများတွင် သွား၍ လက်ထပ်ကြရပါကြောင်း၊ထိုအခါ တရားရုံးများမှ လက်ထပ်မည့် မည်သည့်နိုင်ငံသားကိုမဆို အိမ်ထောင်မရှိ အပျို၊ လူပျိုဖြစ်ကြောင်း ကျမ်းကျိန်လွှာတစ်စောင် လိုအပ်ပါကြောင်း၊ ထိုကျမ်းကျိန်းလွှာကို လက်ထပ်ချင်သည့် အပျို၊ လူပျိုများသည် မြန်မာပြည်ကိုပြန်လာပြီး တရားရုံး သို့မဟုတ် နိုတြီပဗ္ဗလစ် ရှေ့၌ ကျမ်းကျိန်ရပါကြောင်း၊ တရားသူကြီးကလည်း လာရောက်ကျမ်းကျိန်သူများသည် မှတ်ပုံတင်နှင့် တိုက်ဆိုင်ပြီး မှန်ကန်ကြောင်း တံဆိပ်တုံးထုပေးလိုက်ပါကြောင်း၊ ထိုအခါ နိုင်ငံခြားရေးဝန်ကြီးဌာနက အန်ဒါဒီကေးရှင်းခေါ် မြန်မာနိုင်ငံက တံဆိပ်တုံးဖြစ်ကြောင်းကို အတည်ပြုပေးရပါကြောင်း၊ ယခုအခါ့ နိုင်ငံခြားရေးဝန်ကြီးဌာနက ၎င်းကို ငြင်းပါသဖြင့် မြန်မာအမျိုးသမီးများသည် နိုင်ငံခြားတွင် အကြောင်းတိုက်ဆိုင်၍ လက်ထပ်ကြမည်ဆိုပါက ထိုစာရွက် မရသဖြင့် တရားဝင်လက်ထပ်၍ မရသကဲ့သို့ တရားဝင်အမွေဆက်ခံခွင့်၊ မွေးလာသည့်ကလေးများက ဥပဒေအရ အခွင့်အရေးမရှိပါကြောင်း။

၂၀၀၈ ခုနှစ်၊ ဖွဲ့စည်းပုံအခြေခံဥပဒေတွင် နိုင်ငံသားများ၏ အခွင့်အရေးနှင့်၊ တာဝန်နှင့် လုပ်ပိုင်ခွင့် အခန်း၌ ပုဒ် ၃၅၃ တွင် မည်သူကိုမျှ တည်ဆဲဥပဒေနှင့်အညီမှတစ်ပါး အသက်ကို ဖြစ်စေ၊ ပုဂ္ဂိုလ်ဆိုင်ရာ လွတ်လပ်မှုကိုဖြစ်စေ နစ်နာဆုံးရှုံးမှုမရှိစေရ၊ အပြည်ပြည်ဆိုင်ရာ လူ့အခွင့်အရေးကြေညာစာတမ်း၏ အပိုဒ် ၁၆ တွင် အရွယ်ရောက်ပြီးသား ယောက်ျား၊ မိန်းမတိုင်း မိမိ ဆန္ဒဖြင့် လက်ထပ်ခွင့်၊ အိမ်ရာထူထောင်ခွင့်ရှိသည်ဟု ပါရှိပါကြောင်း၊ ပဋိညာဉ်ဥပဒေ ပုဒ်မ ၂၆ တွင်လည်း လက်ထပ်ရန် ငြင်းသည့်၊ ဆန်ကျင်သည်ကို ပဋိညာဉ်သ်ည Vice Agreement ပျက်ပြယ်သည့် စာချုပ်ဖြစ်ပါကြောင်း၊ ယခုအခါတွင် နိုင်ငံခြားရေးဝန်ကြီးဌာနက မထုတ်ပေးသည့်အတွက် မြန်မာနိုင်ငံသားများက အလွန် နစ်နာပါကြောင်း၊ ထို့ကြောင့် နိုင်ငံခြားရေးဝန်ကြီးဌာနမှ အပျို၊ လူပျိုဖြစ်ကြောင်း ကျမ်းကျိန်လွှာပေါ်တွင် အန်တက် ဒီကေးရှင်း ထောက်ခံ ချက်ပေးခြင်းအပေါ်ကို ငြင်းဆန်နေခြင်းကို ဖျက်သိမ်းပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။


 

နိုင်ငံခြားရေးပြည်ပသို့သွားရောက်မည့် မြန်မာနိုင်ငံသားများ ပြည်ပမှအသုံးပြုရန်အတွက် စာမေးပွဲအောင်လက်မှတ်၊ ဘွဲ့လက်မှတ်၊ အမှတ်စာရင်း၊ မှတ်ပုံတင်၊ အိမ်ထောင်စုစာရင်း၊ လက်ထပ်စာချုပ်၊ မွေးစာရင်း စသည့် စာရွက်စာတမ်းများကို အစိုးရဌာနဆိုင်ရာ အစိုးရအဖွဲ့အစည်းများက ထုတ်ပေးထားသော တရားဝင် စာရွက်စာတမ်းမှန်သမျှကို ပြည်ထောင်စုတရားရုံးမှ အသိအမှတ်ပြုထားသည့် နိုတြီပဗ္ဗလစ်ရှေ့နေက ဘာသာပြန်ဆိုပြီး ထောက်ခံပေးထားသည့် စာရွက်စာတမ်းများအပေါ်တွင် နိုင်ငံခြားရေးဝန်ကြီးဌာန၊ ကောင်စစ်ရေးရာနှင့် ဥပဒေရေးရာဦးစီးဌာနက အဆိုပါ နိုတြီပဗ္ဗလစ်ရှေ့နေ၏ တံဆိပ်နှင့် လက်မှတ် မှန်ကန်ကြောင်း ထပ်ဆင့်ထောက်ခံမှုများ ပြုလုပ်ပေးလျက်ရှိပါကြောင်း၊ ကျမ်းကျိန်လွှာများကို နိုတြီ ထပ်ဆင့်ထောက်ခံချက်ပေးရာတွင် သက်ဆိုင်ရာမြို့နယ် သို့မဟုတ် ခရိုင် သို့မဟုတ် တိုင်းတရားရုံးများမှ ပြုလုပ်ပေးသည့် တရားဝင်စာရွက်စာတမ်းများကိုလည်း ဆောင်ရွက်ပေးလျက်ရှိပါကြောင်း၊ အပျို၊ လူပျိုဖြစ်ကြောင်း ကျမ်းကျိန်လွှာများကိုလည်း ယခင်က ထုတ်ပေးခဲ့ဖူးသည့် အစဉ်အလာ ရှိပါကြောင်း၊

ယခုနောက်ပိုင်း ထုတ်မပေးရခြင်းမှာ အပျို၊ လူပျိုဖြစ်ကြောင်း ကျမ်းကျိန်လွှာပြုလုပ်သူ အထူးသဖြင့် အပျိုဖြစ်ကြောင်း ကျမ်းကျိန်လွှာပြုလုပ်သူအများစုသည် ပြည်ပနိုင်ငံများ၌ နိုင်ငံခြားသားများနှင့် လက်ထပ်ထိမ်းမြားရန်အတွက် ရည်ရွယ်ချက်နှင့် ပြုလုပ်ကြသူများဖြစ်ပါကြောင်း၊ အဓိကအားဖြင့် အပျို ဖြစ်ကြောင်း နိုတြီထောက်ခံချက်တောင်းခံမှုများသည် အများအားဖြင့် အိမ်နီးချင်းနိုင်ငံများဖြစ်သည့် တရုတ်၊ ထိုင်း၊ မလေးရှားနိုင်ငံတို့က နိုင်ငံခြားသားများနှင့် လက်ထပ်ပြီး ခေါ်ဆောင်သွားရန် ရည်ရွယ်ချက်ဖြင့် ဆောင်ရွက်ကြခြင်းဖြစ်သည်ကို တွေ့ရှိရပါကြောင်း၊ ယင်းကိစ္စနှင့်ပတ်သက်၍ ၁-၇-၁၉၉၈ ရက်နေ့တွင် ပြည်ထောင်စုမြန်မာနိုင်ငံ‌တော် တရားရုံးချုပ်က နိုင်ငံခြားသားများနှင့် အမျိုးသမီးများ လက်ထပ်ထိမ်းမြားခြင်း ကိစ္စနှင့်ပတ်သက်ပြီး လမ်းညွှန်ချက်တစ်ခု ထုတ်ပြန်ခဲ့ပါကြောင်း၊ အချို့သော နိုင်ငံခြားသားများသည် မြန်မာနိုင်ငံတွင်ရှိသော လူပွဲစားများနှင့် ဆက်သွယ်ပြီး မြန်မာအမျိုးသမီးများကို နည်းအမျိုးမျိုးဖြင့် ဖျားယောင်းသွေးဆောင်ကာ တရားရုံးမှာ လင်မယားအဖြစ် လက်ထပ်ကြောင်း ကျမ်းကျိန်လွှာပြုလုပ်ပြီး နိုင်ငံခြားကို ခေါ်ဆောင်သွားကြပါကြောင်း၊ ထိုသို့ ခေါ်ဆောင်သွားပြီး ပြည်ပသို့ ခေါ်ဆောင်သွားခံရသူများသည်  ပြည်ပသို့ မရောက်မီ၌ပင် မလိုလားအပ်သော ပြဿနာ များနှင့် တွေ့ကြုံရပြီး ပြည်ပရောက်ရှိ သွားသည့်အခါတွင်လည်း မြန်မာအမျိုးသမီးများသည် ဒုက္ခအမျိုးမျိုးနှင့် ရင်ဆိုင်တွေ့ကြုံနေရကြောင်း ယင်းညွှန်ကြားချက် တွင် ဖော်ပြထားပါကြောင်း၊

ထို့ကြောင့် မြန်မာအမျိုးသမီးများအား ငွေကြေးဖြင့် ဖျားယောင်းသွေးဆောင်၍ အမျိုးသားဂုဏ်သိက္ခာကို စောင့်ထိန်းခြင်းမရှိဘဲ နိုင်ငံခြားသားဖြင့် လက်ထပ်စေကာ ပြည်ပသို့ခေါ်ဆောင်သွားသော အစီအစဉ် များ ပြုလုပ် လျက်ရှိကြသဖြင့် မြန်မာအမျိုးသမီးများ ဒုက္ခရောက်ကာ ဘဝဆုံးရှုံးကြမည့်အန္တရာယ်ကို အမျိုးသားတာဝန်တစ်ရပ်အနေဖြင့် ကာကွယ်ကြရမည်ဖြစ်ပါကြောင်း၊ သို့ဖြစ်ပါ၍ မြန်မာနိုင်ငံသား အမျိုးသမီး တစ်ဦးအား နိုင်ငံခြားသားတစ်ဦးနှင့် ထိမ်းမြားလက်ထပ်ကြောင်း ကျမ်းကျိန်လွှာပြုလုပ်ပေးရန် တင်ပြလာပါက မည်သည့်တရားရုံးကမှ ဆောင်ရွက်ပေးခြင်းမပြုရန် ညွှန်ကြားထားပါကြောင်း။

ထို့ကြောင့် ညွှန်ကြားချက်အရ မိမိတို့အနေဖြင့် နိုင်ငံခြားရေးဝန်ကြီးဌာနက အထက်အဖွဲ့အစည်းများ၏ လမ်းညွှန်ချက်အတိုင်း ဆောင်ရွက်နေရခြင်းဖြစ်ပါကြောင်း၊ အထူးသဖြင့် မြန်မာအမျိုးသမီးများသည် နိုင်ငံခြားသားများနှင့် လက်ထပ်ပြီး ပြည်ပသို့ လိုက်ပါသွားရောက်ပြီးသည့်နောက် အကြောင်း အမျိုးမျိုးကြောင့် ဖြစ်ပေါ်လာနိုင်သည့်အန္တရာယ်မှ တားဆီးကာကွယ်သည့်အနေဖြင့် ထိုသို့သော ကျမ်းကျိန်လွှာများ လုပ်ဆောင်လာ ပါက ဆောင်ရွက်ပေးခြင်း မပြုရန်အတွက် ပြည်ထောင်စုတရားရုံးချုပ်၏ ညွှန်ကြားချက်အမှတ် (၂/၉၈) အရ မိမိတို့အနေဖြင့် လိုက်နာဆောင်ရွက်နေခြင်းဖြစ်ပါကြောင်း၊ ထို့ကြောင့် နိုင်ငံခြားရေးဝန်ကြီးဌာနအနေဖြင့် အပျို၊ လူပျိုဖြစ်ကြောင်း ထောက်ခံပေးခြင်း မပြုသော်လည်း ပြည်ပရောက် နိုင်ငံများရှိ မြန်မာနိုင်ငံသူ နိုင်ငံသားများ လက်ထပ်သည့်အခါ အခက်အခဲ မဖြစ်စေရန်အတွက် မိဘအုပ်ထိန်းသူ၏ လက်အောက် တွင် ကောင်းမွန် စွာ နေထိုင်လျက်ရှိပါကြောင်း ကျမ်းကျိန်လွှာမျိုး ကို ထောက်ခံပေးခြင်းအားဖြင့် ဖြေလျော့ပြီး ကူညီဆောင်ရွက်ပေးလျက်ရှိပါကြောင်း။

ထို့အပြင် ပြည်ပနိုင်ငံများတွင် အလုပ်လုပ်ကိုင်ရန် သွားရောက်ကြမည့် လုပ်ငန်းသဘောအရ လည်းကောင်း၊ ပညာသင်သွားရောက်မည့် ကျောင်းသားများ၏ သတ်မှတ်ချက်များအရ သော်လည်းကောင်း အပျို၊ လူပျိုဖြစ်မှသာလက်ခံမည့် အခြေအနေများနှင့် ပတ်သက်ပြီး ဥပမာ - လေယာဉ်မယ်၊ လေယာဉ်မောင်၊ သူနာပြု စသည့် လုပ်ငန်းအမျိုးအစားများအတွက် သက်ဆိုင်ရာလုပ်ငန်း သို့မဟုတ် ကျောင်းများမှ ကမ်းလှမ်းမှုရှိလာပါက ပုဂ္ဂိုလ်ရေးအရ နစ်နာဆုံးရှုံးမှု မရှိစေရန်အတွက် ရည်ရွယ်ချက်ဖြင့် ချွင်းချက် အနေဖြင့် အပျို၊ လူပျိုဖြစ်ကြောင်း ထပ်ဆင့်ထောက်ခံချက်များကို စိစစ်ပြီး ဆောင်ရွက်ပေးလျက်ရှိပါကြောင်း။

ထိုသို့ ဆောင်ရွက်ခြင်းအားဖြင့် လူကုန်ကူးမှုတားဆီးရေး၊ မြန်မာအမျိုးသမီးများအား ဖျားယောင်းသွေးဆောင် ကာကွယ်တားဆီးရေးကို အထောက်အကူဖြစ်စေနိုင်သော်လည်း တဖက်တွင် အပျို၊ လူပျိုဖြစ်ကြောင်း ထောက်ခံစာ မရရှိသည့်အတွက် လက်ထပ်ခွင့်ဆုံးရှုံးသည့်သူများကို ကာကွယ်ပေး ရန်လည်း လိုအပ်နေသည်ကို သိရှိရပါကြောင်း၊ ထို့ကြောင့် တားမြစ်ထားသည့် တရားရုံးချုပ်၏ ညွှန်ကြားချက်ကို ယနေ့ အစိုးရ သစ်လက်ထက်၌ ဖွဲ့စည်းပုံပါ အခြေခံဥပဒေနှင့်အညီ ကိုက်ညီမှုရှိ/မရှိ ပြန်လည်စိစစ်ပြင်ဆင်ရေးအတွက် မိမိတို့အနေဖြင့် ညှိနှိုင်းဆောင်ရွက်သွားမည်ဖြစ်ပါကြောင်း၊ နိုင်ငံခြား‌ရေးဝန်ကြီးဌာနသည် နိုင်ငံတော်၏ အထက် အာဏာပိုင် အဖွဲ့အစည်းများ ချမှတ်ပေးထားသည့် လမ်းညွှန်ချက်များ၊ ဥပဒေများ၊ ညွှန်ကြားချက်များနှင့်အညီ အကောင်အထည်ဖော်ပေးရသည့် ဌာနတစ်ခုသာဖြစ်ပါကြောင်း၊ ထို့ကြောင့် သက်ဆိုင်ရာ အာဏာပိုင်အဖွဲ့အစည်းများက ထုတ်ပြန် ထားသော ညွှန်ကြားချက်များကို ခေတ်နှင့်အညီ ပြန်လည် သုံးသပ်ပြင်ဆင်မည်ဆိုပါက နိုင်ငံခြားရေးဝန်ကြီးဌာနအနေဖြင့် ယင်းကိစ္စကို ပြင်ဆင်ပြီး အကောင်အထည်ဖော်ဆောင်ရွက်သွားရန် အသင့်ရှိပါကြောင်း ရှင်းလင်းဖြေကြား ပါသည်။

ဦးမြင့်လွင် (ပုဇွန်တောင်) က ဆက်စပ်မေးခွန်း မေးမြန်းပါသည်။

တရားရုံးချုပ်က ညွှန်ကြားချက်ဆိုသည်မှာ အပြည်ပြည်ဆိုင်ရာ လူ့အခွင့်အရေးကြေညာစာတမ်း၊ ဖွဲ့စည်းပုံအခြေခံဥပဒေ၊ ပြဋ္ဌာန်းထားသည့်ဥပဒေကို ကျော်၍ ပြုလုပ်ထားခြင်းရှိ/မရှိ၊ တရားရုံးချုပ်က ညွှန်ကြားချက်ရှိသည်နှင့် မပေးရဘူး ဆိုသည်မှာ တရားရုံးချုပ်ကိုယ်တိုင်က ဥပဒေကို ချိုးဖောက်နေခြင်းဖြစ်ပါကြောင်း၊ ယင်းကိစ္စကို ဖြေလျော့ပေးမည်ဟု သိရပါသဖြင့် မည်သည့်အချိန်တွင် ပြတ်ပြတ်သားသား ဆုံးဖြတ်ပေးမည်ကို သိရှိလိုကြောင်း မေးမြန်းပါသည်။

နိုင်ငံခြားရေးဝန်ကြီးဌာန၊ ဒုတိယဝန်ကြီး ဦးကျော်တင်

မိမိတို့ နိုင်ငံခြားရေးဝန်ကြီးဌာနသည် သက်ဆိုင်ရာအာဏာပိုင်အဖွဲ့အစည်းများ၏ လမ်းညွှန်ချက်ကို အကောင်အထည်ဖော်သည့် ဌာနသာဖြစ်ပါကြောင်း၊ သို့ဖြစ်ပါ၍ လမ်းညွှန်ထားချက်များသည် ခေတ်၊ စနစ်၊ ဖွဲ့စည်းပုံအခြေခံဥပဒေနှင့် ကိုက်ညီမှုရှိ/မရှိနှင့် ပတ်သက်၍ မိမိတို့အနေဖြင့် အထက် အဖွဲ့အစည်းများကို အမြန်ဆုံးတင်ပြပြီး ပြန်လည်သုံးသပ်ရန် တင်ပြသွားမည်ဖြစ်ပါကြောင်း၊ သက်ဆိုင်ရာ တရားရုံးကနေပြီး ၎င်းညွှန်ကြားချက်ကို ပြင်ဆင်ပေးသည်နှင့် မိမိတို့အနေဖြင့် ချက်ချင်း အကောင်အထည်ဖော် ဆောင်ရွက်သွားမည်ဖြစ်ပါကြောင်း ရှင်းလင်းဖြေကြားပါသည်။

နိုင်ငံခြားရေးဝန်ကြီးဌာန၊ ဒုတိယဝန်ကြီး ဦးကျော်တင်