Skip to main content

 

မိမိတို့ကျောက်တော်မြို့နယ်တွင် အပေါက်ဝဆိုသည့် ရွာကြီးတစ်ရွာရှိပါကြောင်း၊ အိမ်ခြေ ၁၀၀၀ ကျော်နှင့် လူဦးရေ ၅၀၀၀ ကျော်ရှိကြောင်း၊ ရဲကင်းများ၊ တိုက်နယ်ဆေးရုံများ၊ အထက်တန်းကျောင်း များနှင့် ရန်ကုန်-စစ်တွေ ကားလမ်းမကြီးဘေးက  အလွန်စည်ကားသည့် ကျေးရွာကြီးတစ်ရွာ ဖြစ်ပါ ကြောင်း၊ ကုလားတန်မြစ်၏ ကမ်းနားဖူးတွင်တည်ရှိသည့်အတွက် အနီးနားကျေးရွာများ၏ ကူးသန်း ရောင်းဝယ်သည့် အဓိကဈေးကွက်ကြီးတစ်ခုလည်း ဖြစ်ပါကြောင်း၊  ကျောက်တော်မြို့နယ် ကုလားတန်မြစ် တစ်လျှောက်တွင် မြစ်ရေတိုက်စားမှုကို ဆိုးဆိုးရွားရွားခံနေရသည့် ကျေးရွာတစ်ရွာလည်း ဖြစ်ပါကြောင်း၊ နှစ်စဉ်မြစ်ရေတိုက်စားမှုကြောင့် အိမ်ခြေတန်းများ၊ ဈေးတန်းများ၊ ရွာလမ်းများ အများစုသည် မြစ်ရေနှင့်အတူ မျောပါနစ်မြုပ်ခဲ့ရသည်မှာ နှစ်စဉ်နှင့်အမျှ ဖြစ်ပါကြောင်း၊ ၎င်းအခြေအနေများအပေါ် နိုင်ငံတော်က ကမ်းထိန်းနံရံများ လုပ်ပါကြောင်း၊ ၂၀၁၅-၁၆ ဘဏ္ဍာရေးနှစ်တွင် ပါဝင်ပါကြောင်း၊ မိမိတို့လုပ်ဆောင်သည့်အခါ အဆိုပါကမ်းထိန်းနံရံများက တည်ဆောက်သည့်နှစ်တွင် တချို့နံရံများပြန်လည်ပြိုကျ သွားပါကြောင်း၊ ၂၀၁၆-၁၇ ဘဏ္ဍာရေးနှစ်တွင် ထပ်မံထည့်သွင်း၊ ထပ်မံလုပ်၊ ထပ်မံပြိုပါကြောင်း၊ ၂၀၁၇-၁၈ ခုနှစ်တွင် လုပ်ဆောင်ပါကြောင်း၊ လတ်တလောအထိလည်း ကမ်းပြိုသည့်ဒဏ်ကို ရွာသားများက ဆိုးဆိုးရွားရွား ခံနေကြရပါကြောင်း၊ ရေကျသွားသည့်အခါ ကမ်းထိန်းနံရံများ၏ အောက်ခြေများကို မြင်နေရပါကြောင်း၊ ရေအရင်းအမြစ်နှင့် ပတ်သက်ပြီး မိမိတို့က ကျွမ်းကျင်သူများ မဟုတ်ပါကြောင်း၊ မိမိတို့ Option တစ်ခုအနေဖြင့် ရေလမ်းကြောင်းကိုလွှဲမည့် တူးမြောင်းတစ်ခုခုတူးလျှင် ဖြစ်နိုင်မလားကို စဉ်းစားကြည့်ပါကြောင်း၊ ၎င်းထက်ကောင်းမွန်သည့် နည်းလမ်းများလည်း ရှိကောင်းရှိနိုင်ပါကြောင်း၊ သေချာသည့်တစ်ချက်က နှစ်စဉ်လိုလိုကြေကွဲစရာ၊ တကယ့်ကို ထိတ်လန့်စရာကောင်းသော ကမ်းပြိုမှုများကို ရွာသားများက ခံစားနေရပါကြောင်း၊ နိုင်ငံတော်ကလည်း ဘတ်ဂျက်များချပေးပါကြောင်း၊ အမှန်တကယ်အောက်ခြေတွင် Effective ဖြစ်သည့် အခြေအနေ မရှိသည်မှာ တစ်စုံတစ်ခု လွဲချော်နေပါကြောင်း၊ သေချာစွာသုတေသနလုပ်ပြီး နိုင်ငံတော်၏ ဘတ်ဂျက်များကိုလည်း ပြည်သူကိုအကျိုးရှိရှိ ခံစား၍ရအောင် နှစ်စဉ်လိုလိုစိုးရိမ်နေရသည့် ပြည်သူ များ၏ အိပ်မက်ဆိုးများကလည်း လွတ်ကင်းအောင် စနစ်တကျသုတေသနလုပ်ပြီး ဌာနကစီစဉ် ဆောင်ရွက်ပေးနိုင်မှု အခြေအနေ၊ ကမ်းပြိုမှုအန္တရာယ်ကို တားဆီးပေးနိုင်မှုအခြေအနေကောင်း တစ်ခုခုကို ပြုလုပ်ပေးစေလိုသော စေတနာဖြင့် ကျောက်တော်မြို့နယ်၊ အပေါက်ဝကျေးရွာ ကမ်းပြိုမှုအန္တရာယ်အား တားဆီးကာကွယ်ရန် ထိရောက်သည့် နည်းလမ်းများကို စနစ်တကျ သုတေသနပြု ဆောင်ရွက်ပေးနိုင်ခြင်းရှိ/မရှိ သိလိုပါကြောင်း မေးမြန်းပါသည်။


 

ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ဒုတိယဝန်ကြီး ဦးကျော်မျိုး

ရခိုင်ပြည်နယ်၊ ကျောက်တော်မြို့နယ်၊ အပေါက်ဝကျေးရွာ ကမ်းပြိုကာကွယ်ရေးအတွက် ပို့ဆောင်ရေးနှင့် ဆက်သွယ်ရေးဝန်ကြီးဌာန၊ ရေအရင်းအမြစ်နှင့် မြစ်ချောင်းများ ဖွံ့ဖြိုးတိုးတက်ရေး ဦးစီးဌာနက ရခိုင်ပြည်နယ်အစိုးရ ရန်ပုံငွေစုစုပေါင်း ကျပ် ၁၁၆၀.၄၈ သန်းဖြင့် ၂၀၁၄-၁၅ နှင့် ၂၀၁၆-၁၇ ဘဏ္ဍာရေးနှစ်များတွင် ဘိုးပိုင်အခြေပြုကျောက်စီ ကမ်းထိန်းနံရံအလျား ၁၁၇၀ နှင့် သဲအိတ်စီ သဲမွေ့ယာအုပ် ရေလွှဲရေကာ ပေ ၂၀၀x ခုတို့ကို တည်ဆောက်ပေးခဲ့ပါကြောင်း၊ ၎င်းကမ်းထိန်း နံရံများ၏ အထက်ဘက်ရှိ ဘင်္ဂါလီရပ်ကွက် ကမ်းပြိုမှုမှကာကွယ်ရန် အနောက်ရိုးမမဏ္ဍိုင်ကုမ္ပဏီက ဘိုးပိုင်အခြေပြု ကျောက်စီကမ်းထိန်းနံရံအလျားပေ ၇၀၀ ကို ၂၀၁၇ ခုနှစ်နှစ်ကုန်ပိုင်းတွင် ထပ်မံဆောင်ရွက် ပေးခဲ့ပါကြောင်း၊ ၂၀၁၈ ခုနှစ် ဖေဖော်ဝါရီလအတွင်း ဆောင်ရွက်နေသော အနောက်ရိုးမ မဏ္ဍိုင်ကုမ္ပဏီ၏ မြေထိန်းအလျား ပေ ၇၀၀ အနက် အလျား ပေ ၃၀၀ ခန့်က ကိုယ်စားလှယ်တော်ကြီး တင်ပြသွားသည့်အတိုင်း ရုတ်တရက်ပြိုကျခဲ့ပြီး ပြိုကျမှုကြောင့် မြစ်ကြေဘက်ရှိ အဆိုပါမြေထိန်းနံရံနှင့် တစ်ဆက် တစ်စပ်တည်း တည်ရှိသော မြေထိန်းနံရံဟောင်းပေ ၁၀၀ ကျော်ခန့်သည် မိနစ်အနည်းငယ်ခြား၍ ဆက်လက်ပြိုကျခဲ့ပါကြောင်း၊ အဆိုပါဖြစ်စဉ်များအတွက် ရေအရင်းအမြစ်နှင့် မြစ်ချောင်းများဖွံ့ဖြိုး တိုးတက်ရေး ဦးစီးဌာနက တိုင်းတာရေးလုပ်ငန်းများ ဆောလျင်စွာဆောင်ရွက်ပြီး ရေနက်အိုး နီးကပ်စွာ ဖြစ်ပေါ်နေခြင်းမှ သက်သာစေရန် သဲအိတ်များ ချထားဆောင်ရွက် ပေးခဲ့ပါကြောင်း၊ ပျက်စီးသွားမှုများကို ပြန်လည်ဆောင်ရွက်မှုများ မရှိသည့်အတွက် အလျား ပေ ၃၀၀ ကျော်ခန့် ချိုင့်ခွက်ဖြစ်ပေါ်လျက်ရှိပြီး မိုးရာသီရေများချိန်တွင် ကုလားတန်မြစ်ရေသည် အဆိုပါ ချိုင့်ခွက်အတွင်း ဦးတည်ဝင်ရောက်၍ ပြန်ထွက်လာသည့် ရေကြောင်းသည် အောက်ဘက် ပေ ၆၀၀ ကျော် အကွာဘက်သို့ ဝဲပြန်လှိုက်စားမှုဖြစ်စေပြီး ရေအနက်တိုးမြှင့် လာခြင်းကြောင့် မြစ်ကြောဘက်ရှိ ကျောက်စီမြေထိန်းနံရံများ မငြိမ်မသက်မှု ဖြစ်ပေါ်လာခဲ့ပါကြောင်း၊ ယခုနှစ် မိုးကုန်ရာသီကာလတွင် ပိုမိုသိသာစွာ မြေသားနိမ့်ကျမှုများ ဖြစ်ပေါ်လာသဖြင့် ကျောက်ရိုးများ၏ အပေါ်ယံပိုင်းကို ကြိုတင်ဖြိုဖျက်ပြီး Weight လျှော့ချဆောင်ရွက်ပြီး ရေနက်အိုးအတွင်း တန်ပြန် Weight Counter Weight ရရှိစေရေးအတွက် သဲမွေ့ယာချထားခြင်း လုပ်ငန်းကို ၂၀၁၈ ခုနှစ် အောက်တိုဘာလအတွင်း ဆောင်ရွက်ပြီးခဲ့ပါကြောင်း၊

ထို့အပြင် တစ်ဘက်ကမ်းရှိ သောင်စွယ်ကို ကုဗမီတာ ၁၄၇၇၅၃ ခန့် တူးဖော် ဖြတ်ထုတ်ပစ်ခြင်းနှင့် ကျောက်စီကမ်းထိန်း နံရံပြုပြင်ခြင်း အလျားပေ ၃၀၀ ဆောင်ရွက်ခြင်းတို့ကို ၂၀၁၈-၁၉ ဘဏ္ဍာရေးနှစ်အတွက် ပြည်ထောင်စုရန်ပုံငွေ ကျပ်သန်း ၁၅၀ ခွင့်ပြုရရှိထားပြီး ဖြစ်ပါ၍ ရေအရင်း အမြစ်နှင့်မြစ်ချောင်းများ ဖွံ့ဖြိုးတိုးတက်ရေးဦးစီးဌာနက လုပ်ငန်းများကို --၂၀၁၉ ခုနှစ်မှ စတင်ပြီး ဆောင်ရွက်လျက်ရှိပြီး ယခုအချိန်ထိ လုပ်ငန်း ၆၈ ရာခိုင်နှုန်းခန့် ဆောင်ရွက်ပြီး ဖြစ်သည့်အတွက် ၂၀၁၉ ခုနှစ် ဇွန်လမကုန်မီတွင် လုပ်ငန်းအားလုံး ၁၀၀ ရာခိုင်နှုန်း ဆောင်ရွက်ပြီးစီးရန် လျာထားပါကြောင်း၊

ကျောက်တော်မြို့နယ်၊ အပေါက်ဝကျေးရွာသည် ကုလားတန်မြစ်၏ တံတောင်ဆစ် အချိုးအကွေ့ပေါ်တွင် တည်ရှိပြီး မြစ်ကြောင်းသည် ရွာအနီးတွင် ကျဉ်းမြောင်းစွာ စီးဆင်းမှုကြောင့် ရေတိုက်စားမှုမှာ ပိုပြီးဆိုးရွားလာကြောင်း သုံးသပ်တွေ့ရှိရပါသည်။ ရေလွှဲရေကာတန်းများ ဆောင်ရွက်ခဲ့သော်လည်း ရေအနက်များပြားမှုကြောင့်  ရွာ၏အထက်ဘက် ပေ ၁၀၀၀၀ ခန့်အထိ ရှိနေ၍ အဝေးမှရေလွှဲနေရမှုကြောင့် ထိရောက်မှုနည်းနေသည်ကို တွေ့ရှိရပါကြောင်း၊ တစ်ဘက်ကမ်းရှိ သောင်စွယ်ကို ပမာဏများစွာ တူးဖော်ဖြတ်ထုတ်ခြင်းနှင့် တိုက်ရိုက် ကာကွယ်မှုအတွက် ဘိုးပိုင်အခြေပြု ကမ်းထိန်းနံရံ ဒီဇိုင်းကို ပိုမိုစိတ်ချရသည့် ဒီဇိုင်းအဖြစ် မူလဘိုးပိုင်အနက်ကို ရေအနက်ပေ ၄၀ အထိသာ မျှော်မှန်း၍ ၄၅ ပေအနက် တူးဖော်ဆောင်ရွက်ခဲ့သော်လည်း ယခုအခါ ရေအနက်ပေ ၅၀ အထိရှိလာ၍ ဘိုးပိုင်အနက် ပေ ၆၀ ကျော်အထိတူး၍ ဆောင်ရွက်ရန် လိုအပ်လာခြင်း၊ ရေလွှဲရေကာတန်းများကို ရေအနက် ပေ ၅၀ အထိ တိုးမြှင့်၍ စိုက်နိုင်ရန် မူလမျောရေကာအစား RC ပိုင်တိုင်များ ရိုက်သွင်း၍ ရေလွှဲခြင်းစသည်တို့ကို ပြောင်းလဲ၍ ပြုပြင်ဆောင်ရွက် သွားမှသာ ထိရောက်မှုရှိနိုင်မည်ဟု သုံးသပ်ရရှိပါသည်။ သို့ဖြစ်ပါ၍ ကုလားတန်မြစ်၊ အပေါက်ဝကျေးရွာ ရေလမ်းကို နှစ်စဉ်စောင့်ကြည့်၍ တိုင်းတာမှုများ ပြုလုပ်လျက်ရှိပြီး ပြောင်းလဲမှုများအပေါ် မည်ကဲ့သို့ ထိရောက်စွာဆောင်ရွက်သွား သင့်သည်ကို လေ့လာစိစစ်၍ ဆောင်ရွက်ပေးသွားမည် ဖြစ်ပါကြောင်း ရခိုင်ပြည်နယ် အစိုးရအဖွဲ့ကိုယ်စား ရှင်းလင်ဖြေကြားပါသည်။