Skip to main content

 

စဉ့်ကိုင်မြို့နယ်၊ စဉ့်ကိုင်-စော်ရဲကျေးလက် လမ်းပေါ်ရှိ စဉ့်ကိုင်မြို့နယ်နှင့် တံတားဦးမြို့နယ်ကို ဆက်သွယ်ပေးထားသော ပန်းလောင်မြစ်ကူးတံတားကို ၁၉၉၃ ခုနှစ်က မန္တလေးအပြည်ပြည်ဆိုင်ရာ လေယာဉ်ကွင်း တည်ဆောက်ရေး စီမံကိန်းအတွက် ဆောက်လုပ်ရေး ပစ္စည်းများသယ်ပို့ရန် တည်ဆောက်ခဲ့ခြင်း ဖြစ်ပါကြောင်း၊ တံတား၏အရှည်မှာ ပေ ၃၀၀ ခန့်ရှိပြီး သစ်သားတိုင်၊ သစ်သားကြမ်းခင်း ဘေလီအမျိုးအစား ဖြစ်ပါကြောင်း၊ ပန်းလောင်မြစ်ကူး တံတားသည် စဉ့်ကိုင်မြို့နယ်နှင့် တံတားဦးမြို့နယ်အတွင်းရှိ ကျေးရွာပေါင်း ၂၀ ကျော်၊ အိမ်ခြေ ၄၀၀၀ ကျော်မှ ကျေးလက်နေပြည်သူများ နေ့စဉ်မှီခိုဖြတ်သန်း အသုံးပြုနေရသော တံတားတစ်စင်းလည်း ဖြစ်ပါကြောင်း၊ ထို့ကြောင့် ပြည်သူများသည် စိုက်ပျိုးရေးကို အဓိကလုပ်ကိုင် အသက်မွေးကြသော တောင်သူလယ်သမားများ ဖြစ်သည်နှင့်အညီ ၎င်းတို့၏ သီးနှံထွက်ကုန်များကို လှည်း၊ နွား၊ ထော်လာဂျီများဖြင့် တင်ဆောင်၍ အဆိုပါတံတားကို ဖြတ်သန်းသယ်ယူ ရောင်းချကြရခြင်းကြောင့် ဒေသခံတောင်သူများအတွက် အရေးပါလှသည့် ကုန်ထုတ်ရာ တံတားတစ်စင်းလည်း ဖြစ်ပါကြောင်း၊

တံတားအနီးပတ်ဝန်းကျင် ကျေးရွာများမှ ပြည်သူများနာမကျန်းဖြစ်သည့် အခါတွင်လည်း စဉ့်ကိုင် ဆေးရုံ၊ ကျောက်ဆည်ဆေးရုံများသို့ သွားရောက်ကုသမှု ခံယူနိုင်ရန်အတွက် ၎င်းတံတားက ဖြတ်သန်း သွားလာကြရပါကြောင်း၊ တံတားဦးမြို့နယ်အတွင်းရှိ တံတားအနီးအနား ကျေးရွာများမှ အခြေခံပညာ သင်ယူနေကြသော ကျောင်းသား/သူများသည်လည်း အနီးဆုံးကျောင်းများ ဖြစ်ကြသည့် စဉ့်ကိုင်မြို့နယ်အတွင်းရှိ စော်ရဲ (အ.လ.က)၊ ဟင်ငူ (အ.ထ.က)၊ ပုဂ္ဂလိကကိုယ်ပိုင် ကျောင်းများသို့ လာရောက်ပညာသင်ယူ နိုင်ရန်အတွက် အဆိုပါတံတားကို မဖြစ်မနေဖြတ်သန်း အသုံးပြုနေရခြင်း ဖြစ်သောကြောင့် စဉ့်ကိုင်မြို့နယ်အတွင်းရှိ ကျောက်ဆည်တက္ကသိုလ်သို့ လာရောက်ပညာသင်‌ယူနေရသည့် တက္ကသိုလ်ကျောင်းသား/သူ များအတွက်လည်း မရှိမဖြစ် အရေးပါလှသည့် တံတားတစ်စင်း ဖြစ်ပါကြောင်း၊ ယခုလို မြို့နယ်နှစ်မြို့နယ်အတွင်းရှိ ပြည်သူများ၏ စီးပွားရေး၊ လူမှုရေး၊ ကျန်းမာရေး၊ ပညာရေးတို့အတွက် အသုံးဝင်အရေးပါလှသည့် ၎င်းတံတားတည်ရှိရာ ကျေးလက်လမ်းမှ ရန်ကုန်-မန္တလေး အမြန်လမ်းနှင့်လည်း ဆက်သွယ်ထားသဖြင့် နေ့စဉ်ဖြတ်သန်း သွားလာသူ များပြားလှပါကြောင်း၊

ယခုအခါ ပန်းလောင်မြစ်ကူးတံတားသည် နှစ်ပေါင်း ၂၅ နှစ်ကျော် ကြာမြင့်နေပြီ ဖြစ်သဖြင့် ဟောင်းနွမ်းပျက်စီးနေပြီ ဖြစ်ပါကြောင်း၊ ဆွေးမြည်‌့ကျိုးပျက်နေသော အခြေတိုင်များ၊ ကြမ်းခင်းများကို ပတ်ဝန်းကျင်ကျေးရွာများမှ         ကျေးရွာသူ/သားများက နှစ်စဉ်တက်စွမ်းသမျှ ပြုပြင်နေခဲ့ကြ ရပါကြောင်း၊ မိုးတွင်းကာလများတွင် ပန်းလောင်မြစ်မှာ ရေစီးသန်၍ မြစ်ရေတက်လေ့ရှိခြင်း၊ မြစ်ကူးတံတားတွင်လည်း ဟောင်းနွမ်းပျက်စီး နေခြင်းတို့ကြောင့် နေ့စဉ်ဖြတ်သန်း သွားလာနေကြရသော ပြည်သူများမှာ အန္တရာယ်မကင်းသကဲ့သို့ ခံစားနေကြရပါကြောင်း၊ မြစ်ရေကြီးချိန်တွင် သီးနှံတင်ကားများ၊ ထော်လာဂျီများ ဖြတ်သန်းသွားလာချိန်များတွင် တံတားကျိုးကျမြောပါ သွားမည်‌့အရေးကို စိုးရိမ်ပူပန်နေကြပါကြောင်း၊ မလိုလားအပ်သည့် လူ့အသက်ဆုံးရှုံးမှုများ ဖြစ်ပြီးခါမှ ပြုပြင်တည်ဆောက်မည်‌့အစား မဖြစ်ပွားမီက ကြိုတင်ပြုပြင် ပေးခြင်းက အကောင်းဆုံးနည်းလမ်း ဖြစ်ပါကြောင်း၊

သို့ဖြစ်ပါ၍ လက်ရှိတံတား၏ အခြေအနေမှာ အမြန်ဆုံးပြုပြင်ထိန်းသိမ်းရန် အမှန်တကယ် လိုအပ်နေခြင်း၊ မလိုလားအပ်သော ဖြစ်ရပ်များ မဖြစ်ပေါ်စေရန် ကြိုတင်စီမံဆောင်ရွက် ထားသင်‌့ပါသဖြင့် စဉ့်ကိုင်မြို့နယ်၊ စဉ့်ကိုင်-စော်ရဲကျေးလက် လမ်းပေါ်ရှိ ပန်းလောင်မြစ်ကူးတံတားကို သံကူကွန်ကရစ်တံတားအဖြစ် အဆင့်တိုးမြှင့် တည်ဆောက်ပေးရန် အစီအစဉ်ရှိ/မရှိနှင့် အစီအစဉ်ရှိပါက မည်သည်‌့ဘဏ္ဍာရေးနှစ်တွင် တည်ဆောက်ပေးမည်ကို သိရှိလိုပါကြောင်း မေးမြန်းပါသည်။


 

မန္တလေးတိုင်းဒေသကြီး အတွင်းရှိ စဉ့်ကိုင်-စော်ရဲလမ်း အရှည် ၆ မိုင် ၂ ဖာလုံပေါ်တွင် တည်ရှိသော ပန်းလောင်မြစ်ကူး တံတားသည် အရှည် ၃၀၀ ပေ၊ အကျယ် ၁၄ ပေ၊ အမြင့် ၃၀ ပေ၊ သစ်သားတိုင် သစ်သားကြမ်းခင်း ဘေလီတံတားအမျိုးအစားဖြစ်ပြီး ၁၉၉၃ ခုနှစ်က တံတားဦး အပြည်ပြည်ဆိုင်ရာ လေယာဉ်ကွင်း တည်ဆောက်ရေးစီမံကိန်းက တာဝန်ယူတည်ဆောက်ခဲ့ပြီး ဆောက်လုပ်ရေး ဝန်ကြီးဌာန၊ ကျေးလက်လမ်းဖွံ့ဖြိုးရေးဦးစီးဌာနက စီမံခန့်ခွဲနေသည့် တံတားဖြစ်ပါကြောင်း၊ အဆိုပါ တံတားပေါ်တွင် လက်ရှိဖြတ်သန်းသွားလာ လျှက်ရှိသော ယာဉ်များ၏တန်ချိန်နှင့် တံတား၏ ကြံ့ခိုင်မှုခံနိုင်ဝန်မှာ လိုက်လျောညီထွေ မရှိပါသဖြင့် ကွန်ကရစ်တံတားအဖြစ် အဆင့်တိုးမြှင့် တည်ဆောက်ရန် လိုအပ်လျက်ရှိသည့်အတွက် ၂၀၁၉-၂၀ ဘဏ္ဍာရေးနှစ် မန္တလေးတိုင်းဒေသကြီး အစိုးရအဖွဲ့ရန်ပုံငွေတွင် ထည်‌့သွင်းလျာထား တင်ပြသွားမည်ဖြစ်ပြီး ရန်ပုံငွေရရှိမှုပေါ်မူတည်၍ အကောင်အထည်ဖော် ဆောင်ရွက်ပေးသွားမည် ဖြစ်ပါကြောင်း ရှင်းလင်းဖြေကြားပါသည်။

 

ဆောက်လုပ်ရေးဝန်ကြီးဌာန၊ ပြည်ထောင်စုဝန်ကြီး ဦးဟန်ဇော်