Skip to main content

မေးခွန်း အကြောင်းအရာ 

maung maung ooရန်ကုန်တက္ကသိုလ်လှေလှော်အသင်း(တက္ကသိုလ်များလှေလှော်အသင်း )ကို ၁၉၂၃ ခုနှစ်တွင် စတင်တည်ထောင်ခဲ့သည်မှာ ယနေ့ဆိုလျှင် နှစ်ပေါင်း တစ်ရာ ပြည့်ခါနီးပြီဖြစ်ပါကြောင်း၊ “ သေသည့်တိုင်လှော်ခတ်ကြမယ်” (Row Day Your Dead)ဟူသည့် ဆောင်ပုဒ်နှင့်အညီ တက္ကသိုလ်ဂုဏ်ဆောင် အားကစားသမားများ၊ နိုင်ငံဂုဏ်ဆောင် အားကစားသမားများကို မွေးထုတ်နိုင်ခဲ့ပါကြောင်း၊  တက္ကသိုလ်သည် စာများကို လေ့လာ ကျက်မှတ်သင်ယူနေခြင်းသာ မဟုတ်ဘဲ နိုင်ငံရေး၊ လူမှုရေး၊ ခေါင်းဆောင်မှု၊ အားကစားနှင့် အနုပညာစသည်ဖြင့် အားလုံးကိုလေ့လာသင်ယူနိုင်သည့် အခြေအနေတစ်ခုဖြစ်ပါကြောင်း၊

ယခုအခါ တက္ကသိုလ်များလှေလှော်အသင်းအဆောက်အဦတစ်ခုလုံးပြင်ဆင် ဆောက်လုပ်ခဲ့ပြီး စားသောက်ဆိုင်တစ်ခုကို ငှားရမ်းခဲ့ပါကြောင်း၊ ရန်ကုန်တက္ကသိုလ် ပရိဝုဏ်လည်းဖြစ်၊ ကျောင်းသူကျောင်းသားများ၏ အားကစား လေ့ကျင့်ရာစခန်းအတွင်းတွင် အရက်သေစာသောက် စားရောင်းချနေခြင်းသည်လည်း နိုင်ငံတော်၏ ဂုဏ်သိက္ခာ၊ တက္ကသိုလ်၏ ဂုဏ်သိက္ခာ၊ အားကစားလောက၏ ဂုဏ်သိက္ခာကို အင်မတန် ထိခိုက်ပါကြောင်း၊

ထို့ကြောင့် ပညာရေးဝန်ကြီးဌာနပိုင် ရန်ကုန်တိုင်းဒေသကြီး၊ ကမာရွတ်မြို့နယ်၊ အင်းယားလမ်းပေါ်ရှိ တက္ကသိုလ်လှေလှော်အသင်းပိုင် အဆောက်အဦအား ငှားရမ်းထားခြင်းမှ ပြန်လည်ရုပ်သိမ်းပေးရန် အစီအစဉ်ရှိ/မရှိ၊ အစီအစဉ် ရှိပါက မည်သည့်အချိန်တွင် ရုပ်သိမ်းပေးမည်နှင့် မရှိပါက မည်သည့်အတွက်ကြောင့် ဖြစ်သည်ကို သိရှိလိုပါကြောင်း မေးမြန်းပါသည်။


 

ဖြေကြားချက် 

dr myo thein gyiပညာရေးဝန်ကြီးဌာနပိုင် ရန်ကုန်တက္ကသိုလ် လှေလှော်အသင်းပိုင်သည့် အဆောက်အဦကို ၁-၄-၂၀၁၆ ရက်နေ့မှ ၃၁-၃-၂၀၂၁ အထိ ငါးနှစ်စာချုပ်ကို ၂၀၁၅ ခုနှစ်၊ ဖေဖော်ဝါရီလ ၂၄ ရက်နေ့က ကျင်းပခဲ့သည့် ပညာရေးဝန်ကြီးဌာန၏ စီမံခန့်ခွဲရေးကော်မတီအစည်းအဝေး အမှတ်စဉ် (၂၄/၂၀၁၅) အတည်ပြုချက်နှင့် ဆက်လက်စာချုပ်ချုပ်ဆို ငှားရမ်းထားတာကို တွေ့ရှိရပါကြောင်း၊ တစ်လကို ၃၅ သိန်းနှင့် ၁၂ လစာအတွက် ကျပ်သိန်း ၄၂၀ ကို ၂၀၁၆-၂၀၁၇ ဘဏ္ဍာရေးနှစ် အတွက် နိုင်ငံတော်ဘဏ္ဍာငွေအဖြစ် သွင်းထားသည်ကိုလည်း စိစစ်တွေ့ရှိရပါကြောင်း၊ ပညာရေးဝန်ကြီးဌာနအနေဖြင့် အစိုးရသစ်လက်ထက်တွင် အဆောက်အဦငှားရမ်းစာချုပ်ကို ပြန်လည်စိစစ်ရာတွင် နိုင်ငံတော် သို့မဟုတ် ပညာရေးဝန်ကြီးဌာနမှ အဆိုပါ အဆောက်အဦကို အသုံးပြုရန် လိုအပ်လာလျှင် အဖိုးစားနား တစ်စုံတစ်ရာတောင်းခံခြင်းမပြုဘဲ အငှားချထားသူထံကို  ရက် ၃၀ အတွင်း ပြန်လည်လွှဲပြောင်းပေးရမည်ဟု ထည့်သွင်းစာချုပ်ထားသည့်အတွက် တက္ကသိုလ်လှေလှော်အသင်းပိုင် အဆောက်အဦနှင့် ပရိဝုဏ်ကို ကျောင်းသားကျောင်းသူများ အားကစားမြှင့်တင်နိုင်ရေးအတွက် လှေလှော်အားကစားကို အားပေးမြှင့်တင်နိုင်ရေးအတွက် အဆောက်အဦနှင့် ပရိဝုဏ်ကို ပြန်လည်လွှဲပြောင်း လက်ခံရန် ရန်ကုန်တက္ကသိုလ်ပါမောက္ခချုပ် အပါအဝင် အဖွဲ့ဝင်ကိုးဦးဖြင့် လွှဲပြောင်းရေးအဖွဲ့ကို ပညာရေးဝန်ကြီးဌာနက ဖွဲ့စည်း တာဝန်ပေးအပ်ခဲ့ပါကြောင်း၊

၂၀၁၆ ခုနှစ်၊ ဇွန်လ ၁၄ ရက်နေ့တွင် အဆိုပါအဖွဲ့နှင့် ဆိုင်ပိုင်ရှင်ကို တွေ့ဆုံပြီး ၂၀၁၆ ခုနှစ်၊ သြဂုတ်လ ၃၀ ရက်နေ့ နောက်ဆုံးထားဖယ်ရှားပေးရန်အတွက် ပညာရေးဝန်ကြီးဌာနအနေဖြင့် ညှိနှိုင်းခဲ့ပါကြောင်း၊ ထိုသို့ညှိနှိုင်းခဲ့ရာတွင် ဆိုင်ရှင်ဘက်က ဝါကျွတ်ချိန်ရောက်မှသာ ဖယ်ရှားပေးနိုင်မယ်ဖြစ်ပါကြောင်းကို ၂၀၁၆ ခုနှစ်၊ ဇွန်လ ၁၆ ရက်နေ့တွင် အသနားခံစာ တင်လာခဲ့ပါကြောင်း၊  သို့သော် ဝါကျွတ်ပြီးသည့်အချိန်အထိ မဖယ်ရှားပေးခြင်းမရှိသောကြောင့် ၂၀၁၇ ခုနှစ်၊ မတ်လ ၃၁ ရက်နေ့တွင်  ဆိုင်ပိုင်ရှင်ကို ထပ်မံခေါ်ယူတွေ့‌ဆုံကာ ၂၀၁၇ ခုနှစ်၊ ဧပြီလ ၇ ရက်နေ့နောက်ဆုံးထားဖယ်ရှားပေးရန်နှင့် သိရှိကြောင်း လက်မှတ်ရေးထိုးပေးရန် မေတ္တာရပ်ခံခဲ့သော်လည်းဆိုင်ပိုင်ရှင်က ငြင်းဆန်ခဲ့ပါကြောင်း၊ ထို့ကြောင့် ၁၉၅၅ ခုနှစ် အစိုးရ၏ အိမ်ဥပစာနှင်ထုတ်ခြင်း အခွင့်အာဏာပိုင်အဖြစ် အပ်နှင်းခွင့်ရရှိရန် ဆောက်လုပ်ရေးဝန်ကြီးဌာနကို ၂၀၁၇ ခုနှစ်၊ ဇူလိုင်လ ၃ ရက်နေ့တွင် ညှိနှိုင်းခဲ့ပြီး  ၂၀၁၇ ခုနှစ်၊ ဇူလိုင်လ ၇ ရက်နေ့တွင် အခွင့်အာဏာရရှိခဲ့သည့်အတွက် အဆိုပါဆိုင်အား ပြန်လည်အပ်နှံရန် Notice စာပေးပို့ထား ပါကြောင်း၊ ယခုအခြေအနေတွင် ပညာရေးဝန်ကြီးဌာနအနေဖြင့် ရွှေရှမ်းကန် စားသောက်ဆိုင်က ဆိုင်ပိုင်ရှင်ကိုယ်တိုင်လက်မှတ်ရေးထိုးထားပြီးဖြစ်သော်လည်း ယခုဖြစ်စဉ်တွင် သက်ဆိုင်ရာဒေသ အစိုးရအဖွဲ့က အိမ်ဥပစာနှင်ခွင့်အရ နှင်ရမည်ဖြစ်သည့်အတွက် ရန်ကုန်တိုင်း ဒေသကြီးအစိုးရ အဖွဲ့နှင့် ညှိနှိုင်းပူးပေါင်းဆောင်ရွက်လျက်ရှိပါကြောင်း၊ ရန်ကုန်တိုင်းဒေသကြီးအစိုးရအဖွဲ့ အနေဖြင့် အိမ်ဥပစာနှင်ခွင့်အရ ဆောင်ရွက်နိုင်ရန် ရွှေရှမ်းကန်စားသောက်ဆိုင်ပိတ်သိမ်းရေး ကိစ္စအတွက်ကို အစည်းအဝေးခေါ်ယူပြီး ပူးပေါင်းညှိနှိုင်းဆောင်ရွက်သွားမည်ဖြစ်ကြောင်းကို ပြန်လည်အကြောင်းပြန်ကြားခဲ့ပါကြောင်း၊ ထို့ကြောင့် ငှားရမ်းထားခြင်းမှ ရုပ်သိမ်းရန် အိမ်ဥပစာနှင်ခွင့်ကို လုပ်ထုံးလုပ်နည်းနှင့်အညီ စီစဉ်ဆောင်ရွက်လျက်ရှိပါကြောင်း ပြန်လည် ဖြေကြားပါသည်။


 

ပြည်ထောင်စုဝန်ကြီး ဒေါက်တာမျိုးသိမ်းကြီး