Skip to main content

 

ရခိုင်ပြည်နယ်တွင် ဘင်္ဂါလီလူမျိုးများ ကမန်လူမျိုးအမည်ခံကာ မြန်မာနိုင်ငံသားစိစစ်ရေးကတ် ထုတ်ပေးနေခြင်းကို ပြန်လည်စိစစ်ပေးရန်နှင့် အမျိုးသားမှတ်ပုံတင်နှင့် နိုင်ငံသားဦးစီးဌာန၏ (၂၅-၁-၂၀၁၇) ရက်စွဲပါစာအမှတ် ၁၀၂/မ-၆(နငသ-၄)၀၅၈၄/အမတအရ နောက်ကြောင်းပြန်စိစစ်ခြင်း မပြု(မပြု)ရန် အမိန့်ညွှန်ကြားစာအား ရုပ်သိမ်းပေးရန် အစီအစဉ်ရှိ/မရှိတို့နှင့် စပ်လျဉ်းသည့်မေးခွန်း

မြန်မာနိုင်ငံသည် ကမ္ဘာ့လူဦးရေသိပ်သည်း အများပြားဆုံးဖြစ်သော နိုင်ငံများနှင့် နယ်နိမိတ်ချင်း ထိစပ်နေသော နိုင်ငံတစ်ခုဖြစ်ပါကြောင်း၊ လူဝင်မှု ကြီးကြပ်ရေးဆိုင်ရာနှင့် လူဦးရေဆိုင်ရာဥပဒေများ၊ စည်းမျဉ်းစည်းကမ်းများကို ထိန်းသိမ်း စောင့်ရှောက်လိုက်နာရန် အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ အဓိကလုပ်ငန်းတာဝန်တစ်ရပ် ဖြစ်သည့်အတွက်ကြောင်‌့ “မြေမြို၍ လူမျိုးမပျောက်၊ လူမြိုမှလူမျိုးပျောက်မည်” ဟူသော ဆောင်ပုဒ်ကို အသုံးပြုရခြင်းဖြစ်ပါကြောင်း၊ ရခိုင်ပြည်နယ်အတွင်း ဘင်္ဂါလီလူမျိုးများ ဘာသာတူကမန်လူမျိုးများ အမည်ခံကာ မြန်မာနိုင်ငံသား စိစစ်ရေးကတ်ပြားများ ရယူနေသောကြောင့် ကွဲကွာမှုများ ပြင်းထန်စွာ ဖြစ်ပေါ်နေရခြင်းဖြစ်ကြောင်း၊ ကမန်လူမျိုးများသည် ဘင်္ဂါလီများနှင့် ကိုးကွယ်ရာဘာသာတူရာမှတစ်ပါး အခြားယဉ်ကျေးမှု၊ ဓလေ့ထုံးစံ၊ ဘာသာစကား၊ လူနေမှုစရိုက်များမတူသည့် ရခိုင်တိုင်းရင်းသား မျိုးနွယ်စုဝင် စာရင်းတွင် ထည့်သွင်းထားခြင်းခံရသူများ ဖြစ်ပါကြောင်း၊

ဘင်္ဂါလီများ နိုင်ငံသားစိစစ်ရေးကတ်ရယူလိုမှုကြောင့် ကမန်များအဖြစ် အယောင်ဆောင်ပြီး နည်းမျိုးစုံသုံးလာကြရာ ယခုအခါ ကမန်လူမျိုးအစစ်များ တဖြည်းဖြည်းပျောက်ကွယ်လာမည့် အန္တရာယ်နှင့် ရင်ဆိုင်ကြုံတွေ့နေရကြောင်း၊ ကမန်လူမျိုးအစစ်များ ပြောကြားချက်အရ ရမ်းဗြဲမြို့နယ်တွင် ကမန်လူဦးရေ ရာဂဏန်းခန့်သာရှိကြောင်း၊ ယခုအခါ ရမ်းဗြဲမြို့နယ်၊ ကျောက်နီမော် ကျေးရွာမှ ဘင်္ဂါလီ ၃၀၀၀ ကျော်ကို ကမန်အဖြစ် နိုင်ငံသားစိစစ်ရေးကတ်ပြားများ ထုတ်ပေးနေခြင်းကို ဒေသခံကမန်လူမျိုးများနှင့် ရခိုင်လူမျိုးများက စိုးရိမ်ကြီးစွာဖြင့် ကန့်ကွက်မှုများကို ပြင်းထန်စွာပြုလုပ်လျက်ရှိပါကြောင်း၊ ထို့ကြောင့် နိုင်ငံတော်လုံခြုံရေး၊ တရားဥပဒေစိုးမိုးရေးနှင့် ဒေသတည်ငြိမ်အေးချမ်းရေး၊ တိုင်းရင်းသားအချင်းချင်း ယုံကြည်မှုရရှိစေရေး၊ နိုင်ငံတော်အစိုးရနှင့် ပြည်သူလူထုအကြား ယုံကြည်မှုရရှိစေရေးတို့ကို ကြည့်ရှု၍ ဆောင်ရွက်သင့်ကြောင်း၊

ကမန်အမျိုးသား တိုးတက်ရေးပါတီဗဟိုက ရခိုင်ပြည်နယ်၊ ရမ်းဗြဲမြို့နယ်၊ ကျောက်နီမော်ကျေးရွာမှ အစ္စလာန်ဘာသာ ကိုးကွယ်သူ ဘင်္ဂါလီများကို ကမန်အဖြစ်အသုံးပြုရန် နိုင်ငံသားစိစစ်ရေးကတ်ပြားများ ထုတ်ပေးနေခြင်းအပေါ် ပြန်လည်စိစစ်ပေးပါရန် နိုင်ငံတော်သမ္မတထံ တင်ပြခဲ့ကြောင်း၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ အမျိုးသားမှတ်ပုံတင်နှင့် နိုင်ငံသားဦးစီးဌာနမှ ထုတ်ပြန်ထားသည့် ၂၅-၁-၂၀၁၇ ရက်စွဲပါ စာအမှတ်(၁၀၂/မ၆ နငသ(၄)၀၅၈၄/အမတ) အရ “နောက်ကြောင်းပြန် စစ်ဆေးခြင်းမပြုလုပ်ရ” ဟု ညွှန်ကြားထားကြောင်း၊ ဤညွှန်ကြားစာသည် ၁၉၈၂ ခုနှစ်၊ နိုင်ငံသားဥပဒေ ပုဒ်မ ၁၈ နှင့် ၁၉ ကို တိုက်ရိုက်ချိုးဖောက်ရာ ရောက်ကြောင်း၊ ၁၉၈၂ ခုနှစ်၊ နိုင်ငံသားဥပဒေပုဒ်မ ၁၈ တွင် နိုင်ငံသားတစ်ဦးသည် မဟုတ်မမှန် ဖော်ပြခြင်း သို့မဟုတ် ဖုံးကွယ်ခြင်းဖြင့် နိုင်ငံသားအဖြစ်ကို ရရှိပါက နိုင်ငံသားအဖြစ် ရုတ်သိမ်းခံရမည့်အပြင် ထောင်ဒဏ် ၁၀ နှစ်နှင့် ငွေဒဏ် ၅၀၀၀၀ ကိုလည်း ကျခံစေရမည်ဟုလည်းကောင်း၊ ပုဒ်မ ၁၉ တွင် နိုင်ငံသားတစ်ဦးသည် မသမာသောနည်းလမ်းဖြင့် နိုင်ငံသားလက်မှတ် သို့မဟုတ် ဧည့်နိုင်ငံသားလက်မှတ် သို့မဟုတ် နိုင်ငံသားပြုခွင့်လက်မှတ်ကို တစ်စုံတစ်ဦးရရှိရန် အားပေးကူညီ ဆောင်ရွက်လျှင် ထောင်ဒဏ် ၇ နှစ်နှင့်ငွေဒဏ် ၁၀၀၀၀ ကိုကျခံစေရမည်ဟုလည်းကောင်း ဖော်ပြပါရှိကြောင်း၊ ဖွဲ့စည်းပုံအခြေခံဥပဒေပုဒ်မ ၃၄၆ တွင် နိုင်ငံသားဖြစ်ခြင်း၊ နိုင်ငံသားပြုခြင်း၊ နိုင်ငံသားအဖြစ်မှ ရပ်စဲခြင်းသည် ဥပဒေပြဋ္ဌာန်းသည့်အတိုင်း ဖြစ်စေရမည်ဟု ပါရှိသည့်အတွက်ကြောင့် တည်ဆဲဥပဒေများနှင့် ဆန့်ကျင်နေကြောင်း၊ ထို့ကြောင့် အမှုကိစ္စတစ်ခုကို အမှုကိစ္စတစ်ခုက ပြန်လည် ဆန်းစစ်ခြင်းမရှိစေရ၊ တစ်နည်းအားဖြင့် နောက်ကြောင်းပြန် စိစစ်ခြင်းမပြုလုပ်ရဟု ညွှန်ကြားချက်သည် တရားစီရင်ရေး၊ အုပ်ချုပ်ရေးနှင့် ဥပဒေပြုရေးတို့၌ မရှိဖူးသော လုပ်ထုံးလုပ်နည်းဖြစ်ပြီး တည်ဆဲဥပဒေများနှင့် ဆန့်ကျင်နေကြောင်း၊ ဆန့်ကျင်နေသည့်အတွက်ကြောင့် ဖော်ပြပါအမိန့်ညွှန်ကြားစာအား ရုတ်သိမ်းခွင့်ပေးရန် လိုအပ်မည်ဖြစ်ပါကြောင်း၊ ထို့ကြောင့် ရခိုင်ပြည်နယ်တွင် ဘင်္ဂါလီလူမျိုးများက ကမန်လူမျိုးအမည်ခံယူကာ နိုင်ငံသားစိစစ်ရေးကတ်ပြား ထုတ်ပေးနေခြင်းကို ပြန်လည်စိစစ်ပေးရန်နှင့် အမျိုးသားမှတ်ပုံတင်နှင့် နိုင်ငံသားဦးစီးဌာန၏ (၂၅-၁-၂၀၁၇) ရက်စွဲပါစာအမှတ် ၁၀၂/မ-၆(နငသ-၄)၀၅၈၄/အမတ အရ နောက်ကြောင်းပြန်စိစစ်ခြင်း မပြု(မပြု)ရန် အမိန့်ညွှန်ကြားစာအား ရုပ်သိမ်းပေးရန် အစီအစဉ်ရှိ/မရှိ သိရှိလိုကြောင်း မေးမြန်းပါသည်။


 

အလုပ်သမား၊ လူဝင်မှုကြီးကြပ်ရေးနှင့်ပြည်သူ့အင်အား ဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ

 

ကမန်လူမျိုးများအား ထုတ်ပေးထားသည့် မှတ်ပုံတင်များအား ပြန်လည်စိစစ်ရန် ကိစ္စနှင့်ပတ်သက်၍ ဝန်ကြီးဌာနအနေဖြင့် ပြန်လည်စိစစ်ရန် အစီအစဉ်ရှိပါကြောင်းနှင့် စစ်ဆေးရေးလုပ်ငန်းများကို ဆောင်ရွက် လျက်ရှိပါကြောင်း၊ ပိုမိုပြည့်ပြည်‌့စုံစုံ ပြောရမည်ဆိုလျှင် အဆိုပါကိစ္စကို ၂၀၁၈ ခုနှစ်၊ ဇန်နဝါရလ ၁ ရက်နေ့မှစ၍ ရခိုင်ပြည်နယ်ရှိ ကမန်လူမျိုးများအား ပြန်လည်စိစစ်နိုင်ရန်အတွက် ရုံးချုပ်မှဝန်ထမ်းများနှင့် ဒေသရှိဝန်ထမ်းများ ပူးပေါင်းပြီး စစ်ဆေးရေးလုပ်ငန်း ဆောင်ရွက်ခဲ့ကြောင်း၊ ထိုသို့ ဆောင်ရွက်သည့်အခါ ဒေသခံရပ်မိရပ်ဖများနှင့် တာဝန်ရှိပုဂ္ဂိုလ်များပါဝင်ပြီး မိမိတို့ရုံးများတွင် မှတ်တမ်းမှတ်ရာများနှင့် စိစစ်ခဲ့ခြင်းဖြစ်ပါကြောင်း၊ ဖော်ပြပါကာလအတွင်း ကမန်လူမျိုး ၃၃၀၆ ဦးကို စိစစ်ရေးကတ်ပြားများ စိစစ်ထုတ်ပေးခဲ့ပါကြောင်း၊ ဤသို့ထုတ်ပေးမှုအပေါ် ပြင်ပမှ ဝေဖန်စွပ်စွဲမှုများ ဖြစ်ပေါ်လာသောကြောင့် ထုတ်ပေးခဲ့သည့်အမှုတွဲများကို ရုံးချုပ်မှ တောင်းယူ၍ ရုံးချုပ်ရှိဝန်ထမ်းများ၊ ဥပဒေကျွမ်းကျင်သော ဝန်ထမ်းများကို ပြည်နယ်၊ တိုင်းဒေသကြီးများနှင့် တွဲဖက်ပြီး ဝန်ထမ်း ဒုတိယညွှန်ကြားရေးမှူးအဆင့်၊ လက်ထောက်ညွှန်ကြားရေးမှူးအဆင့်ရှိ ဝန်ထမ်းများနှင့် အဆိုပါအမှုတွဲများကို အသေးစိတ် ပြန်လည်စိစစ်ခဲ့ပါကြောင်း၊ ပြန်လည်စိစစ်သောအခါ ထုတ်ပေးထားသည့် ရမ်းဗြဲမြို့နယ်မှူး ဦးစီးပြီး ထုတ်ပေးထားသည့် အမှုတွဲ ၃၃၀၆ မှုစလုံးတွင် ၁၉၈၂ ခုနှစ်၊ မြန်မာနိုင်ငံသားဥပဒေနှင့် ကိုက်ညီသည့် မြန်မာနိုင်ငံသား အရည်အချင်းပြည့်စုံသူများဖြစ်သည်ကို တွေ့ရပါကြောင်း၊ ရုံးမှတ်တမ်းနှင့် စိစစ်ချက်များအရ တွေ့ရခြင်းဖြစ်ပါကြောင်း၊ သို့ရာတွင် အမှုတွဲ ၃၂၈၅ မှုတွင် ကမန်လူမျိုးဖြစ်၍ ထုတ်ပေးသည်မှာ မှန်ကန်ကြောင်း၊ ကျန်အိမ်ထောင်စုကိုးစု၏ အမှုတွဲ ၂၁ မှု၊ လူ ၂၁ ဦးမှာ ကမန်လူမျိုးအဖြစ် သေချာမှုရှိ/မရှိ ပြန်လည်စိစစ်ရန်လိုကြောင်း၊ ထိုသို့တွေ့ရှိချက်များအရ ရုံးချုပ်ရှိ ဒုတိယညွှန်ကြားရေးမှူးချုပ် ဦးစီးပြီး အဖွဲ့တစ်ဖွဲ့ဖြင့် ဒေသကို ကွင်းဆင်းစေလွှတ်ပြီး ဒေသရှိ ရပ်မိရပ်ဖများ၊ တာဝန်ရှိပုဂ္ဂိုလ်များအပါအဝင် ရမ်းဗြဲမြို့နယ်ရုံးရှိ မှတ်တမ်းမှတ်ရာများအနက်မှ တိုက်ဆိုင်ပြီး စစ်ဆေးပါကြောင်း၊ စစ်ဆေးပြီးသောအခါ တွေ့ရှိချက်များအပေါ် မူတည်၍ ၂၁ ဦးအတွက် ပြန်လည်ထုတ်ပေးသင့်သောလူမျိုး အမှန်နှင့်စာရင်းကို ပြန်လည်ထုတ်ပေးသွားမည် ဖြစ်ပါကြောင်း၊ ဤသို့မှားယွင်းမှုအတွက် မည်သူ့တွင် တာဝန်ရှိသည်၊ မည်သည့်အတွက်ကြောင့် မှားယွင်းရသည် ဆိုသည့်အချက်ကိုလည်း ဒုတိယညွှန်ကြားရေးမှူးချုပ် နောက်တစ်ဦးနှင့် စုံစမ်းစစ်ဆေးရေးခုံရုံး ဆောင်ရွက်နေပါကြောင်း၊ ထိုတွေ့ရှိရေးအပေါ်မူတည်၍ ထိုက်သင့်သည့် ဝန်ထမ်းစည်းမျဉ်းစည်းကမ်းအရ အရေးယူမှုများကို ဆောင်ရွက်သွားမည် ဖြစ်ပါကြောင်း၊

အမျိုးသားမှတ်ပုံတင်နှင့် နိုင်ငံသားစစ်ဆေးရေးဦးစီးဌာနမှ ၂၀၁၇ ခုနှစ်၊ ဇန်နဝါရီလ ၂၅ ရက်စွဲပါ နောက်ကြောင်းပြန် စစ်ဆေးရေးမပြုရန် ညွှန်ကြားစာထုတ်ပြန်ခဲ့ကြောင်း၊ ထုတ်ပြန်သည့် ရည်ရွယ်ချက်မှာ ပြည်သူလူထုကို နိုင်ငံသားစိစစ်ရေးကတ်ပြား သို့မဟုတ် နိုင်ငံသားစစ်ဆေးခံရမည့်သူ၏ သက်သေခံကတ်ပြား ထုတ်ပေးသည့်အခါ ဥပဒေနှင့်အညီဖြစ်စေရန် နှင့် ပိုမိုလွယ်ကူလျင်မြန်စွာ ဆောင်ရွက်ပေးနိုင်ရန် ထုတ်ပြန်ရခြင်းဖြစ်ပါကြောင်း၊ လုပ်ထုံးလုပ်နည်းများနှင့်အညီ တရားဝင် ထုတ်ပေးထားသည့် နိုင်ငံသားစိစစ်ရေးကတ်ပြား ကိုင်ဆောင်သူ မှန်ကန်ပါက ၁၀ နှစ်ပြည့်မှ ၁၈ နှစ် ပြည့်လဲလှယ်ခြင်း၊ ကတ်ပြားပျောက်ဆုံးပျက်စီး မိတ္တူလျှောက်ထားခြင်း၊ တရားဝင်ထုတ်ပေးထားသည့် နိုင်ငံသားစိစစ်ရေးကတ်ပြား ကိုင်ဆောင်သည့်မိဘနှစ်ပါးမှ မွေးဖွားလာသည့် သားသမီးများ၏ နိုင်ငံသားစိစစ်ရေးကတ်ပြား လျှောက်ထားခြင်း၊ အကြောင်းအမျိုးမျိုးကြောင့် နိုင်ငံသားစိစစ်ရေးကတ်ပြား၊ အိမ်ထောင်စုလူဦးရေစာရင်းနှင့် ကိုင်ဆောင်သင့်သည့်ကတ်ပြား တစ်မျိုးမျိုး ပျောက်ဆုံးပျက်စီးပြီး လျှောက်ထားခြင်းတို့အတွက် နောက်ကြောင်းပြန်စိစစ်ခြင်းမပြုဘဲ ရုံးလက်ခံမှတ်တမ်းများနှင့် ဆောင်ရွက်ပေးရန် ညွှန်ကြားထားခြင်းဖြစ်ပါကြောင်း၊ ဤသို့ညွှန်ကြားထားသော်လည်း နိုင်ငံသားစိစစ်ရေး လုပ်ငန်းနှင့် စပ်လျဉ်း၍ ပြန်လည်စိစစ်ရန်လိုအပ်သည့် ကိစ္စရပ်များ ပေါ်ပေါက်လာလျှင် ဥပဒေနှင့်အညီ၊ လုပ်ထုံးလုပ်နည်းနှင့်အညီ အထောက်အထားများဖြင့် ပြန်လည်စိစစ်ရေးလုပ်ငန်းများကို ဆောင်ရွက်လျက်ရှိပါကြောင်း၊ ညွှန်ကြားချက်တွင် တည်ဆဲဥပဒေကို ပိုမိုထိရောက်စွာ အကောင်အထည်ဖော် ဆောင်ရွက်ရန်အတွက် လိုက်နာဆောင်ရွက်မည့် အချက်များကို တိကျစွာ ထပ်မံဖြည့်စွက် ပြဋ္ဌာန်းထားခြင်းဖြစ်ပါကြောင်း၊ ဖော်ပြပါညွှန်ကြားချက်များသည် တည်ဆဲဥပဒေနှင့် ညီညွတ်ပါကြောင်း၊

သို့ဖြစ်ပါ၍ နိုင်ငံသားစိစစ်ရေးကတ်ပြား ထုတ်ပေးရေးလုပ်ငန်းတွင် အများပြည်သူအား လွယ်ကူလျင်မြန် ထိထိရောက်ရောက် ဆောင်ရွက်ပေးနိုင်ရန် ဥပဒေ၊ လုပ်ထုံးလုပ်နည်းများနှင့်အညီ ဆန့်ကျင်ခြင်း မပြုဘဲ အကောင်အထည်ဖော် ဆောင်ရွက်ရမည့် နည်းလမ်းများအဖြစ် ထုတ်ပြန်ထားခြင်း ဖြစ်သည့်အတွက် အဆိုပါညွှန်ကြားလွှာကို ပြန်လည်ရုပ်သိမ်းရန် အစီအစဉ်မရှိပါကြောင်းနှင့် ထိုသို့ဆောင်ရွက်ခြင်းအားဖြင့် မလိုလားအပ်သည့် ပြဿနာများ ဖြစ်ပေါ်လာလျှင်လည်း မိမိတို့ဌာနကို အချိန်မရွေး ပြောကြားနိုင်ပါကြောင်းနှင့် ဥပဒေနှင့်ညီညွတ်အောင် အလေးထား ဆောင်ရွက်ပေးမည်ဖြစ်ကြောင်း ရှင်းလင်းဖြေကြားပါသည်။

ဦးအောင်သောင်းရွှေ(ဘူးသီးတောင်မဲဆန္ဒနယ်) ကဆက်စပ်မေးခွန်း မေးမြန်းပါသည်။

ရမ်းဗြဲကိစ္စနှင့် ပတ်သက်၍ နိုင်ငံသားစစ်ဆေးရေးကတ် ထုတ်ပေးထားသည်ကို ပြန်လည်စစ်ဆေးပေးမည်ဟု ကြားသိရသောကြောင့် အထူးဝမ်းသာပါကြောင်း၊ သို့သော်လည်း စိစစ်သည့်အခါ လွှတ်တော်ကိုယ်စားလှယ်များ၊ ရပ်မိရပ်ဖများ ပူးပေါင်းပြီး ပြန်လည်စစ်ဆေးမှု လုပ်ငန်းများတွင် ပူးပေါင်းပါဝင်ရန် အစီအစဉ်ရှိ/မရှိကိုလည်း သိရှိလိုပါကြောင်း၊ ဖော်ပြပါ အမိန့်၊ ညွှန်ကြားစာသည် ဥပဒေကို လွှမ်းမိုးပြီးထောက်ထားသည်ဟု ဆိုသောကြောင့် အဆိုပါဥပဒေကိုလွှမ်းမိုးပြီး ညွှန်ကြားစာထုတ်နိုင်ခြင်း ရှိ၊ မရှိ မေးမြန်းပါသည်။

အလုပ်သမား၊ လူဝန်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ ပြည်ထောင်စုဝန်ကြီး ဦးသိန်းဆွေ                

နိုင်ငံသားစိစစ်ရေးကတ်ပြား ထုတ်ပေးသည့်ကိစ္စသည် ဥပဒေနှင့်ခိုင်မာစွာ ပြဋ္ဌာန်းထားခြင်းဖြစ်ကြောင်း၊ အလွှာရှင်များ၏ မှတ်တမ်းမှတ်ရာများသည် မိမိတို့ရုံးချုပ်၊ သက်ဆိုင်ရာမြို့နယ်၊ တိုင်းဒေသကြီးနှင့် ပြည်နယ်များတွင် စနစ်တကျမှတ်တမ်းထားပါကြောင်း၊ လူတစ်ဦးချင်းစီ၏ ခံစားချက်၊ သဘောထားနှင့် တင်ပြချက်ကို လက်ခံဆောင်ရွက်ပေးရန် အခက်အခဲ ရှိပါကြောင်း၊ အဓိကအားဖြင့် ခိုင်မာသည့် မှတ်တမ်းမှတ်ရာများအရ ဥပဒေနှင့်အညီ ဆောင်ရွက်မှသာလျှင် ဆောင်ရွက်သည့်လုပ်ငန်းများသည် ပိုမိုတိကျမှန်ကန်ပြီး မြန်ဆန်မည်ဖြစ်ပါကြောင်း၊

သို့ဖြစ်ပါ၍ ဥပဒေ၊ ရုံးလုပ်ထုံးလုပ်နည်းများနှင့်အညီ ဆက်လက်ဆောင်ရွက်သွားမည် ဖြစ်ပါကြောင်း၊ သံသယရှိသည့်ကိစ္စများ၊ အမှုတွဲများရှိလာလျှင် အချိန်မရွေး ဆက်သွယ်ဆောင်ရွက်နိုင်သကဲ့သို့ ကိုယ်တိုင်ကြည့်ရှုလိုလျှင်လည်း မိမိတို့ရုံးချုပ်တွင် လွှတ်တော် ဥက္ကဋ္ဌကြီး၏ ခွင့်ပြုချက်ဖြင့် အသေးစိတ်ကြည့်ရှုစစ်ဆေးရန် နှင့် ပူးပေါင်းဆောင်ရွက်ရန်လည်း အသင့်ရှိပါကြောင်း၊ ထုတ်ပြန်ထားသည့် ညွှန်ကြားချက်သည် ဥပဒေနှင့် ညီညွတ်ပါကြောင်း၊ ဥပဒေအတိုင်း ဆောင်ရွက်ရန်အတွက် ပိုမိုလျင်မြန် မြန်ဆန်စွာ ဆောင်ရွက်ရန် ပြည်သူများ၏ အကျိုးစီးပွားအတွက် အောက်မှာရှိသည့်ဝန်ထမ်းများ မလိုအပ်ဘဲ အချိန်နှောင့်နှေးခြင်း၊ ကြန့်ကြာခြင်းများ မဖြစ်ရန် တိကျစွာထုတ်ပြန်ထားခြင်းဖြစ်ပါကြောင်း၊ ပြည်သူ၏အကျိုးကို ရှေးရှုပြီး ထုတ်ပြန်ထားခြင်းဖြစ်ပါကြောင်း၊ ထို့ကြောင့် ထုတ်ပြန်ထားချက်၊ ညွှန်ကြားချက်သည် ဥပဒေနှင့်ညီညွတ်စွာဖြစ်သောကြောင့် ပြန်လည်ပြင်ဆင်ပေးရန် အစီအစဉ်မရှိပါကြောင်း၊ သို့ရာတွင် ဥပဒေပြုသည့် လွှတ်တော် ကိုယ်စားလှယ်ကြီးများအနေဖြင့် ထောက်ပြမည်ဆိုလျှင်လည်း မိမိတို့ ပြန်လည်စိစစ်၍ လိုအပ်သလို ပူးပေါင်းဆောင်ရွက်သွားမည်ဖြစ်ကြောင်း ရှင်းလင်းဖြေကြားပါသည်။