Skip to main content

 

အထက်မြန်မာပြည် ဗဟိုဝန်ထမ်းတက္ကသိုလ် (ဇီးပင်ကြီး) ပါမောက္ခချုပ်၏ သတင်းစာရှင်းလင်းပွဲတွင် ၎င်းတို့တက္ကသိုလ်ကို တက်ရောက်နေကြသည့် သင်တန်းသားထဲတွင် ဆရာဝန်သစ်လွင်များသည် စည်းကမ်းလိုက်နာမှု အားနည်းကြပြီး သင်တန်းပို့ချက်များကိုလည်း စိတ်ဝင်စားမှု မရှိကြပါကြောင်း၊ ၎င်းတို့သင်တန်း တက်ရန်အတွက် နိုင်ငံတော်မှ ဘတ်ဂျက်များစွာ ကုန်ကျခံရကြောင်း၊ ပြောကြားချက်အပေါ် ပိုမိုကောင်းမွန်စွာ ဆောင်ရွက်နိုင်မည်ဟု ယုံကြည်သဖြင့် အဆိုပါမေးခွန်းကို မေးရခြင်းဖြစ်ပါသည်။

ဝန်ထမ်းဆရာဝန် သစ်လွင်အများစုသည် ဆေးရုံကြီးများတွင် လက်ထောက် ဆရာဝန်များအဖြစ် လုပ်ငန်းကျွမ်းကျင်အောင် နှစ်နှစ်ခန့် တာဝန်ထမ်းဆောင်ရကြောင်း သိရပါသည်။ ယခုလိုကာလတွင် ဗဟိုဝန်ထမ်းတက္ကသိုလ်က သင်ကြားချက်များသည် အသုံးမဝင်ဘူးဟု ယူဆကြသဖြင့် ပါမောက္ခချုပ် သတင်းစာရှင်းလင်းပွဲတွင် ပြောသလိုမျိုး ဖြစ်ကြခြင်းဟု မြင်ပါကြောင်း၊ ဝန်ထမ်းဆရာဝန် အများစု၏ ရည်မှန်းချက်ကလည်း ဆေးကုသရန်နှင့် အထူးကုဖြစ်ရန် ဖြစ်နေသည့်အတွက် သင်တန်း၏ သင်ကြားပို့ချ ချက်များကို ပြန်လည်အသုံးချရန် များများစားစား မရှိသည်ကို မြင်ကြပါကြောင်း၊

ကျန်းမာရေးနှင့် အားကစားဝန်ကြီးဌာနအနေဖြင့် ဆရာဝန် ၂၀၀၀ ဦးကျော် လိုအပ်ပြီး အလုပ်ခေါ် သော်လည်း ၁၀၀၀ ခန့်သာ လျှောက်ကြသည်ကို တွေ့ရှိရပါကြောင်း၊ ဝန်ထမ်းရွေးချယ် လေ့ကျင့်ရေးက ၄၆ ဦး ပေးမအောင်သော်လည်း ပြန်လည်ညှိနှိုင်းပြီး အားလုံးလက်ခံသည်ကို ကြားသိရပါကြောင်း၊ လက်ရှိ ၁၀၀၀ ဦးကျော် လိုအပ်ချက် ရှိနေခြင်းလည်း တွေ့ရှိရပါကြောင်း၊ ထိရောက်သည့် ကျန်းမာရေးစောင့်ရှောက်မှု ပေးနိုင်ရေးအတွက် နှစ်စဉ် ၅၀၀ ဦး မှ ၁၀၀၀ ဦး ဝန်းကျင် ဆရာဝန်များကို အလုပ်ခန့်ရန် လိုအပ်သည်ဟု သိရပါကြောင်း၊ ဗဟိုဝန်ထမ်းတက္ကသိုလ်က သင်တန်းပေးနိုင်မည့် အချိန်ကိုစောင့်ပြီး အလုပ်ခေါ်မည်ဆိုလျှင် ဆရာဝန်လိုအပ်သည့် ဒေသများအတွက် များစွာနစ်နာနေခြင်း ဖြစ်ပါကြောင်း၊ စဉ်ဆက်မပြတ် အလုပ်လုပ်နေရင်း ပညာသင် ချင်သည့် ဆရာဝန်သစ်လွင်များ အတွက်လည်း များစွာနစ်နာသည်ကို ထည့်သွင်းစဉ်းစားရန် လိုအပ်မည်ဟု ထင်မြင်မိသည့်အပြင် ဝန်ထမ်းလစာခံစားခွင့်မရခင် သင်တန်းတက်ရသည့်အတွက် စရိတ်စက အလွန်များပြီး မိသားစုအတွက် ဝန်ထုပ်ဝန်ပိုးလည်း ဖြစ်စေပါကြောင်း၊

ဝန်ထမ်းဖြစ်ပြီးမှ ဝန်ထမ်းတက္ကသိုလ် တက်စေလိုပါကြောင်း၊ အုပ်ချုပ်ရေးနှင့် စီမံခန့်ခွဲရေး တာဝန်ယူမည့် ဆရာဝန်များအတွက် ဗဟိုဝန်ထမ်းတက္ကသိုလ်၏ သင်ကြားပို့ချချက်များသည် များစွာအသုံးဝင်သည်ဟုလည်း သိရသည့်အတွက်ကြောင့် မြို့နယ်ကျန်းမာရေး ဦးစီးမှူးဖြစ်ခါနီး ဆရာဝန်များနှင့် တခြားစီမံခန့်ခွဲမှု တာဝန်ယူရမည့် ဝန်ထမ်းဖြစ်ပြီးသူ ဆရာဝန်များကိုသာ စိစစ်ရွေးချယ်ပြီး သင်တန်းတက်စေခြင်းဖြင့် နိုင်ငံတော်၏ ဘတ်ဂျက်ကုန်ကျမှု သက်သာမည်ဖြစ်ပြီး ဆရာဝန်များဘက်မှ စရိတ်စကသက်သာမည်လည်း ဖြစ်ပါကြောင်း၊ ဆရာဝန်လိုအပ်ချက်များကို အချိန်နှင်‌့တစ်ပြေးညီ ခန့်အပ်ဖြည့်ဆည်းနိုင်မဖြစ်ဖြစ်ပြီး လူနာများအတွက်လည်း ယခုထက်ပိုပြီး ထိရောက်ပြည့်စုံသည့် ကုသခံယူခွင့်ရမည်ဟု မြင်မိပါကြောင်း၊ သင်တန်းတက်ရမည့် သူများကလည်း သင်တန်းဆင်းသည်နှင့် လက်တွေ့အသုံးချကြမည် ဖြစ်သည့်အတွက် စည်းကမ်းလိုက်နာမှု၊ သင်ကြားပို့ချချက်များကို စိတ်ဝင်စားမှုရှိလာမည်ဟုလည်း ယုံကြည်ခြင်းကြောင့် အထက်ပါမေးခွန်းကို မေးမြန်းရခြင်းဖြစ်ပါသည်။


ကျန်းမာရေးနှင့် အားကစားဝန်ကြီးဌာန၊ ပြည်ထောင်စုဝန်ကြီး ဒေါက်တာမြင့်ထွေး

ပထမဆုံးတစ်ချက်အနေဖြင့် လွှတ်တော်ကိုယ်စားလှယ်ကြီး ပြောသည့် ဆရာဝန်များစိတ်ဝင်စားမှု မရှိခြင်းသည် အမှန်တကယ်တမ်းကျ စိတ်ဝင်စားမည်ဆိုတာက သင်ကြားပုံနည်းစနစ်နှင့် ဆိုင်ပါကြောင်း၊ မိမိတို့လည်း အတန်းများ အများကြီးတက်လာခဲ့ရပါကြောင်း၊ သင်ကြားပုံနည်းစနစ်က စိတ်ဝင်စားအောင် Two Ways သင်ရမည်၊ ဆရာတစ်ယောက်ကလာပြီး တတွတ်တွတ်ဖြင့် ပြောပြီးပြီးသွားလျှင်လည်း မရပါကြောင်း၊ အနည်းဆုံးမပြီးခင် ၁၀ မိနစ်ခန့်ဖြတ်ပြီး နောက်ဆုံး ၁၀ မိနစ်တွင် မေးခွန်းအမေးအဖြေ လုပ်ရပါကြောင်း၊ မိမိတို့မှာ ညွှန်ကြားချက်ထုတ်ထားပါကြောင်း၊ ပြည်သူ့ကျန်းမာရေး တက္ကသိုလ်ရော အကုန်လုံးပါ။ ၄၅ မိနစ်ပေးလျှင် အနည်းဆုံး ၃၈ မိနစ် တွင်ရပ် ခုနစ်မိနစ် သို့မဟုတ် ၁၀ မိနစ်ခန့်ကို အမေးအဖြေလုပ်ပြီး မိမိတို့က လုပ်ထားပါကြောင်း၊  သို့မှသာလျှင် ကျောင်းသားများက စိတ်ဝင်စားမှုရှိပြီး ပိုမိုတတ်မည်ဖြစ်ပါကြောင်း၊ အဆိုပါကိစ္စနှင့် ပတ်သက်ပြီးလည်း ပြည်ထောင်စုရာထူးဝန်အဖွဲ့ဖြင့် ယအခုဆရာဝန်သစ်လွင် ၉၆၇ ယောက် ခေါ်ထားပါကြောင်း၊ ၎င်း ၉၆၇ ယောက်တက်သည့်အခါ ဆရာဝန်များ စိတ်ဝင်စားမှုရှိအောင် မည်ကဲ့သို့ သင်မည်ဆိုသည်ကို ညှိနှိုင်းပြီးလုပ်ပေးပါမည်။ One Way သင်လျှင် စိတ်ဝင်စားမှုမဖြစ်ပါကြောင်း၊ Two Ways ဖြစ်မှသာလျှင် စိတ်ဝင်စားမည် ဖြစ်သည်မှာ ပထမတစ်ချက် ဖြစ်ပါကြောင်း၊

ကျန်းမာရေးနှင့်အားကစား ဝန်ကြီးဌာနက အလုပ်ခန့်သည့်အခါ အဓိကက ပြည်သူ့ကျန်းမာရေးနှင့် အထူးသဖြင်‌့ ဆေးရုံ (ကုသရေး) ပိုင်းကို ပထမခန့်လိုက်ပါကြောင်း၊ သို့သော်လည်း ကုသရေးကို ခန့်သော်ငြားလည်း မကြာခင်ကာလမှာ တစ်နှစ်၊ နှစ်နှစ်လုပ်ပြီးလျှင် ဌာနတွင်းကူးပြောင်းမှုကိုလည်း ခွင့်ပြုထားသည့်အပြင် လိုအပ်ရင်လိုအပ်သလို အဆိုပါဆေးရုံမှ ပြည်သူ့ကျန်းမာရေးကို လာခြင်းရှိမည်၊ ဆေးသုတေသန ဦးစီးသွားခြင်းရှိမည်၊ အစားအသောက်နှင့်ဆေးဝါးသို့ သွားခြင်းရှိမည်၊ တိုင်းရင်းဆေးကို သွားခြင်းရှိမည်၊ အားကစားကိုသွားခြင်းရှိမည်၊ လူ့စွမ်းအင်းဖွံ့ဖြိုးမှု အရင်းအမြစ်ဌာနကို သွားခြင်းများရှိပါကြောင်း၊ ဆိုလိုသည်က မိမိတို့ ဆရာဝန်များသည် ဝင်တုန်းက ဝင်ပေါက်တွင် အဆိုပါရာထူး၊ အဆိုပါနေရာဝင်သော်လည်း ၎င်း၏သက်တမ်းတစ်လျှောက် ပင်စင်မယူခင် သက်တမ်းတွင် အမျိုးအမျိုးပြောင်းသွားလေ့ ရှိပါကြောင်း၊ ယခုလို ပြောင်းသွားခြင်းမှာ ဥပမာ ဝင်လာသည့် ဆရာဝန်များက ဆေးရုံတွင်နှစ်နှစ်လုပ်မည်၊ ပြီးလျှင် ၎င်းတို့က မြို့နယ်ဆရာဝန်ဖြစ်မည်၊ တိုက်နယ်ဆရာဝန်ဖြစ်မည်၊ တိုင်းဒေသကြီးနှင့် ပြည်နယ်ရုံးများတွင် လက်ထောက်ညွှန်ကြားရေးမှူး၊ ဒုတိယညွှန်ကြားရေးမှူး အစရှိသဖြင့် အကုန်ဖြစ်မည်၊ နောက် FDA၊ ဆေးသုတေသန၊ တိုင်းရင်းဆေးသို့ သွားသည့်အခါ အုပ်ချုပ်ရေးနှင့် စီမံခန့်ခွဲရေး လုပ်ငန်းများက လုပ်ရပါကြောင်း၊ ဆိုလိုသည်မှာ ဖောင်ကြီးဝန်ထမ်းတက္ကသိုလ်တွင် သင်ကြားသည့်စာများက အုပ်ချုပ်ရေး၊ စီမံခန့်ခွဲရေးကိစ္စများကို သင်ကြားခြင်း ဖြစ်ပါကြောင်း၊

ထို့အပြင် ထိုဆရာဝန်များသည် မကြာခင်ကာလမှာ ၎င်းတို့ Master of Hospital Administration တက်ပြီး ဆေးရုံအုပ်ကြီးများ ဖြစ်မည်၊ ဆေးရုံအုပ်ဖြစ်မည်၊ ဒုတိယဆေးရုံအုပ်၊ လက်ထောက် ဆေးရုံအုပ် ဖြစ်မည်၊ ယခုလိုလုပ်သည့်အခါ မိမိတို့က အုပ်ချုပ်ရေး၊ စီမံခန့်ခွဲရေးက အလွန်လိုအပ်လျက် ရှိပါကြောင်း၊ မိမိတို့က ဆရာဝန်များက မကျွမ်းကျင်သည့်အတွက် နည်းနည်လေး ပြဿနာလေးများရှိခြင်း ဖြစ်ပါကြောင်း၊ ဆိုလိုသည်က အုပ်ချုပ်ရေးနှင့် စီမံခန့်ခွဲရေးဆိုတာ ဝန်ထမ်းတိုင်းတွင် အလွန်အရေးကြီးသည့် ကိစ္စဖြစ်သည့်အတွက် တက်ခိုင်းခြင်းဖြစ်ပါကြောင်း၊ ဆရာဝန်များသည် အုပ်ချုပ်‌ရေးကိစ္စများ၊ စီမံခန့်ခွဲ‌ရေးကိစ္စများ၊ ရုံးလုပ်ငန်းများ၊ စာရင်းအင်းများကို မည်ကဲ့သို့ ထားသိုရမည်စသည့် အခြေခံကိစ္စများ၊ ဘဏ္ဍာရေးစည်းမျဉ်းများ၊ နိုင်ငံ့ဝန်ထမ်း ဥပဒေများကို ရာထူးဝန်အဖွဲ့မှ ရက်တိုသင်တန်းပေးပါကြောင်း၊ မိမိတို့ ဆရာဝန်များကို အထူးကိစ္စ တစ်ရပ်အနေဖြင့် ရှစ်ပတ်ခန့်ပေးပါကြောင်း၊ အခြားမှာဆိုလျှင် ၁၄ ပတ် ကြာပါကြောင်း၊ ရှစ်ပတ်ခန့်မှာလည်း ခြောက်ပတ်သည် ပြည်ထောင်စုရာထူးဝန်အဖွဲ့က သင်ကြားပါကြောင်း၊ ကျန်ရှိသည့် နှစ်ပတ်က ကျန်းမာရေးနှင့်အားကစား ဝန်ကြီးဌာနများမှ ၎င်းတို့သိသင့်သိထိုက်သော အချက်အလက်များကို သင်ကြားခြင်း ဖြစ်ပါကြောင်း၊ ဆိုလိုသည်က အဆိုပါရှစ်ပတ်သည် အလွန်အကျိုးရှိပါကြောင်း၊ တက်နေစဉ်အချိန်တွင်သာ Lecture room မှာထိုင်ပြီး ပင်ပန်းသည်ဟု ထင်ရသော်လည်း အမှန်တကယ်က အများကြီးအကျိုးပြီး Critical Thinking၊ Analytical Thinking များ အများကြီးပေါ်လာသည့်အတွက် မိမိအနေဖြင့် Personally ပိုင်းအတွက် အကျိုးရှိသွားမည်ဟု ထင်မြင်မိပါကြောင်း၊

ထို့အပြင် ICT နည်းပညာများ၊ Information စီမံခန့်ခွဲမှုများကိုလည်း သင်ကြားပေးခြင်းလည်း ရှိပါကြောင်း၊ ဝန်ထမ်းတက္ကသိုလ်တွင်သင်ကြားသည့် စာများကို မဖြေခင်ယူကြည့်သည့်အခါ တော်တော်အကျိုးရှိသည့် ကိစ္စဖြစ်သည်ကို တွေ့ရှိရပါကြောင်း၊ ဆရာဝန်များသည်  ဆေးကုသသည့် ပညာတစ်ခုတည်း လုပ်၍မရပါကြောင်း၊ ခုနကမိမိပြောခဲ့သလို အကြောင်းအချက်များကိုလည်း အားလုံးလုပ်ရမည်ဆိုသည်ကို တင်ပြချင်ပါကြောင်း၊ ဥပမာ- ပထမဆုံးဝင်တုန်းက ဆေးရုံတွင် ဝင်သော်ငြားလည်း မကြာခင် အဖွဲ့ခေါင်းဆောင် (Team Leader) ဖြစ်နိုင်ပါကြောင်း၊ Project Manager များလည်း ဖြစ်နိုင်ပါကြောင်း၊ မိမိတို့မှာ Project ပေါင်း ၄၂ ခုရှိပါကြောင်း၊ Project Manager များ ဖြစ်မည်ဆိုလျှင် အုပ်ချုပ်ရေးနှင်‌့ စီမံခန့်ခွဲရေးက မပါမဖြစ် ပါရှိရမည်ဖြစ်ပါကြောင်း၊ ကျွမ်းကျင်မှုပိုင်းဆိုင်ရာ တစ်ခုတည်းဖြင့် လုပ်၍မရပါကြောင်း၊ အလားတူစွာ ဆေးရုံတွင် လုံးဝလုပ်နေသော Clinician၊ ၎င်းတို့ကလည်း သွေးကြောနှင့် နှလုံးစီမံချက်မန်နေဂျာ၊ ဆီးချိုစီမံချက် မန်နေဂျာ၊ အဆုတ်ရောဂါစီမံချက် မန်နေဂျာ၊ စိတ်ရောဂါ စီမံချက်မန်နေဂျာ၊ အတက်ရောဂါစီမံချက် မန်နေဂျာများ လုပ်မည်ဆိုလျှင် အဆိုပါကိစ္စများက အုပ်ချုပ်ရေး၊ စီမံခန့်ခွဲရေးက မပါမဖြစ်  ပါရှိရမည်ဖြစ်ပါကြောင်း၊

မိမိတို့ဆရာဝန်များက လွန်ခဲ့သည့်အနှစ် ၃၀၊ ၄၀ က လုပ်ခဲ့သည့်အချိန်က အခြေအနေနှင့် ယခုအခြေအနေက လုံးဝမတူပါကြောင်း၊ ယခုခေတ်တွင် ခုနကစီမံခန့်ခွဲရေးနှင့် အုပ်ချုပ်ရေး ကိစ္စရပ်များ အလွန်အရေးကြီးသည်ဆိုသည်ကို မိမိတင်ပြချင်ပါကြောင်း၊ သို့မှသာလျှင် မိမိတို့ဆရာဝန်များက ပြည်သူများအပေါ် အလွန်အကျိုးရှိပြီး အရည်အသွေးပြည့်သည့် ဝန်ဆောင်မှုများကို ပေးနိုင်မည် ဖြစ်ပါကြောင်း၊ မိမိတို့ ပြန်လည်ကြည့်သည့်အခါ ဝန်ထမ်းသစ် ဆရာဝန်များသည် သက်ဆိုင်ရာဌာန၏ ပင်မလုပ်ငန်းများအပြင် ဌာန၏အုပ်ချုပ်ရေးနှင့် စီမံခန့်ခွဲရေး တာဝန်များကိုလည်း ဆောင်ရွက်ရပါကြောင်း၊ ပါမောက္ခဖြစ်သွားမည်၊ Associate Professor၊ Lecturer ဖြစ်သွားမည်ဆိုလျှင် ဆေးကုခြင်းတစ်ခုတည်းဖြင့် မရသည့်အတွက်ကြောင့် ဗဟိုဝန်ထမ်း တက္ကသိုလ်တွင် အုပ်ချုပ်ရေးနှင့် စီမံခန့်ခွဲရေးဘာသာရပ်များကို ကနဦးသင်ယူလေ့လာပြီးမှ ရာထူးတာဝန် ပေးအပ်ခြင်းအားဖြင့် ကျရာတာဝန်ဌာန၏ အုပ်ချုပ်ရေးနှင့် စီမံခန့်ခွဲရေးတာဝန်ကို ထမ်းဆောင်ရာတွင် လွယ်ကူအဆင်ပြေချောမွေ့စွာ ဆောင်ရွက်နိုင်မည်ဖြစ်ပြီး နယ်ပယ်အသီးသီးတွင် တာဝန်ထမ်းဆောင်သူများအတွက် အကြုံးဝင်သည့် သင်တန်းဖြစ်ပါကြောင်း၊

နောက်တစ်ချက်က ပြည်ထောင်စုရာထူးဝင် အနေဖြင့်လည်း ၎င်းတို့က ဥပဒေအရလုပ်ခြင်း ဖြစ်ပါကြောင်း၊ ပြည်ထောင်စုရာထူးဝင် အဖွဲ့အနေဖြင့် လက်ထောက်ဆရာဝန် ရာထူးနေရာများ အပါအဝင် ပြန်တမ်းဝင်အရာရှိအဆင့် စတင်ဝင်ပေါက်လစ်လပ် ရာထူးနေရာများ ရွေးချယ်လေ့ကျင့်ရေးအတွက် အောက်ပါအတိုင်း ဆောင်ရွက်ခဲ့ပါကြောင်း၊ လွှတ်တော်ကိုယ်စား လှယ်ကြီးမေးသည့် ဆရာဝန်များသည် ဗဟိုဝန်ထမ်းတက္ကသိုလ် တက်ရောက်ခြင်းကိစ္စမှာ ပြည်ထောင်စုရာထူးဝန်အဖွဲ့ နည်းဥပဒေများနည်းဥပဒေ ၇ နည်းဥပဒေခွဲ (က)၊ နိုင်ငံဝန်ထမ်းဥပဒေ ပုဒ်မ ၇ ပုဒ်မခွဲ (က) နှင့် နိုင်ငံ့ဝန်ထမ်း နည်းဥပဒေများ နည်းဥပဒေ ၁၄ နည်းဥပဒေခွဲ (က) နှင့် (ခ) တို့ပါ ပြည်ထောင်စုရာထူးဝန်အဖွဲ့သည် ဝန်ကြီးဌာနနှင့် အဖွဲ့အစည်းအသီးသီးတွင် လစ်လပ်လျက် ရှိသော ပြန်တမ်းဝင်အရာရှိ အဆင့်စတင် ရာထူးအတွက် ရွေးချယ်ပေးရမည်လို့ ပါပါကြောင်း၊ ၎င်းပြဋ္ဌာန်းချက်များအရ ရွေးချယ်ရေးလုပ်ငန်းစဉ်များကို ဥပဒေလုပ်ထုံး လုပ်နည်းများနှင့်အညီ စနစ်တကျ ရွေးချယ်ခြင်းသာ ဖြစ်ပါကြောင်း၊

ထို့အပြင် လေ့ကျင့်ရေးကဏ္ဍ အပိုင်းအနေဖြင့်လည်း ပြည်ထောင်စုရာထူးဝန်အဖွဲ့သည် နည်းဥပဒေများ နည်းဥပဒေ ၄၀ တွင် သက်ဆိုင်ရာဝန်ထမ်း အဖွဲ့အစည်းသည် အထူးကိစ္စရပ်အနေဖြင့် အဖွဲ့မှတိုက်ရိုက်ရွေးချယ်သော ဝန်ထမ်းလောင်းများအား အရာထမ်းလောင်း အခြေခံသင်တန်းကို တက်ရောက်နိုင်စေရန် အဖွဲ့နှင့်ညှိနှိုင်းဆောင်ရွက် ရမည်ဟုလည်းကောင်း၊ နိုင်ငံ့ဝန်ထမ်းဥပဒေပုဒ်မ  ၃၅ တို့တွင် ရာထူးဝန်အဖွဲ့က သတ်မှတ်တာဝန်ပေးထားသော အဖွဲ့အစည်းများနှင့် ဗဟိုဝန်ထမ်း တက္ကသိုလ်သည် ဝန်ထမ်းများနှင့် ဝန်ထမ်းလောင်းများအား အခြေခံသင်တန်းများပေးခြင်း၊ ဝန်ထမ်း များအတွက် ရာထူးဝန်အဖွဲ့က သတ်မှတ်ထားသည့် မွမ်းမံသင်တန်းများပေးခြင်း၊ ဆွေးနွေးပွဲများ ကျင်းပရေးတို့ကိုလည်းကောင်း၊ ဝန်ထမ်းလေ့ကျင့်ရေးဆိုင်ရာ ပညာရပ်ကို သုတေသနပြုခြင်းကို လည်းကောင်း၊ ရာထူးဝန်အဖွဲ့၏ ကြီးကြပ်မှုဖြင့် ဆောင်ရွက်ရမည်ဟူ၍လည်းကောင်း တိကျစွာပြဋ္ဌာန်း ထားရှိသည့်အပြင် ပြည်ထောင်စုရာထူးဝန်အဖွဲ့က ရွေးချယ်ခြင်းဖြစ်ပါကြောင်း၊ ထို့ကြောင့် မိမိအနေဖြင့် အဆိုပါအရာထမ်း လောင်းများအား အလုပ်သင်ဝန်ထမ်း (Induction Training Course) ကို တက်ရောက်နိုင်ရန် စီစဉ်ဆောင်ရွက်ပေးခြင်း ဖြစ်ပါကြောင်း၊

နိဂုံးချုပ်အနေဖြင့် မိမိတင်ပြချင်သည်မှာ လစာခံစားခွင့်မရှိသေးသော ဝန်ထမ်းသစ်ဆရာဝန်များ အားလုံးကို ဗဟိုဝန်ထမ်းတက္ကသိုလ် တက်စေခြင်းအစား ဝန်ထမ်းဆရာဝန်ထဲမှ အုပ်ချုပ်ရေးနှင့် စီမံခန့်ခွဲရေး တာဝန်ယူမည့် သူများကိုသာတက်စေရန် စီစဉ်ဆောင်ရွက်မည် ဆိုပါက  ပြဋ္ဌာန်း ထားသည့် တည်ဆဲဥပဒေများ၊ နည်းဥပဒေများနှင့် ညီညွတ်မှုမရှိကြောင်း ရှင်းလင်းဖြေကြားပါသည်။