Skip to main content

 

ဆဂါပါကျေးရွာ၏ တောင်ပေါ်ရှိ ကျေးရွာလူနေအိမ်များသည် တောင်ပေါ်တွင် တည်ဆောက်ထားသည့် ရွာ/အိမ်များ ဖြစ်ပါကြောင်း၊ မိမိတို့တောင်ပေါ်က ကျောင်းများ ဆဂါပါကျေးရွာအနီးအနား အားလုံးပေါင်းလျှင် ကျောင်းလေးကျောင်း ရှိပါကြောင်း၊ ဆဂါပါကျေးရွာ၏ မူလတန်းကျောင်း သည်လည်း ကျေးရွာကျောင်း ဖြစ်ပါကြောင်း၊ ကျောင်းအားလုံးပေါင်းလျှင် အ.လ.က (ခွဲ) ဆဂါပါကျောင်း၊ အ.လ.က (ခွဲ) လုံထောင်ကျောင်း၊ ယင်းနော့ အ.မ.က (ခွဲ) ကျောင်း၊ ဘိုဝါ အ.မ.က (ခွဲ) ကျောင်းဆိုပြီး လေးကျောင်းရှိပါကြောင်း၊ ဆဂါပါကျေးရွာမှ ဆဒုံးမြို့ကိုသွားသည့် လမ်းသည် အမှန်တကယ် သွားလာရခက်ခဲသော လမ်းဖြစ်ပါကြောင်း၊ အဆိုပါ ကျေးရွာတွင်ရှိသည့် လူဦးရေအားလုံး၊ အိမ်ခြေအားလုံးက ခန့်မှန်းခြေအိမ်ခြေ ၆၀၀ ကျော်ရှိပြီး လူဦးရေက ၃၀၀၀ ကျော် ရှိပါကြောင်း၊ ပြည်သူများအနေဖြင့် ကျန်းမာရေး၊ ပညာရေး၊ လူမှုရေးကိစ္စအဝဝများကို ဝိုင်းမော်မြို့နှင့် မြစ်ကြီးနားမြို့ကို လာသည့်အခါ ၎င်းလမ်းများကို ဖြတ်သန်းရသဖြင့် ကျန်းမာရေးအရ ပြည်သူများ အင်မတန် ဒုက္ခရောက်ရပါကြောင်း၊ ဆေးရုံကိုမရောက်ခင် လမ်းခုလတ်တွင် မမျှော်မှန်းနိုင်သည့် ကိစ္စများ ကြုံတွေ့ရပါကြောင်း၊ ထို့ကြောင့် ကျေးလက်တောင်ပေါ်နေ ပြည်သူများအနေဖြင့် အမှန်တကယ် အဆိုပါလမ်းကို ကွန်ကရစ်လမ်း သို့မဟုတ် ရာသီမရွေးသွားလာနိုင်သော ကတ္တရာလမ်း သို့မဟုတ် ကွန်ကရစ်လမ်းခင်းပေးရန် လိုအပ်လျက်ရှိနေပါကြောင်း၊ သို့ဖြစ်ပါ၍ ဝိုင်းမော်မြို့နယ် အတွင်းရှိ ဆဒုံးမြို့မှဆဂါပါကျေးရွာသို့ ဆက်သွယ်ထားသော မြေသားလမ်းအား ကတ္တရာလမ်းခင်း သို့မဟုတ် ကွန်ကရစ်လမ်းခင်းပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။


 

နယ်စပ်ရေးရာ ဝန်ကြီးဌာနအနေဖြင့် ကချင်ပြည်နယ်အပါအဝင် ပြည်နယ်ခုနစ်ခု၊ တိုင်းဒေသကြီး နှစ်ခု၊ ကိုယ်ပိုင်အုပ်ချုပ်ခွင်‌့ရ ဒေသ/တိုင်းဒေသကြီး ခြောက်တိုင်းတို့မှ နယ်စပ်ဒေသဖွံ့ဖြိုးရေး လုပ်ငန်းများ ဖြစ်သည့် လမ်း/တံတားလုပ်ငန်း၊ သောက်သုံးရေ/စိုက်ပျိုးရေ ရရှိရေးလုပ်ငန်း၊ ကျေးလက်မီးလင်းရေး လုပ်ငန်း၊ ပညာရေး၊ ကျန်းမာရေးနှင်‌့ဒေသခံ ပြည်သူတို့၏ လူမှုစီးပွားဘဝ ဖွံ့ဖြိုးတိုးတက်ရေးကို အထောက်အကူ ပြုနိုင်မည့် အခြေခံအဆောက်အဦ တည်ဆောက်ရေး လုပ်ငန်းစဉ်များကို ဆောင်ရွက်ပါကြောင်း၊ ထို့ကြောင့် နယ်စပ်ဒေသတွင်ရှိသည့် တိုင်းရင်းသားများ၏ လူ့စွမ်းအား အရင်းအမြစ် ဖွံ့ဖြိုးတိုးတက်ရေး လုပ်ငန်းစဉ်များကိုလည်း အကောင်အထည်ဖော် ဆောင်ရွက်လျက် ရှိပါကြောင်း၊ ယခုကဲ့သို့ ဆောင်ရွက်သည့်နေရာတွင်  နိုင်ငံတော်အစိုးရက မူဝါဒနှင်‌့အညီ ရေးဆွဲချမှတ် ထားသည့် အမျိုးသားစီမံကိန်းနှင်‌့ အကျုံးဝင်သည့် လုပ်ငန်းများ၊ သက်ဆိုင်ရာ ပြည်နယ်/တိုင်း ဒေသကြီး အစိုးရအဖွဲ့တို့၏ တောင်းဆိုချက်၊ လွှတ်တော်ကိုယ်စားလှယ်များ၏ မေးမြန်းချက်၊ ဒေသခံပြည်သူလူထု၏ တင်ပြချက်များ၊ ဒေသအသီးသီးရှိ ဌာနဆိုင်ရာ တာဝန်ရှိသူများ၏ နယ်မြေကွင်းဆင်း စစ်ဆေးမှုအရ ‌ဒေသအတွက် မဖြစ်မနေဆောင်ရွက် ပေးရန်လိုအပ်သည့် လုပ်ငန်းများစသည့် ကိစ္စရပ်များကို ဝန်ကြီးဌာနအနေဖြင့် လုပ်ငန်းမှတ်တမ်း ရေးသွင်းပြီး ဦးစားပေး ကဏ္ဍများအလိုက် နိုင်ငံတော်အစိုးရ၏ ဘဏ္ဍာငွေခွင့်ပြု ဝင်ဆံ့မှုအပေါ် အခြေခံပြီး နှစ်စဉ်ဘဏ္ဍာရေး နှစ်အလိုက် ရန်ပုံငွေများကို လျာထားဆောင်ရွက် ပေးလျက်ရှိပါကြောင်း၊ ကိုယ်စားလှယ်ကြီး မေးမြန်းထားသည့် လမ်းသည် ကချင်ပြည်နယ်၊ ဝိုင်းမော်မြို့နယ်အတွင်း ဆဒုံးမြို့မှ ဆဂါပါကျေးရွာသို့ ဆက်သွယ်ထားသော လမ်းအရ ဆဒုံးမြို့အမ် (၄) ရပ်ကွက်ကနေ ဆဂါပါ ကျေးရွာ ချောင်းကူးတံတားထိ ၃ မိုင် ၃ ဖာလုံရှိပြီး အချို့ဒေသများသည် ၂၂ ပေအကျယ် ရှိပါကြောင်း၊ အချို့နေရာများသည် ၁၂ ပေ အကျယ်ခန့်သာရှိသဖြင့် သတ်မှတ်စံချိန် စံညွှန်းပြည့်မီစေရန် မြေသားလမ်းပြုပြင်ခြင်းကို ဦးစွာဆောင်ရွက်ပြီးမှသာ ကတ္တရာလမ်း သို့မဟုတ် ကွန်ကရစ်လမ်း လုပ်ငန်းကို ဆောင်ရွက်ရပါမည်၊ အဆိုပါ လုပ်ငန်းကိုဆောင်ရွက်ခြင်းအားဖြင့် ကျေးရွာငါးရွာ၊ အိမ်ခြေ ၃၇၅ အိမ်၊ လူဦးရေ ၂၀၁၀ ဦးတို့ကို ပညာရေး၊ ကျန်းမာရေး၊ လူမှုရေး၊ စီးပွားရေးဖွံ့ဖြိုး တိုးတက်မှုကို အထောက်အကူ ပြုစေနိုင်မည် ဖြစ်သော်လည်း လက်ရှိတွင် ထိုလမ်းကို တစ်နေ့လျှင် မော်တော်ယာဉ် ၁၀ စီး ခန့်သာ ဖြတ်သန်းသွားလာ နေရခြင်းကိုလည်း သိရှိရပါကြောင်း၊

ထို့ပြင် နယ်မြေလုံခြုံရေး အခြေအနေအရ လတ်တလော ဆောင်ရွက်ပေးရန် မသင့်တော်သေးကြောင်း မြေပြင်ကွင်းဆင်း စိစစ်ချက်အရ သိရှိရပါသည်။ ထို့ကြောင့် လွှတ်တော်ကိုယ်စားလှယ် မေးမြန်းထားသော လမ်းကိုကတ္တရာလမ်း သို့မဟုတ် ကွန်ကရစ်လမ်းခင်းပေးရန်အတွက် မိမိတို့၏ နယ်စပ်ဒေသဖွံ့ဖြိုးရေး လုပ်ငန်းစာရင်းတွင် မှတ်တမ်းတင်ထားရှိပါမည်၊ နယ်မြေတည်ငြိမ်အေးချမ်းမှု၊ စီမံကိန်းပါ လုပ်ငန်းဖြစ်မှု၊ ဘတ်ဂျက်ရရှိနိုင်မှု၊ လုပ်ငန်းလိုအပ်ချက်နှင့် ဒေသအတွက် အကျိုးပြုနိုင်မှု၊ မြေပြင်အခြေအနေနှင့် ကိုက်ညီမှု၊ သက်ဆိုင်ရာနယ်မြေ တာဝန်ခံများမှသော်လည်းကောင်း၊ လွှတ်တော်ကိုယ်စားလှယ်များက သော်လည်းကောင်း ဦးစွာမြေပြင်ကွင်းဆင်း စစ်ဆေးထားရှိမှုတို့ အပေါ်မူတည်ပြီး နယ်စပ်ဒေသဖွံ့ဖြိုးရေး တတိယငါးနှစ် စီမံကိန်းတွင် အဆိုပြုလျားထား ဆောင်ရွက် ပေးသွားမည် ဖြစ်ပါကြောင်း ရှင်းလင်းဖြေကြားပါသည်။

 

နယ်စပ်ရေးဝန်ကြီးဌာန၊ ဒုတိယဝန်ကြီး ဗိုလ်ချုပ်သန်းထွဋ်