Skip to main content

 

ပြည်ပသို့ တရားမဝင်ငွေလွှဲဝန်ဆောင်မှု(Hundi)နှင့်ပတ်သက်ပြီး မြန်မာနိုင်ငံတော်ဗဟိုဘဏ်အနေဖြင့် ပြည်ပသို့ တရားဝင်ငွေလွှဲခွင့်ပြုထားသည့်ဘဏ်အရေအတွက်နှင့် နိုင်ငံသားတစ်ဦးလျှင် တရားဝင် ငွေလွှဲခွင့်ပြုထားသည့်စုစုပေါင်း ငွေကြေးပမာဏသိလိုခြင်း၊ ပြည်ပသို့ တရားဝင်ငွေကြေးလွှဲပြောင်းခွင့် နှင့်ပတ်သက်၍ သက်ဆိုင်ရာအနေဖြင့် မည်ကဲ့သို့ကိုင်တွယ်ဖြေရှင်းမည်နည်း၊ တရားမဝင် ငွေကြေးလွှဲပြောင်းခြင်းကြောင့် နိုင်ငံ့အပေါ် ဖြစ်ပေါ်လာသည့်အကျိုးဆက်တို့ကို သိလိုခြင်းတို့နှင့် စပ်လျဉ်းသည့်မေးခွန်း

မေးခွန်းနှင့်ပတ်သက်ပြီး ပြည်တွင်းကနေပြည်ပကို တရားဝင်ငွေလွှဲ ခွင့်ပြုထားသည့် ငွေကြေး Amount က လူတစ်ဦးလျှင် အမေရိကန်ဒေါ်လာ ၂၀၀၀ သာရှိပါကြောင်း၊ ဒါကလည်း ဘဏ်တိုင်း မဟုတ်ပါကြောင်း၊ အကယ်၍ လွှဲခဲ့မည်ဆိုလျှင်လည်း မှတ်ပုံတင်မကဘဲ အိမ်ထောင်စု ဇယားပေးရမည့်အပြင် ငွေလွှဲပြောင်း ငွေလက်ခံသည့် သူများပါ အိမ်ထောင်စုဇယားထဲ ပါရမည် ဖြစ်ပါသည်ဟု သတ်မှတ်ထားပါကြောင်း၊ မိမိအနေဖြင့် ယခုလိုနည်းစနစ်များ ပြုလုပ်ခြင်းသည် တရားမဝင် ငွေလွှဲဝန်ဆောင်မှု ပြုလုပ်နေသူများအတွက် ပိုပြီးအားပေးရာရောက်သည့် ဝန်ဆောင်မှု စနစ်ဖြစ်ပါကြောင်း၊ ယခုလို ခက်ခဲသည့်စနစ်ကို မည်သူကမှ အချိန်များ အများကြီးပေးပြီး သွားလွှဲကြမည် မဟုတ်သကဲ့သို့ ဗဟိုဘဏ်အနေဖြင့်လည်း လွယ်ကူရှင်းလင်းသော ဝန်ဆောင်မှုများကို ဖန်တီးပေးရန် လိုအပ်နေပါကြောင်း၊ အထူးသဖြင့် Hundi ဟု အများခေါ်ဝေါ် နေကြသော ငွေလွှဲဖြတ်ပိုင်း ဝန်ဆောင်မှုများသည် သက်ဆိုင်ရာဝန်ကြီးဌာနတွင် လုံးဝမှတ်ပုံတင် ထားခြင်းမရှိကြပါကြောင်း၊ များသောအားဖြင့် အချင်းချင်းချိတ်ဆက်ပြီး ဝန်ဆောင်မှုများကို မသိအောင် ပြုလုပ်ကြခြင်း ဖြစ်ပါကြောင်း၊

၁၅-၁၂-၂၀၁၅ ရက်နေ့တွင် ပြည်ထောင်စုလွှတ်တော်မှ အတည်ပြုပြဋ္ဌာန်းထားသော နိုင်ငံခြားသုံးငွေ စီမံခန့်ခွဲမှု ဥပဒေနှင့် ၁၄-၃-၂၀၁၄ ရက်နေ့တွင် ပြဋ္ဌာန်းထားသော ငွေကြေးခဝါချမှု တိုက်ဖျက်ရေး ဥပဒေရှိသော်လည်း အမှန်တကယ်မြေပြင်တွင် ဖြစ်ပျက်နေသော အရာများနှင့် လက်တွေ့တွင် ယင်းဥပဒေ၏ လွှမ်းမိုးမှုသည် အလွန်အားနည်းနေသေးကြောင်း တွေ့ရသည့်အပြင် တာဝန်အရှိဆုံး ဌာနများ၏ လုပ်ဆောင်မှုက အင်မတန်မှ အားနည်းနေသေးသည်ကို လေ့လာတွေ့ရှိရပါကြောင်း၊ System ပိုင်းအရ အားနည်းနေသေးသည့် အတွက်ကြောင့် ပြုပြင်ပြောင်းလဲရန် လိုအပ်နေပြီ ဖြစ်ပါကြောင်း၊ မြန်မာနိုင်ငံတွင် တရားမဝင်ငွေကြေး ဝန်ဆောင်မှုကို မည်သည့်အတွက်ကြောင့် အများဆုံး အသုံးပြုသနည်းဆိုသည်ကို လေ့လာသည့်အခါ ဈေးကွက်အရ လိုအပ်ချက်ဖြစ်ပြီး ဝယ်လိုအားရှိလို့ ရောင်းလိုအားရှိခြင်း ဖြစ်ပါကြောင်း၊ ထို့ကြောင့် သက်ဆိုင်ရာ လုပ်ပိုင်ခွင့် အပ်နှင်းခြင်းခံရသော ဌာနများအနေဖြင့် ငွေကြေးခဝါချမှုများ မဖြစ်ပေါ်လာစေရန်နှင့် နိုင်ငံတော်၏ အခွန်ဘဏ္ဍာ မဆုံးရှုံးရအောင် ရောင်းလိုအားနှင့် ဝယ်လိုအားမျှအောင် လုပ်ပေးရန် လိုအပ်နေပြီ ဖြစ်ပါကြောင်း၊ လုပ်မပေးနိုင်သရွေ့က ရန်ကုန်မြို့အနော်ရထာလမ်း တစ်လျှောက်တွင် တရားမဝင် ငွေလွှဲဝန်ဆောင်မှု လုပ်ငန်းများ လုပ်နေကြသည့် သူများအတွက် အားပေးသကဲ့သို့ဖြစ်ပြီး နိုင်ငံနှင့် ပြည်သူအတွက် နစ်နာသည်ထက် နစ်နာရဦးမည် ဖြစ်ပါကြောင်း၊ အဆိုပါ အကြောင်းအရင်းများကို ဝန်ကြီးဌာနအနေဖြင့် မသိရှိဘဲမနေပါကြောင်း၊ စဉ်းစားစရာအချက်က မည်သည့်အတွက်ကြောင့် ၎င်းလူများကို ဥပဒေအရ အရေးယူခြင်းမရှိဘဲ လွှတ်ထားပါသနည်း၊ နိုင်ငံခြားသုံးငွေစီမံခန့်ခွဲမှုဥပဒေ အခန်း (၁၁) တွင် တားမြစ်ချက်များ ဖော်ပြထားသည့်အပြင် ငွေကြေးခဝါချမှု တိုက်ဖျက်ရေး ဥပဒေနှင့်လည်း ငြိစွန်းပါလျက် မည်သည့်အတွက်ကြောင့် အရေးယူခြင်း မပြုလုပ်ရသနည်းဆိုသည့် အချက်သည် တော်တော်စဉ်းစားစရာ ဖြစ်နေပါကြောင်း၊

ပြည်ပရင်းနှီးမြှုပ်နှံမှုများ ဝင်လာရန်အတွက်ဆိုလျှင် ဗဟိုဘဏ်နှင့် သက်ဆိုင်ရာဌာနမှ အဆိုပါကိစ္စများကို ကောင်းမွန်စွာကိုင်တွယ်ရန် လိုအပ်ပါကြောင်း၊ နိုင်ငံအချင်းချင်း ငွေလွှဲဝန်ဆောင်မှုများကို အဆင်ပြေချောမွေ့အောင် ပြုလုပ်ပေးရမည့် မဟာဗျူဟာများ ကောင်းကောင်း ချမှတ်ရေးဆွဲရန်လည်း လိုအပ်နေပြီဖြစ်ပါကြောင်း၊ အရေးကြီးဆုံးအချက်က ဘဏ်များအားလုံးအနေဖြင့် ထူးခြားသည့် ငွေကြေးစီးဆင်းမှုများ ပေါ်ပေါက်လာခဲ့လျှင် ဗဟိုဘဏ်ကို အချိန်နှင့်တစ်ပြေးညီ တင်ပြရမည်ဖြစ်သည့်အပြင် ဗဟိုဘဏ်အနေဖြင့်လည်း ယခုလို ထူးခြားဖြစ်စဉ် မျိုးများကိုအမြန်ဆုံး ကိုင်တွယ်ဖြေရှင်း နိုင်ရန်အတွက် ငွေကြေးခဝါချမှုများနှင့် ချက်ချင်းချိတ်ဆက် ပူးပေါင်းသင့်သည်ကို လေ့လာတွေ့ရှိရပါကြောင်း၊

ဘဏ်များအနေဖြင့် ဝန်ထမ်းများခေါ်ယူရာတွင်လည်း ဘွဲ့ရဖြစ်ရမည်ဟု တစ်ခုတည်း မဟုတ်ဘဲ ငွေကြေးခဝါချမှုနှင့် ပတ်သက်၍ မည်မျှနားလည် တတ်ကျွမ်းသနည်း ဆိုသည့်အချက် ပါဝင်သင့် ပါကြောင်း၊ တရားမဝင်ငွေကြေး လွှဲပြောင်းခြင်း၊ ငွေလဲလှယ်ခြင်း စသည်တို့ကို မြန်မာနိုင်ငံ နယ်စပ်မြို့တွင် အများဆုံးတွေ့ရပါကြောင်း၊ ယခုလိုတရားမဝင် ငွေလွှဲဝန်ဆောင်မှုများကို တရုတ်နိုင်ငံတွင် သေဒဏ်အပြင် ထောင်ဒဏ်တစ်သက်တစ်ကျွန်း ချမှတ်ခြင်းကို ခံရပါကြောင်း၊ ထို့ကြောင့် လူအနည်းစုဖြင့် တစ်နိုင်ငံလုံး၏ဘဝကို နိုင်ငံတော်အနေဖြင့် အလဲထပ်မပြုနိုင်သည့် အတွက်ကြောင့် နိုင်ငံသူနိုင်ငံသားများ၏ အကျိုးကိုရှေးရှုပြီး ယနေ့မေးခွန်းကို တင်ပြရခြင်း ဖြစ်သည့်အပြင် ဗဟိုဘဏ်နှင့် သက်ဆိုင်ရာဌာနများ အနေဖြင့်လည်း နိုင်ငံနှင့်ပြည်သူများ၏ အကျိုးကို ရှေးရှုပြီး အချင်းချင်းချိတ်ဆက် ဆောင်ရွက်မှုအား ပိုမိုကောင်းအောင် ပြုလုပ်သင့်ပါကြောင်းဖြင့် မိမိမေးခွန်းအား မေးမြန်းရခြင်းဖြစ်ပါသည်။


 

အဆိုပါမေးခွန်းနှင့် ပတ်သက်ပြီး မိမိအနေဖြင့် အဆင့်နှစ်ဆင့်ခွဲပြီး တင်ပြသွားမည် ဖြစ်ပါကြောင်း၊ ပထမအဆင့်အနေဖြင့် မြန်မာနိုင်ငံတော်ဗဟိုဘဏ်အနေနှင့် နိုင်ငံသားတစ်ဦးကို တစ်ပတ်လျှင် ဒေါ်လာတစ်သောင်းအထိ အများဆုံးခွင့်ပြုပါကြောင်း၊ တရားဝင် စုစုပေါင်းငွေလွှဲခွင့်လည်း ပြုထားပါကြောင်း၊ ယခုလိုငွေလွှဲပြုထားသည့် ကိစ္စတွင် ဘဏ်လုပ်ငန်းလိုင်စင် ထုတ်ပေးထားသည့် နိုင်ငံပိုင်ဘဏ်သုံးဘဏ်၊ ပြည်တွင်းပုဂ္ဂလိကဘဏ် ၁၉ ဘဏ်၊ နိုင်ငံခြားဘဏ်များ၏ ဘဏ်ခွဲ ၁၃ ဘဏ် စုစုပေါင်း ၃၅ ဘဏ်သည် ပြည်ပကို ငွေလွှဲလုပ်ငန်း လုပ်ကိုင်ခွင့်ရှိပါကြောင်း၊ Authorize Dealer ဆိုသည့် လိုင်စင်ထုတ်ပေး ထားပါကြောင်း၊ ၎င်းပြည်တွင်းဘဏ် ၁၉ ဘဏ်အနက်မှ ၁၃ ဘဏ်ကသာ တကယ်လုပ်နေသည့် အနေအထားဖြစ်ပါကြောင်း၊ အဆိုပါ ၁၃ ဘဏ်က Western Union ၊ Moneygram ၊ True Money ဆိုသည့် ငွေလွှဲလုပ်ငန်းများနှင့်ပေါင်းပြီး လုပ်ငန်းလုပ်ကိုင် ဆောင်ရွက်လျက် ရှိသည့်အခါ မိမိတို့ဘက်က နှစ်ပိုင်းရှိတာက ကုန်သွယ်မှုအတွက် လွှဲပို့သည့်ငွေနှင့် ကုန်သွယ်မှုအတွက် မဟုတ်သည့် လွှဲပို့သည့်ငွေဆိုပြီး နှစ်မျိုးရှိသော်လည်း ကုန်သွယ်မှုအတွက် လွှဲပို့သည့်ငွေက အကန့်အသတ်မရှိပါကြောင်း၊ ထို့နောက် ကုန်သွယ်မှုမဟုတ်သည့် ပြည်ပကို ဆေးသွားကုမည်ဆိုသည့် တခြား ညီလာခံနှင့် ဆွေးနွေးပွဲများ၊ ပညာသင်စရိတ်များ၊ စာမေးပွဲကြေးများ ဆိုသည့်စာများလွှဲပို့သည်ကအများဆုံး အမေရိကန်ဒေါ်လာ တစ်သောင်းအထိကို သတ်မှတ်ထားသည့် အထောက်အထားများ တင်ပြပြီးမှစိစစ်ပြီး လွှဲပို့ခွင့်ရှိပါကြောင်း၊ ၎င်းထက်ပိုများသည့် ကိစ္စကို လွှဲပို့လျှင် မြန်မာနိုင်ငံတော် ဗဟိုဘဏ်ကို ခွင့်ပြုချက်ယူရခြင်း ဖြစ်ပါကြောင်း၊

လွှတ်တော်ကိုယ်စားလှယ်ကြီး၏ မေးခွန်းဖြစ်သည့် ပြည်ပကိုငွေလွှဲပို့သည့်အခါ မည်သည့်ကိစ္စများ ဖြစ်လာနိုင်သနည်းဆိုသည့် မေးခွန်းက တော်တော်အရေးကြီးသည့် မေးခွန်းဖြစ်ပါကြောင်း၊ ၎င်းကို မိမိတို့ လေးလေးနက်နက် ကိုင်တွယ်ရန်လိုပါကြောင်း၊ ထို့ကြောင့် ပြည်ပကိုတရားမဝင် လွှဲပို့ခြင်းဖြင့် ဖြစ်လာမည့် အကျိုးဆက်များက မိမိတို့နိုင်ငံတွင် တရားဝင်လွှဲခြင်းနှင့် တရားမဝင်လွှဲသည့် ကိစ္စသည် တရားမဝင်လွှဲသော ငွေကပိုများလျက် ရှိပါကြောင်း၊ ထို့အတွက်ကြောင့် Financial Action Task Force ခေါ်သည့် Review တွင် မိမိတို့နိုင်ငံအနေဖြင့် ထိခိုက်မှုရှိလာနိုင်ပါကြောင်း၊ ယခုလို တရားမဝင် လွှဲသည့်ငွေပမာဏ များခြင်းအားဖြင့် အဆိုပါကိစ္စများသည် မည်သည့်ကိစ္စကို လွှဲနေသနည်း ဆိုသည်ကို တိုင်းပြည်အစိုးရက သေသေချာချာ မသိပါကြောင်း၊ တိုင်းပြည်၏ သက်ဆိုင်သည့် အာဏာပိုင်အဖွဲ့အစည်းက မသိဘူးဟု ယူဆသည့်အခါ အဆိုပါကိစ္စများသည် အခက်အခဲဖြစ်လာ နိုင်ခြင်း ဖြစ်ပါကြောင်း၊ မိမိတို့အနေဖြင့် တရားမဝင်လွှဲပို့သည့်ကိစ္စကို လေ့လာကြည့်သည့်အခါ ၂၀၁၇ ခုနှစ် ဇန်နဝါရီလအတွင်း မိမိတို့ မြန်မာနိုင်ငံတော် ဗဟိုဘဏ်ကနေပြီး စင်ကာပူနိုင်ငံနှင့် ထိုင်းနိုင်ငံတို့ကို သွားရောက်လေ့လာခဲ့ပြီး သက်ဆိုင်ရာအာဏာပိုင်နှင့် ဆွေးနွေးခဲ့ပါကြောင်း၊

တစ်ချိန်တည်း အမေရိကန်ဘဏ္ဍာရေးဌာနနှင့်လည်း ဆွေးနွေးမှုများ လုပ်ခဲ့ပါကြောင်း၊ လုပ်ခဲ့ပြီးသည့် နောက်ပိုင်း မိမိတို့အနေဖြင့် ငွေလွှဲပို့လုပ်ငန်းများကို လုပ်ကိုင်နိုင်ရန်အတွက်ကို ပထမဦးဆုံးက ထိန်းကျောင်းမည့် အစီအစဉ်တစ်ခု စတင်ဆွေးနွေးခဲ့ပါကြောင်း၊ ပြီးခဲ့သည့် ၂၀၁၉ ခုနှစ် ဇန်နဝါရီလတည်းက အပြီးသတ်ရေးဆွဲပြီးလည်း ဖြစ်ပါကြောင်း၊ ရေးဆွဲပြီးသည့်အခါ အမေရိကန်ပြည်ထောင်စု ဘဏ္ဍာရေးဝန်ကြီးဌာန၊ ထိုင်းနိုင်ငံ၊ စင်ကာပူနိုင်ငံအနေနှင့် ၎င်းတို့၏ အတွေ့အကြုံများပါယူပြီး ရေးဆွဲခဲ့ခြင်း ဖြစ်ပါကြောင်း၊ အဆိုပါ ရေးဆွဲခဲ့သည့် မူကြမ်းအပေါ် မကြာခင် ဒါရိုက်တာအဖွဲ့ အစည်းအဝေးကို တင်ပြရင်း သက်ဆိုင်ရာကော်မတီကို တင်ပြမည်၊ ပြီးသည့်အခါ ရှေ့နေချုပ်ရုံး၏ သဘောထားမှတ်ချက်ယူမည်၊ ပြီးလျှင် ပြည်ထောင်စုအစိုးရအဖွဲ့၏ အတည်ပြု ချက်ကိုယူပြီး ထုတ်ပြန်သွားမည်ဖြစ်ပြီး ၂၀၁၉ ခုနှစ်အတွင်း ပြီးစီးရေး ဆောင်ရွက်သွားမည် ဖြစ်ပါကြောင်း၊

မိမိတို့ငွေလွှဲသည့်အခါ အရမ်းကြန့်ကြာမှုများ ဖြစ်သည့်အနေအထားများ ဖြစ်နေပါကြောင်း၊ ထို့အတွက်ကြောင့် ဘဏ်လုပ်ငန်းကိုမသုံးဘဲ တရားမဝင်လမ်းကြောင်းများကတစ်ဆင့် လွှဲပို့ခြင်းများ ဖြစ်နေသည်ဆိုသည့် အနေအထားနှင့် ပတ်သက်၍ ယခု အသစ်ဆွဲသည့် စည်းမျဉ်းတွင် အမေရိကန်ဒေါ်လာ ၅၀၀ အောက်ရှိသည့် ပမာဏဆိုလျှင် မိမိတို့အနေဖြင့် တစ်စုံတစ်ရာ လိုအပ်သည့် တချို့အချက်အလက်သာ မေးမြန်းပြီး တစ်နှစ်တာခန့် သိမ်းဆည်းထားရန် စည်းမျည်းထုတ် ထားပါကြောင်း၊ အကယ်၍ အမေရိကန်ဒေါ်လာ ၅၀၀ နှင့် ညီမျှသည့်ပမာဏထက် ပိုသည့်ငွေကို ငွေကြေးခဝါချမှု တိုက်ဖျက်ရေးအတွက် လိုအပ်သည့် အထောက်အထားများ၊ စည်းမျဉ်းများ မည်သည့်အတွက်ကြောင့် ငွေလွှဲရသည်ဆိုသည့် အကြောင်းအရင်းများကို ငွေလွှဲလက်ခံလိုင်စင် ရသူမှတောင်းခံပြီး ငါးနှစ်တာသိမ်းဆည်းထားမည် ဖြစ်ပါကြောင်း၊ မြန်မာနိုင်ငံတော် ဗဟိုဘဏ်ကနေပြီး လူနှင့်တကွ ငွေကြေးခဝါချမှု တိုက်ဖျက်ရေးအဖွဲ့ကလည်း လိုအပ်လျှင် အချိန်မရွေး ယူကြည့်သွားလျှင် ထုတ်ပေးနိုင်ရမည့်အနေ အထားဖြစ်ပါကြောင်း၊

နောက်တစ်ခုက ငွေလွှဲလိုင်စင်ကို တရားဝင်ထုတ်မပေးခင် အချိန်အတွင်း ပြည်ထဲရေးဝန်ကြီးဌာန အောက်တွင်ရှိသည့် ငွေကြေးခဝါချမှု တိုက်ဖျက်ရေးအဖွဲ့နှင့် မြန်မာနိုင်ငံတော် ဗဟိုဘဏ်နှင့် ပူးပေါင်းပြီး ဖွင့်လှစ်မည့်သင်တန်းကို တက်ရောက်ရမည် ဖြစ်ပါကြောင်း၊ အဆိုပါ သင်တန်းအောင်မြင်မှု ရှိပြီးမှလည်း ဘယ်ငွေလွှဲကတော့ သံသယရှိဖွယ်ရာ ရှိသည်ဆိုသည်ကို နားလည်နိုင်မည့် အနေအထား ဖြစ်ပါကြောင်း၊

နောက်တစ်ခု အများပြည်သူများအပေါ် ဥပဒေ၏ လွှမ်းမိုးထိရောက်မှု အားနည်းနေသည်ဆိုသည်ကို မိမိအနေဖြင့် လက်ခံပါကြောင်း၊ အားနည်းသည့်အတွက်လည်း လွှတ်တော်ဘဏ်များနှင့် ငွေကြေးဆိုင်ရာ ကော်မတီနှင့် နှစ်ကြိမ်ခန့်ဆွေးနွေးမှု ပြီးခဲ့ပြီးဖြစ်ပါကြောင်း၊ ယခုအချိန်တွင် နိုင်ငံခြားငွေကြေး စီမံခန့်ခွဲမှုဥပဒေ (Foreign Exchange Management Law) ကို ပြင်ဆင်ရန်အတွက် ကော်မတီဖွဲ့ထားပြီး ဆောင်ရွက်နေခြင်း ရှိပါကြောင်း၊ ဆောင်ရွက်ပြီးလျှင် လွှတ်တော်ကို တချို့သော ပြင်ဆင်မှုများ လုပ်ရန်အတွက် တင်ပြသွားမည် ဖြစ်ပါကြောင်း၊ အဓိကအားဖြင့် တွေ့ရှိသည့်အချက်က ဥပဒေတွင် ဒဏ်ကြေး သို့မဟုတ် ထောင်ဒဏ်က အလွန်နိမ့်ပြီး ဒဏ်ကြေးဖြစ်ပါကြောင်း၊ အများဆုံးသုံးလနှင့် သို့မဟုတ်ရင် ဒဏ်ကြေးဆိုသည့်အခါ ထောင်ဒဏ်လား၊ ဒဏ်ကြေးပေးလျှင် ပြန်လွှတ်ရမည့် အနေအထားမျိုး ဖြစ်နေပါကြောင်း၊ မိမိအနေဖြင့် ၎င်းကိုပြင်ဆင်ပြီး လိုအပ်သည့် အချက်များကို မကြာခင် လွှတ်တော်တွင် လာတင်ပြရန် ရှိပါသည်ဆိုသည့် အကြောင်း တင်ပြပါသည်။

နောက်တစ်ခုက ပြည်ပကိုတရားဝင် ငွေလွှဲတာခြင်းနှင့်ပတ်သက်ပြီး အဓိကတွေ့ရှိရသည့် အချက်များက ကုန်သွယ်မှုနှင့်ဆိုင်သည့် အချက်များဖြစ်ပါကြောင်း၊ ကုန်သွယ်မှုနှင့်ဆိုင်သည့် ကိစ္စတွင် အဓိကက ကုန်သွယ်ရောင်းဝယ်သည့် ငွေ၏တန်ဖိုးကို ပစ္စည်းသွင်းခြင်းဖြစ်စေ၊ ထုတ်ခြင်းဖြစ်စေ ပိုပြခြင်း၊ လျှော့ပြခြင်းလုပ်ပြီး လိုသည့်ပိုသည့်ငွေကို နောက်ကနေပြီး ငွေလွှဲနည်းဖြင့် လိုက်ရှင်းကြလေ့ ရှိပါကြောင်း၊ ထို့အတွက်ကြောင့် ကုန်သွယ်ရေးဝန်ကြီးဌာန၊ စီမံဘဏ္ဍာဝန်ကြီးဌာနနှင့် မြန်မာနိုင်ငံတော် ဗဟိုဘဏ်တို့ သုံးပွင့်ဆိုင်ဆွေးနွေးသည့် အစည်းအဝေးရှိပါကြောင်း၊ ပုံမှန်အစည်းအဝေးလည်း ရှိပါကြောင်း၊ ထိုအစည်းအဝေးများတွင် တင်ပြပြီး ဆွေးနွေးနေခြင်း ဖြစ်ပါကြောင်း၊ ဆွေးနွေးပြီး မကြာခင် ၎င်းကိုလည်းပိုပြီး အကောက်ခွန်တွင်ရှိသည့် စာရင်းသွင်းသည့် စနစ်ကိုလည်း စနစ်တကျထိရောက်အောင်လုပ်ပြီး တရားမဝင်ငွေလွှဲသည့် ကိစ္စများ၊ သွင်းကုန် ထုတ်ကုန်များတွင် စာရင်းပိုပြခြင်းများ၊ လျှော့ပြခြင်းများ ထိထိရောက်ရောက် အရေးယူဆောင်ရွက် နိုင်ရန်အတွက်လည်း အကောက်အခွန်ဌာနနှင့် ပူးပေါင်းပြီးစီစဉ်နေခြင်း ဖြစ်ပါကြောင်း၊

ယခုလို တရားမဝင်လုပ်ငန်းများ လုပ်နေသည့်အတွက် နိုင်ငံတော်အနေဖြင့် အခွန်များ ဆုံးရှုံးမှုရှိခဲ့သဖြင့် အဆိုပါ တရားမဝင်ငွေလွှဲ လုပ်ငန်းများက မသမာမှုပြုခြင်း၊ တိမ်းရှောင်မှု ပြုခြင်းများဆိုသည့် အခြေအနေများဖြစ်ပြီး ပြည်သူလူထုက ဆုံးရှုံးမှုများ ဖြစ်နိုင်ပါကြောင်း၊ အဆိုပါ ငွေလွှဲလုပ်ငန်း ခွင့်ပြုသည့်အခါ ငွေလွှဲသူများကနေပြီး ငွေများစုပြီးသည့်အခါ ပျောက်သွားခြင်းမျိုး မဖြစ်ရလေအောင် အဆိုပါနေရာ Security Deposit ခေါ် အာမခံငွေထားရှိခြင်းကိုလည်း ထည့်သွင်းထားပါကြောင်း၊ ၎င်းအာမခံငွေကိုလည်း လိုအပ်သလို အဆိုပါ လုပ်ငန်းပမာဏ ကြီးလာတာနှင့်အမျှ တိုးမြှင့်သွားနိုင်ရန်အတွက် အစီအစဉ်များလုပ်ထားပြီး ဖြစ်ပါကြောင်း၊ ထို့ကြောင့် စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန၊ စီမံကိန်းနှင့်ဘဏ္ဍာရေး ဝန်ကြီးဌာနနှင့် မြန်မာနိုင်ငံတော် ဗဟိုဘဏ်တို့ပူးပေါင်းပြီး ဆောင်ရွက်ခြင်းအားဖြင့် ပြည်ပသို့ တရားမဝင်ငွေကြေး လွှဲပြောင်းမှုများ လျော့နည်းပပျောက်သွားမည် ဖြစ်ပါကြောင်း ရှင်းလင်းဖြေကြားပါသည်။

ဒေါ်နန်းမိုး (မန်တုံမဲဆန္ဒနယ်) က ဆက်စပ်မေးခွန်း မေးမြန်းပါသည်။

ယခု ဗဟိုဘဏ်ကနေပြီး Hundi ကိစ္စနှင့်ပတ်သက်ပြီး အဓိကဆက်စပ်မေးခွန်း မေးချင်သည်မှာ Hundi ဆိုပြီး လူအများအသုံးပြုနေသည့် တရားမဝင်ငွေလွှဲဖြတ်ပိုင်း ဝန်ဆောင်မှု လုပ်ငန်းကို အနော်ရထာလမ်း ရန်ကုန်တွင်အများဆုံး ဖြစ်နေသည်ကို အမြန်ဆုံးကိုင်တွယ် ဖြေရှင်းရန် လိုအပ်လျက်ရှိပါကြောင်း၊ ထို့ကြောင့် ဗဟိုဘဏ်အနေဖြင့် ငွေကြေးခဝါချအနေနှင့် ပူးပေါင်းပြီး မည်ကဲ့သို့ မူဝါဒများချမှတ်ပြီး အမြန်ဆုံးပြဋ္ဌာန်းထားသည့် တည်ဆဲဥပဒေနှင့်အညီ အမြန်ဆုံးအရေးယူ ဆောင်ရွက်မည်ကို သိရှိလိုခြင်းဖြစ်သည့်အတွက် ဆက်စပ်မေးခွန်း မေးမြန်းရခြင်းဖြစ်ပါသည်။

မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌ ဦးဘိုဘိုငယ်

မိမိတင်ပြသွားသည့် အချက်တွင် ၂၀၁၉ ခုနှစ်၊ ဇန်နဝါရီလအတွင်း ရေးဆွဲခဲ့သည့် ကိစ္စက Hundi လုပ်ငန်းများကို တရားဝင်ဖြစ်လာအောင်၊ မွေပေါ်ရောက်လာ အောင်လုပ်ရန် လုပ်ငန်းဖြစ်ပါကြောင်း၊ မိမိတို့ စင်္ကာပူရောက်သည့်အခါ ပင်နီဆူလာပလာဇာတွင် လက်ဖက်သုပ်ဆိုင်များကဲ့သို့ မြန်မာကုမ္ပဏီများ ရပ်တည်ပြီး Hundi လုပ်ငန်း လုပ်နေရသည့် လူများရှိပါကြောင်း၊ အဆိုပါ မြန်မာကုမ္ပဏီများက ပွင့်ပွင့်လင်းလင်းမေးမြန်းသည့်အခါ လိုင်စင်လိုချင်သည့်အကြောင်းနှင့် မြို့ထဲတွင် တရားဝင်လုပ်ချင်သည့်အကြောင်း တင်ပြကြပါသည်။ မိမိတို့က တစ်ချိန်တည်း ဆက်စပ်ပြီး စင်္ကာပူနိုင်ငံ၏ ဗဟိုဘဏ်ဖြစ်သည့် Monetary Authority Service of Singapore တွင် သွားပြီး ဆွေးနွေးပါကြောင်း၊ ဆွေးနွေးသည့်အခါ အဓိကနှစ်ချက်ဆွေးနွေးခဲ့ပါကြောင်း၊ (၁) Hundi လုပ်ငန်းများအနေဖြင့် တရားဝင်လုပ် ပေးမည်ဆိုလျှင် စင်္ကာပူက မည်ကဲ့သို့ ကန့်သတ်ချက်များ ရှိပါသနည်း၊ စင်္ကာပူဗဟိုဘဏ်က ဆွေးနွေးသည့်အချက်က ၎င်းတို့အနေဖြင့် ဖီလစ်ပိုင်နိုင်ငံ၊ အင်ဒိုနီးရှားနိုင်ငံ၊ ထိုင်းနိုင်ငံဆိုသည့် နိုင်ငံများတွင် ငွေလွှဲသည့် လုပ်ငန်းများကို တရားဝင်လိုင်စင် ပေးထားခြင်း ရှိပါကြောင်း၊ သို့သော် မြန်မာနိုင်ငံဘက်က တရားဝင်လာလျှောက်ခြင်း မရှိသည့် အတွက်ကြောင့် အဆိုပါ လုပ်ငန်းများကို ပြန်မေးသည့်အခါ လုပ်ငန်းများ၏ ပြန်ဖြေသည့်အချက်က စင်္ကာပူနိုင်ငံသားများကိုယ်တိုင် အနည်းဆုံးနှစ်ဦးပါရမည်ဆိုသည့် စည်းကမ်းချက်များ ရှိပါကြောင်း၊ ထို့ကြောင့် မိမိတို့ မလျှောက်ထားခြင်းဖြစ်ပါသည်ဟု ပြောပါကြောင်း၊ မိမိတို့ဘက်မှ ထိုကဲ့သို့ အခက်အခဲများရှိသည်ဟု စင်္ကာပူဗဟိုဘဏ်အား ပြောကြားခဲ့ပါကြောင်း၊ မိမိတို့ဘက်က တရားဝင် လုပ်ပေးမည်ဆိုလျှင် စင်္ကာပူဗဟိုဘဏ်က လျှော့ပေးနိုင်မည်လားဟုမေးသည့်အခါ စင်္ကာပူဗဟိုဘဏ်က မြန်မာပြည်အတွက်ဆို လျှော့ပေးမည်ဟု ပြောပါကြောင်း၊ အဆိုပါကဲ့သို့လည်း ထိုင်းနိုင်ငံနှင့်လည်း ဆွေးနွေးခဲ့ခြင်းရှိပါကြောင်း၊ သို့သော် ထိုင်းဘက်က ပြတ်ပြတ်သားသား အခြေအနေ မပြောနိုင်ပါကြောင်း၊ မိမိတို့အနေဖြင့်ဆက်ပြီး Financial Action Task Force စနစ်ဖြင့် ဆွေးနွေးသည့်အခါ အဆိုပါ ငွေလွှဲလုပ်ငန်းများကို မြေပေါ်တရားဝင် ရောက်လာအောင် အစီအစဉ်များ လုပ်ခဲ့ပါကြောင်း၊ ထိုအခါ တစ်ခုသတိပြုစေချင်သည့် အချက်က မိမိတို့ အမေရိကန်နိုင်ငံ ဘဏ္ဍာရေးဝန်ကြီးဌာနက လက်ထောက်အတွင်းဝန်နှင့် တွေ့သည့်အခါ အမေရိကန်နိုင်ငံတွင် တရားဝင်လုပ်နေသည့် နိုင်ငံလုပ်ငန်းပေါင်း ၂၅၀၀၀ ရှိပါကြောင်း၊ ၎င်းတို့ကို အရေးမယူနိုင်ပါကြောင်း၊ ထို့ကြောင့် Hundi လုပ်ငန်းလုပ်သည့်အခါ လိုင်စင်ပေးလိုက်လျှင် အကုန်လုံးမြေပေါ် ရောက်လာမည်ဟု မျှော်လင်‌့၍မရပါကြောင်း၊ မည်သည့်နိုင်ငံမှလည်း မျှော်လင့်၍ မရနိုင်ပါကြောင်း၊ အဓိကအားဖြင့် ရည်ရွယ်ချက်က အဆိုပါလုပ်ငန်းများကို တရားဝင်ခွင်‌့ပြုလိုက်ခြင်းအားဖြင်‌့ မြေပေါ် ရောက်သင့်သလောက်လာမည်၊ မြင်သင်‌့သလောက်မြင်ရမည်၊ မိမိတို့အမြင်ဖြင့် မျှော်လင့်သည်မှာ ယခုချိန်တွင် မိမိတို့ကို စုံစမ်းမေးမြန်းမှုများ ရှိနေပါကြောင်း၊ ထို့ကြောင့် လိုင်စင်ကို မည်သည့်အချိန်တွင် ပေးမည်နည်း၊ မိမိအနေဖြင့် အတော်အတန် ရောက်လာမည်ဟု မျှော်လင့်ပါကြောင်း၊ ထို့ကြောင့် စနစ်တကျကြီးကြပ်ပြီး လုပ်သွားနိုင်ရန် အစီအစဉ်ရှိပါကြောင်း၊ ယခုဆိုလျှင် အပြီးသတ်ရေးဆွဲထားသည့် စည်းမျဉ်းတွင် အစီအစဉ်များ အတိအကျပါပါကြောင်း၊ ထို့ကြောင့် ဆက်လက်ပြီး သက်ဆိုင်ရာကော်မတီနှင့် နိုင်ငံတော်သမ္မတရုံးကို တင်ပြထားဆဲဖြစ်ပြီး ရှေ့နေချုပ်ရုံးနှင်‌့ ဆွေးနွေးပြီး အတည်ပြုချက်ရသည့်အခါတွင် ဆက်ထုတ်သွားမည် ဖြစ်ပါကြောင်း၊

Hundi နှင့် ပတ်သက်၍ သတိထားပြီး ကိုင်တွယ်ဆောင်ရွက် လျက်ရှိပါကြောင်း၊ Hundi လုပ်ငန်းသည် အဓိကအားဖြင့် သတိထားရမည့် အချက်သည် တရားဝင်ငွေလွှဲသည့် လုပ်ငန်းများကို ငွေကြေးခဝါချမှု ဖြစ်လာနိုင်ပါကြောင်း၊ နောက်တစ်ချက် အကြမ်းဖက်မှု ထောက်ပံ့သည့် အစီအစဉ်တစ်ခုကို အသုံးချသည့် သူများဖြစ်လာနိုင်ပါကြောင်း၊ ထို့ကြောင့် ၎င်းကိစ္စများကို မည်ကဲ့သို့ ကာကွယ်မည်နည်း၊ မည်ကဲ့သို့တားဆီးမည်နည်း၊ အကယ်၍ မသင်ကာဖွယ်အချက်အလက် Suspicious Transaction Report နောက်တစ်ခါ Suspicious Activity Report များတွေ့လျှင် မည်ကဲ့သို့ သတင်းပို့ရမည်၊ ဘယ်နှစ်နာရီအတွင်း သတင်းပို့ရမည်ဆိုသည်ကို အတိအကျ ဆွေးနွေးထားပါကြောင်း၊ အဆိုပါ စည်းမျဉ်းတွင်လည်း ထုတ်ပြန်ရန် ရှိပါကြောင်း၊ ထုတ်ပြန်ပြီးသည့်အခါ ဆက်လက်ပြီး မည်ကဲ့သို့ အကောင်အထည် ဖော်မည်ဆိုသည်ကိုလည်း အစီအစဉ်ရှိပါကြောင်း၊ လွှတ်တော်ကိုယ်စားလှယ်ကြီး ဆွေးနွေးသွားသည့် အချက်က Foreign Exchange Management Law တွင် တကယ်လက်တွေ့ မြေပြင်တွင် ထိရောက်မှုအားနည်းသည်ဆိုသည်မှာ မိမိတို့ လက်ခံပါကြောင်း၊ ၎င်းကိုလည်း ပြင်ဆင်ရန်အချိန်မီ ထိရောက်အောင်လုပ်ရန် အနော်ရထာလမ်း တစ်လျှောက်တွင်ရှိသည့် လေပတ်ကား၊ ရွှေပတ်ကား လုပ်နေသည့် အလုပ်များထိထိရောက်ရောက် အရေးယူနိုင်ရန်ဆိုသည့် အချက်များက နိုင်ငံခြားငွေကြေး စီမံခန့်ခွဲမှုဥပဒေကို ပြုပြင်မှရပါမည် ထို့အတွက် မိမိတို့အနေဖြင့် ဆောင်ရွက်လျက်ရှိကြောင်း  ရှင်းလင်းဖြေကြားပါသည်။

 

မြန်မာနိုင်ငံတော်ဗဟိုဘဏ်၊ ဒုတိယဥက္ကဋ္ဌ ဦးဘိုဘိုငယ်