Skip to main content

မေးခွန်း အကြောင်းအရာ 

san san eiမိုးညှင်းမြို့နယ်သည် ဟိုပန်မြို့အပါအဝင် ကျေးရွာပေါင်း ၁၂၇ ရွာ၊ လူဦးရေ နှစ်သိန်းကျော်ရှိပါ ကြောင်း၊ ခရိုင်ရုံးစိုက်သည့်မြို့နယ် တစ်ခုဖြစ်သလို ပညာရေးကဏ္ဍတွင် ကချင်ပြည်နယ်၏ အောင်ချက် အကောင်းဆုံးပညာရေး မြို့လည်းဖြစ်ပါကြောင်း၊ အခြေခံပညာအလယ်တန်းကျောင်း ၁၇ ကျောင်း၊ အထက်တန်းကျောင်း ၁၄ ကျောင်းရှိပြီး နည်းပညာကောလိပ်၊ ဒီဂရီကောလိပ်ကျောင်း များ လည်း ဖွင့်လှစ်ထားရှိပါကြောင်း၊

မိုးညှင်းဒီဂရီကောလိပ်ကျောင်းစီမံကိန်းကို ၂၀၀၀ပြည့်နှစ် တွင်စတင်ခဲ့ပြီး ရွာသစ်ကုန်းအုပ်စု၊ ထန်းတစ်ပင် ကျေးရွာ၏ OSS ကွင်း မြေနေရာဧက ၂၁၀ ကို သတ်မှတ်ရယူခဲ့ပါကြောင်း၊ သတ်မှတ် သည့်နေရာတွင် ထန်းတစ်ပင်ရွာသားများ၏ အခင်းမြေများ၊ လယ်မြေများ၊ ငါးကန်များလည်း ပါဝင် သွားခြင်းဖြစ်ပါကြောင်း၊ စီမံကိန်းပြီးစီးသည့် ၂၀၀၃ ခုနှစ် ၁၂ လပိုင်းတွင် မိုးညှင်းဒီဂရီကောလိပ် ကို ကျောင်းသား ၃၂၂ ဦးနှင့် စတင်ဖွင့်လှစ်ခဲ့ပါကြောင်း၊ ကျောင်းအုပ်ကြီး ဒေါက်တာကြည်ရွှင်လက်ထက် ၂၀၁၂ခုနှစ်တွင် မန္တလေး-မြစ်ကြီးနားဟိုင်းဝေးမြို့ရှောင်လမ်းဖောက်လုပ်သည့်နေရာတွင် ထန်းတစ်ပင် ရွာ၏ ရွာလမ်းကိုဖောက်လုပ်ပေးရန်အတွက် အလျား ၁၂၅၀ ပေ x အနံ ၁၄၈ ပေ ဧရိယာအကျယ် စုစုပေါင်း ၄.၇၅ ဧကကို ကျောင်း၏ မြောက်ဘက်ဧရိယာမှဖယ်ပြီး တောင်ဘက် ၁၄.၇၂ ဧကကို ပြောင်းယူရန်အတွက်  ရွာသားများနှင့် ကျောင်းအုပ်ကြီးတို့ ညှိနှိုင်းပြီးပြင်ဆင်သတ်မှတ်ခဲ့ပါကြောင်း၊ ယခု ၂၀၁၄ ခုနှစ်တွင် ၎င်းစွန့်လွှတ်မြေဧကနှင့်ပတ်သက်ပြီး ရွာသား၁၃ ဦး တရားစွဲဆိုခံခဲ့ရပါကြောင်း၊ မြို့ရှောင်လမ်းဖောက်လုပ်ခဲ့ခြင်းကြောင့် သိမ်းဆည်းခံနေခဲ့ရသည့် မြေယာပြဿနာများကို အခုချိန်ထိ ဖြေရှင်း နေရဆဲဖြစ်ပါကြောင်း၊

ပိုင်ဆိုင်ခွင့်အငြင်းပွားမှု မြေယာပြဿနာများကို ကျောင်းအုပ်ကြီးအဆက်ဆက်တွင် နောက်နောင်မဖြစ်ပွားစေရန် ကျောင်းဆောက်ခြင်း၊ လမ်းဖောက်ခြင်းများကြောင့် ရပ်ရွာဖွံ့ဖြိုး တိုးတက်ပြီး ရပ်ရွာသားများ၏ လူနေမှုအဆင့်အတန်းမြင့်မားလာရမည့်အစား မြေယာ အမှုအခင်း ပြဿနာများကြောင့် ရဲစခန်းရောက်၊ တရားရုံးများရောက်ပြီး ရုံးချိန်းများစွာနှင့် ဒုက္ခဆင်းရဲကြုံနေ ကြရသည့် ရွာသားများ၏လူမှုအခက်အခဲကိုဖြေရှင်းနိုင်ရန်အတွက် မိုးညှင်းဒီဂရီကောလိပ် ကျောင်းဝင်း မြေနေရာကို ပြန်လည်တိုင်းတာသတ်မှတ်ပေးရန်နှင့် မြေစာရင်းမြေပုံ(၁၀၅)၊ (၁၀၆)ကို အသစ်ရေး ဆွဲစေရန် အတွက် ညွှန်ကြားဆောင်ရွက်ပေးနိုင်ခြင်းအစီအစဉ်ရှိ/မရှိနှင့် အဆိုပါစွန့်လွှတ်မြေဧက အကြောင်းကို ရှင်းလင်းစွာသိလိုပါကြောင်းမေးမြန်းပါသည်။


 

ဖြေကြားချက် 

dr myo thein gyiမိုးညှင်းဒီဂရီကောလိပ်သည် ကချင်ပြည်နယ်၊ မိုးညှင်းခရိုင်၊ မိုးညှင်းမြို့နယ်၊ ရွာသစ်ကုန်းကျေးရွာ အုပ်စု ဦးပိုင်အမှတ်(၁)၊ ကွင်းအမှတ်(၄၅၈)၊ လတွတ်ကွင်းမြေဧရိယာ ၂၁၀ ဧကပေါ်တွင်တည်ရှိပြီး ၉-၁၂-၂၀၀၃ ရက်တွင် စတင်ဖွင့်လှစ်ခဲ့ပါကြောင်း၊ မိုးညှင်းဒီဂရီကောလိပ်ပိုင် မြေကိုကချင်ပြည်နယ်၊ အေးချမ်းသာယာရေးနှင်‌့ ဖွံ့ဖြိုးရေးကောင်စီ၏ ၂၉-၁၀-၂၀၀၅ ရက်စွဲပါစာအမှတ်၊ ၁၉၂/၁-၂/ ပရက (ကချင်)အဖြစ် ၁၉၅၃ ခုနှစ် လယ်ယာမြေနိုင်ငံပိုင်ပြုလုပ်ရေးနည်းဥပဒေပုဒ်မ ၃၉ အရ ဆင်‌့ဆိုသော အမိန့်ရရှိခဲ့ပြီး ကျောင်းပိုင်မြေအဖြစ် သတ်မှတ်ပေးထားခဲ့ခြင်းဖြစ်ပါကြောင်း၊ ထို့အပြင် မိုးညှှင်းဒီဂရီ ကောလိပ်ကျောင်းပိုင်မြေယာအတွက် စတင်လျှောက်ထားစဉ် သက်သေခံမြေစာရင်းပုံစံ (၁၀၆)တွင် မြေလွတ်၊ မြေရိုင်းလို့ဖော်ပြထားရှိပါကြောင်း၊ မိုညှင်းဒီဂရီကောလိပ်ပိုင်မြေအဖြစ် လန(၃၉) ရရှိပြီး နောက် ယခင်တစ်နှစ်၊ နှစ်နှစ်အထိ မိုညှင်းမြို့နယ်၊ ထန်းတပင်ရွာသားများ စိုက်ပျိုးရေးလုပ်ငန်းများ လုပ်ကိုင်ခဲ့ကြပါကြောင်း၊ ၎င်းကောလိပ်မြေကို ခြံစည်းရိုးကာရံလိုက်သည့်အခါ ရွာသူရွာသားများ သွားလာမှုအဆင်ပြေစေရန်အတွက် ကောလိပ်ပိုင်မြေအတွင်းမှ  လမ်းဖောက်လုပ်ပေးခဲ့ပြီး၎င်းလမ်း၏ မြောက်ဘက်ပိုင်းမှာရှိသည့်မြေများကို ရွာသူရွာသားအချို့ ကျူးကျော်ဝင်ရောက်လုပ်ကိုင်ခဲ့ကြပြီး ကောလိပ်ပိုင်မြေမဟုတ်ဘူးဟု အမျိုးမျိုးတင်ပြခဲ့သည့်အတွက် ကောလိပ်ပိုင်မြေမှ ဧက ၂၁၀ ထက် ပိုမိုကျော်လွန်နေသည်ဟု ၎င်းတို့၏ယူဆချက်များ တင်ပြခဲ့ခြင်းသာဖြစ်ပါကြောင်း၊

ထို့အပြင် မိုးညှင်းမြို့နယ်၊ ထန်းတစ်ပင်ကျေးရွာနေ ဒေါ်ခင်အုန်းတင့်အပါ ၁၃ ဦး ပြည်နယ် လယ်ယာ မြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီသို့ တင်ပြချက်အရ ၂၅-၂-၂၀၁၇ ရက်နေ့တွင် ပြည်နယ်လွှတ်တော်ကိုယ်စားလှယ် ဦးတင်အေး အပါအဝင် မြို့နယ်လယ်ယာမြေ နှင့် အခြားမြေများသိမ်းဆည်းခံရမှုများ ပြန်လည်စိစစ်ရေးကော်မတီဝင်များ၊ ရွာသစ်ကုန်း ကျေးရွာ အုပ်စု လယ်ယာမြေစီမံခန့်ခွဲမှုအဖွဲ့နဲ့ တိုင်ကြားသူ ဒေါ်ခင်အုန်းတင့်အပါ ခြောက်ဦးတို့ ကိုယ်တိုင် လိုက်ပါပြီး မိုးညှင်းဒီဂရီကောလိပ်ကျောင်းဝင်းမြေကို စနစ်တကျစိစစ်တိုင်းတာသည့် အခါ ဧက ၂၁၀ ထက်ကျော်လွန်မှုမရှိသည်ကို ၎င်းတိုင်ကြားသူတို့ကိုယ်တိုင်သိရှိပြီး ဖြစ်ပါကြောင်း၊ ထို့ကြောင့် မိုးညှင်းဒီဂရီကောလိပ်မြေနေရာကို ၂၅-၁-၂၀၁၇ ရက်နေ့တွင် ပြည်နယ်လွှတ်တော်ကိုယ်စားလှယ် မြို့နယ် လယ်ယာမြေနှင့်အခြားမြေများသိမ်းဆည်းခံရမှုများ ပြန်လည် စိစစ်ရေးဗဟိုကော်မတီဝင်များ၊ ရွာသစ်ကုန်းကျေးရွာအုပ်စု လယ်ယာမြေစီမံခန့်ခွဲမှုအဖွဲ့နှင်‌့ ဒေသခံတောင်သူများပါဝင်သည့်အဖွဲ့တို့ စနစ်တကျကွင်းဆင်းစစ်ဆေးတိုင်းတာပြီး ဧက ၂၁၀ သာဖြစ်ပါကြောင်း ပြန်လည်ရှင်းလင်း ဖြေကြားခဲ့ ပါသည်။


 

ပြည်ထောင်စုဝန်ကြီး ဒေါက်တာမျိုးသိမ်းကြီး