Skip to main content

 

ချီဖွေ-ပန်ဝါလမ်း(၄)မိုင်စခန်းမှ တောင်သုံးလုံး/မဲ့လိမ်ကော့စုစည်း-လန်းယန်းလမ်းပိုင်း မိုင်(၂၀)ခန့်အား အများပြည်သူများနှင်‌့ ဌာနဆိုင်ရာဝန်ထမ်းများ အဆင်ပြေချောမွေ့စွာ ရာသီမရွေးသွားလာနိုင်သော ကျောက်ချောလမ်းအဆင်‌့ ပြုပြင်ဆောင်ရွက်ပေးရန် အစီအစဉ် ရှိ/မရှိနှင်‌့ စပ်လျဉ်းသည့်မေးခွန်း

ဆော့လော်မြို့နယ်သည် ကချင်ပြည်နယ်၊ မြစ်ကြီးနားခရိုင်တွင်ပါဝင်သည်‌့ ချီဖွေမြို့နယ်၊ အင်ဂျန်းယန်မြို့နယ်၊ ခေါင်လန်းဖူးမြို့နယ်၊ တရုတ် ပြည်သူ့သမ္မတနိုင်ငံတို့နှင်‌့ နယ်နိမိတ် ထိစပ်လျက်ရှိသည်‌့ ဝေးလံခက်ခဲသော တောင်ပေါ်မြို့ တစ်မြို့ဖြစ်ပါကြောင်း၊ ဆော့လော် မြို့နယ်သို့ သွားလာမည်ဆိုပါက ချီဖွေမြို့နယ်- တောင်သုံးလုံး-စုစည်း-လန်းယန်လမ်း တစ်လမ်း အဖြစ်သာ ဆက်သွယ်သွားလာနိုင်ပြီး နယ်နိမိတ်ထိစပ်နေသော တခြားမြို့နယ်များမှ ဆက်သွယ် သွားလာနိုင်ခြင်းမရှိပါကြောင်း၊ ဆော့လော်မြို့နယ်တစ်ခုလုံးမှ မိဘ ပြည်သူများသည် တောင်သုံးလုံး- စုစည်းလမ်းတစ်ခုကိုသာ အသက်သွေးကြောလမ်းအဖြစ် ဆက်သွယ်သွားလာ နေကြရခြင်းဖြစ်ပါကြောင်း၊ သို့သော် မိုးတွင်းကာလ၌ နှစ်စဉ်နှစ်တိုင်းမြေပြိုကျပြီး လမ်းပိတ်ဆို့နေ သည့်အတွက် ဆက်သွယ်သွားလာ၍ မရဘဲ အိမ်နီးချင်းနိုင်ငံဖြစ်သည်‌့ တရုတ်ပြည်မှ တစ်ဆင်‌့ ခက်ခက်ခဲခဲဝင်/ထွက်သွားလာနေကြရပါကြောင်း၊ ပညာရေးနှင့်ပတ်သက်ပြီး ဆရာဆရာမများ အနေဖြင့်လည်း တောင်သုံးလုံး-စုစည်းလမ်း မြေပြို၊ လမ်းပိတ်ဆို့နေမှုများကြောင်‌့  မိမိတို့စာသင်ချိန်ထက် တစ်လ၊ နှစ်လနောက်ကျပြီးမှသာ ရောက်ရှိလျက်ရှိပါကြောင်း၊ အိမ်နီးချင်း တရုတ်နိုင်ငံမှ သွားလာမည်ဆိုပါကလည်း ဝင်/ထွက်သွားလာခွင့်စာများ ပြုလုပ်ရသည့်အတွက် အချိန်ကုန် လူပင်ပန်းခြင်း၊ ငွေကြေးများစွာ ကုန်ကျခံနေရခြင်းစသည်‌့ အခက်အခဲများစွာ ရှိနေပါကြောင်း၊ ထို့အပြင် ပွင့်လင်းရာသီရောက်ပါက တောင်တက်လမ်းအရှည်၊ တောင်ဆင်းလမ်း အရှည်၊ ဂကွေ့လမ်းကျဉ်းကလေးသာဖြစ်သည်‌့အတွက် ခရီးသွားလာနေကြသည်‌့ ပြည်သူ လူထု များ၏ ကား၊ ဆိုင်ကယ်တို့မှာ  အင်ဂျင်လောင်ကျွမ်းပျက်စီးခြင်းများ အမြဲတမ်း ကြုံတွေ့ခံစား နေကြရပြီး အလွန်အန္တရာယ်များသည့် အနေအထားကိုတွေ့မြင်ရပါကြောင်း၊  ချီဖွေ-လန်းယန် လမ်းခက်ခဲကြမ်းတမ်းမှုများကြောင်‌့ ချီဖွေမြို့နယ်နှင်‌့ ဆော့လော်မြို့နယ်တို့သည် ဖွံ့ဖြိုးတိုးတက် လာမှုမရှိဘဲ မြို့နယ်၏ ပညာရေး၊ ကျန်းမာရေး၊ စီးပွားရေးနှင်‌့ အခြားလူမှုဘဝများစွာ နိမ့်ကျခက်ခဲမှု ကြုံတွေ့နေကြရပါကြောင်း၊

 ချီဖွေမြို့နယ်နှင်‌့ဆော့လော်မြို့နယ်တို့သည် နိုင်ငံတော်အစိုးရ၊ တပ်မတော်နှင်‌့ငြိမ်းချမ်းရ ယူထား သည်‌့ ဒေသများဖြစ်သည်‌့အပြင် ထာဝရငြိမ်းချမ်းရေးနှင်‌့ ဒေသဖွံ့ဖြိုးရေးလုပ်ငန်းများကို အခြား မြို့နယ်များထက် အစဉ်တစိုက်ကြိုးပမ်းဆောင်ရွက်ပေးရန် လိုအပ်နေသည်‌့ဒေသဖြစ်သော်လည်း ၂၀၁၈-၂၀၁၉ ဘဏ္ဍာရေးနှစ်တွင် နယ်စပ်ဒေသနှင်‌့ တိုင်းရင်းသားလူမျိုးများဖွံ့ဖြိုးတိုးတက်ရေး ဦးစီးဌာနမှ စီမံကိန်းလုပ်ငန်းများ လျာထားဆောင်ရွက်ပေးခြင်းများမရှိသည်ကို ဝမ်းနည်းဖွယ် တွေ့မြင်ရပါကြောင်း၊ နယ်စပ်ဒေသနှင်‌့ တိုင်းရင်းသားလူမျိုးများဖွံ့ဖြိုးတိုးတက်ရေး ဦးစီးဌာန အနေဖြင်‌့ တိုင်းရင်းသားလူမျိုးများ အများစုနေထိုင်ရာ နယ်စပ်ဒေသများတွင် ဝန်ကြီးဌာန၏ ရည်ရွယ်ချက်၊ မူဝါဒများနှင်‌့အညီ ချီဖွေ-လန်းယန်လမ်းအား ရာသီမရွေးဆက်သွယ်သွားလာနိုင် စေရန် ကျောက်ချောလမ်းအဖြစ် ဆောင်ရွက်ပေးမည်ဆိုပါက အများပြည်သူများ အစိုးရဌာန ဆိုင်ရာများအတွက် များစွာအကျိုးကျေးဇူးရရှိနိုင်မည် ဖြစ်ပါကြောင်း၊

သို့ဖြစ်ပါ၍ ချီဖွေ-ပါဝါ(၄)မိုင်စခန်းမှ တောင်သုံးလုံး-မဲ့လိမ်ကော့-စုစည်း-လန်းယန်လမ်းပိုင်း မိုင် ၂၀ အား အများပြည်သူများနှင်‌့ ဌာနဆိုင်ရာဝန်ထမ်းများ အဆင်ပြေချောမွေ့စွာ ရာသီမရွေးသွားလာ နိုင်သော ကျောက်ချောလမ်းအဆင်‌့ ပြုပြင်ဆောင်ရွက်ပေးနိုင်ခြင်းရှိ/မရှိနှင်‌့ ဆောင်ရွက်ပေးမည် ဆိုပါက မည်သည့်အချိန်တွင် ဆောင်ရွက်ပေးနိုင်မည် သို့မဟုတ် ဆောင်ရွက်ပေးနိုင်ခြင်းမရှိပါက မည်သည့်အတွက်ကြောင့် ဆောင်ရွက်ပေးနိုင်ခြင်းမရှိသည်ကို သိလိုပါကြောင်း မေးမြန်းပါသည်။


 

နယ်စပ်ရေးရာဝန်ကြီးဌာနအနေဖြင့် နယ်စပ်ဒေသများဖွံ့ဖြိုးရေးအတွက် ကချင်ပြည်နယ်အတွင်း လမ်းပန်းဆက်သွယ်မှုခက်ခဲသည့်ဒေသများဖြစ်သော ပူတာအိုခရိုင်အတွင်းရှိ ပန်နန်းဒင် မြောက်ခြမ်း ဂူဘားဒေသ၊ ခေါင်လန်ဖူးဒေသ၊ လန်ဆယ်-လကင်ဒေသများသို့ ဆက်သွယ်သည့် လမ်းကြောင်းများကို နှစ်တို၊ နှစ်ရှည်စီမံကိန်းများဖြင်‌့ ဦးစားပေးအစီအစဉ်အရ ရန်ပုံငွေရရှိမှု အပေါ်မူတည်ပြီး အကောင်အထည်ဖော်ဆောင်ရွက်ပေးလျက်ရှိရာ ချီဖွေ-ဖိမော် လမ်း၊ ချီဖွေ-ဆော့လော်လမ်းများသည် အဆိုပါစီမံကိန်းများတွင် ပါဝင်ဆောင်ရွက်ပေးရမည့် လမ်းပိုင်းများဖြစ်ပါကြောင်း၊

ချီဖွေ-ပန်ဝါလမ်း(၄)မိုင်စခန်းမှ စုစည်း-တောင်သုံးလုံး- မဲ့လိမ်ကော့-လန်းယန်လမ်းပိုင်းသည် မြို့နယ်၂ မြို့နယ်၊ ကျေးရွာအုပ်စု ၃၇ အုပ်စု၊ ကျေးရွာ ၁၇၈ ရွာ၊ အိမ်ခြေ ၁၉၆၉ လုံးနှင်‌့ လူဦးရေ ၂၁၂၂၉ ဦးတို့အား အကျိုးပြုသည်ကိုလည်း သိရှိရပါကြောင်း၊

လျာထားဆောင်ရွက်ရမည့်လုပ်ငန်းများအား ဒေသမှ အသေးစိတ်ကွင်းဆင်းလေ့လာ တင်ပြချက် အရ လေးမိုင်တပ်စခန်းမှ စုစည်း-တောင်သုံးလုံး-လန်းယန် ၂၄ မိုင်လမ်းသည်  ချီဖွေ-ဆော့လော် ၅၂ မိုင်၊ မြို့ချင်းဆက်လမ်းနှင်‌့ ချီဖွေမြို့နယ်၊ ချီဖွေ-ဖီမော် ၆၀ မိုင်လမ်းပေါ်တွင် တည်ရှိပါကြောင်း၊ ယခင်က ချီဖွေမြို့နယ်မှ ဆော့လော်မြို့နယ်သို့ ဆက်သွယ်သွားလာရာတွင် မေခမြစ် အတိုင်းဖောက်လုပ်ထားသည် ၃၄ မိုင်လမ်းကို အသုံးပြုခဲ့ရသော်လည်း ၂၀၁၂ ခုနှစ် ဇွန်လမှ စတင်ကာ နယ်မြေတည်ငြိမ်အေးချမ်းမှုအားနည်းလာခြင်း၊ တိုက်ပွဲများပြန်လည်ဖြစ်ပွား လာခြင်း တို့ကြောင်‌့ စားနပ်ရိက္ခာ၊ ဆေးဝါး၊ ကျောင်းအသုံးအဆောင်ပစ္စည်းများ ထောက်ပံ့ပို့ဆောင်ရန်၊ အစိုးရဝန်ထမ်းများနှင်‌့ ပြည်သူများသွားလာရန်အတွက် ပန်ဝါဌာနေပြည်သူ့စစ်အဖွဲ့မှ စစ်ရှောင်လမ်းအဖြစ် ၂၄ မိုင်အနက် မိုင် ၂၀ ကို ၂၀၁၃-၂၀၁၄ ဘဏ္ဍာရေးနှစ်မှာ မြေသားလမ်းအဖြစ်လည်းကောင်း၊ ကျန် ၁၉ မိုင်ကို ၂၀၁၄-၂၀၁၅ ဘဏ္ဍာရေးနှစ်တွင် ကျောက်ချောလမ်းအဖြစ် လည်းကောင်း ဆောင်ရွက်ခဲ့ပါကြောင်း၊ သို့သော် မိမိတို့ ဆောင်ရွက်မှုအနေဖြင့် လမ်းအကျယ်သည် ၁၃ ပေသာရှိသည့်အတွက် ကားနှစ်စီးရှောင်ကွင်းရန် ခက်ခဲပြီး  မိုးတွင်းကာလများတွင် မြေပြို၊ တောင်ပြိုမှုများကြောင့် လမ်းများ မကြာခဏ ပိတ်ဆို့လျက်ရှိသည်ကိုလည်း တွေ့ရှိရပါကြောင်း၊

အဆိုပါ တောင်သုံးလုံး-မဲ့လိမ်ကော့-စုစည်း-လန်းယန်အထိ ၂၄ မိုင် လမ်းအနက် ချီဖွေ-ပန်ဝါလမ်း(၄)မိုင်သည် ကျောက်တောင်များရှိပြီး မိုင် ၂၀ သည် မြေသားတောင်များ ဖြစ်ပါကြောင်း၊  ဒေသခံပြည်သူများ၏ တင်ပြချက်အရ အဆိုပါလမ်းများ အတွက် ၂၀၁၇-၂၀၁၈ ဘဏ္ဍာရေးနှစ်တွင် နယ်စပ်ဒေသဖွံ့ဖြိုးရေးရန်ပုံငွေဖြင်‌့ မိုင်တိုင်အမှတ် (၁၂/၄) မှ (၁၅/ဝ)မိုင်အထိ နှစ်မိုင် လေးဖာလုံအား ကျောက်တောင်မိုင်းခွဲခြင်း၊ လမ်းချဲ့ခြင်းလုပ်ငန်းနှင့် ၃ မိုင်အား ၂၄ ပေအကျယ် လမ်းချဲ့ခြင်းလုပ်ငန်း များဆောင်ရွက်ပေးခဲ့ပြီးဖြစ်ရာ တစ်မိုင် လေးဖာလုံအတွက် ကျောက်တောင် ဖယ်ရှားရန် ၁၇ မိုင်အား ၂၄ ပေ အကျယ် လမ်းတာချဲ့ရန် ကျန်ရှိပါကြောင်း၊ ယခုမေးခွန်းနှင်‌့ ပတ်သက်၍ ကချင်ပြည်နယ်အစိုးရအဖွဲ့အနေဖြင့် နယ်စပ်ဒေသ ဖွံ့ဖြိုးရေး ၅ နှစ် စီမံကိန်းတွင် လျာထားလာမည်ဆိုပါက ဦးစားပေးအစီအစဉ်ဖြင့် ၂၀၁၉-၂၀၂၀ ဘဏ္ဍာရေးနှစ်မှ စတင်ပြီး အဆိုပြုလျာထားဆောင်ရွက်ပေးမည်ဖြစ်ပါကြောင်း ပြန်လည်ဖြေကြားပါသည်။

 

နယ်စပ်ရေးရာဝန်ကြီးဌာန၊ ဒုတိယဝန်ကြီး ဗိုလ်ချုပ်သန်းထွဋ်