Skip to main content

မေးခွန်း အကြောင်းအရာ 

u tin hlaဓနုဖြူမြို့ကို လွန်ခဲ့သည့်နှစ်ပေါင်း ၁၀၀၀ ခန့်က ပျူ၊ ဓနုလူမျိုးတို့မှစတင်ပြီး ထူထောင်ခဲ့သည်ဟု သိမှတ်ခဲ့ရပါကြောင်း၊ ယခုမေးခွန်းတွင်ပါဝင်သည့် ရှေးဟောင်းတန်ဆောင်းတန်းနှင့်  ပိဋကတ်သုံးပုံ ကျောက်စာတိုက်ကို ၁၂၈၁ ခုနှစ်မှ ၁၂၉၁ ခုနှစ်ထိ ၁၀ နှစ်၊ ၁၀ မိုး အလှူ့ဒါယိကာဖြစ်သည့် ဦးအောင်ဇံ၊ ဒေါ်နှင်းယု၊ ဒေါ်နှင်းအိမိသားစုက ပဓာဏပြုပြီး ဆွေမျိုးတစ်ခုခုက ကောင်းမှုဓမ္မဒါနပြုသည့် သာသနိကဒါန ဖြစ်ပါကြောင်း၊ ၎င်း အဆောက်အဦကြီးများသည် ယနေ့ကာလဆိုလျှင် နှစ်ပေါင်းကြာမြင့်ပြီ ဖြစ်သဖြင့် ဟောင်းနွမ်းဆွေးမြေ့လာပါကြောင်း၊ သို့သော် အမျိုးဘာသာ၊ သာသနာကို ချစ်ခင်မြတ်နိုး လေးစားသည့် ရဟန်းသံဃာများ၊ ဒကာ၊ ဒကာမများ၊ နိုင်ငံတော်အစိုးရအပါအဝင် အားလုံးက ခေတ်အဆက်ဆက်တွင် ပြုပြင်မွမ်းမံထိန်းသိမ်း ခဲ့ကြသဖြင့် ယနေ့တိုင်အောင်ရှေးမူ မပျက်ရှိခဲ့ပါကြောင်း၊ ထိုကျောက်စာတိုက်ကိုဖြင့် ရှေးဟောင်းသုတေသီများ၊ စာပေမြတ်နိုးသူများသည် ပြည်တွင်း/ပဧည့်သည်များ နေ့စဉ်နှင့်အမျှ လာရောက်ပြီး လေ့လာကြပါကြောင်း၊ ၂၀၁၆ ခုနှစ်တွင် နိုင်ငံခြားသား ၁၀ နိုင်ငံဧည့်သည်များ ၁၉၃၆ ဦး၊ ၂၀၁၇ ခုနှစ် ဇန်နဝါရီလမှ သြဂုတ်လကုန်ခါနီးထိ ၁၁၀၉ ဦး စုစုပေါင်းလာရောက် ခဲ့ကြပါကြောင်း၊ ကျောက်စာချပ်ပေါင်း ၃၉၉ ချပ်၊ သုံးရောင်မောင်ချိုး ၉၉ ဆိုပြီး‌ စာချိုးလေးရှိပါကြောင်း၊ ထို့နောက် ဝိနယပိဋကတ်၊ ဝိနည်းပိဋကတ်၊ သုတ္တံပိဋကတ်၊ အဘိဓမ္မာပိဋကတ်၊ ဝိနည်းပိဋကတ်က ၁၂၈ ချပ်၊ သုတ္တံပိဋကတ်က ၄၁ ချပ်၊ အဘိဓမ္မာကျောက်စာချပ်က ၂၃၀ ချပ် စုစုပေါင်း ၃၉၉ ချပ်ဖြစ်ပါကြောင်း၊ ယခုအခါ ဓနုဖြူမြို့နယ်၊ ရှေးဟောင်းသံစောင်းတန်းနှင့် ပိဋကတ်သုံးပုံကျောက်စာတိုက်ကို ပြုပြင်မွမ်းမံပေးရန် အစီအစဉ်ရှိ/မရှိ သိရှိလိုပါကြောင်း မေးမြန်းပါသည်။


 

ဖြေကြားချက် 

thura u aung koဧရာဝတီတိုင်းဒေသကြီး၊ ဓနုဖြူမြို့ပေါ်ရှိ ရှေးဟောင်းသံစောင်းတန်းနှင့် ပိဋကတ်သုံးပုံ ကျောက်စာတိုက်တို့ကို ပြည်လုံးချမ်းသာ စေတီတော်မြတ်ကြီး၏ ဂေါပကအဖွဲ့က နှစ်ကာလကြာမြင်‌့စွာပင် အစဉ်အဆက်ထိန်းသိမ်း စောင့်ရှောက်လာခဲ့ပါကြောင်း၊ ယခုရှေးဟောင်းတန်ဆောင်းတန်းနှင့် ပိဋကတ်သုံးပုံကျောက်စာတိုက်တို့သည် သာသနာရေးနှင်‌့ ယဉ်ကျေးမှုဝန်ကြီးဌာန၊ ရှေးဟောင်းသုတေသနနှင့် အမျိုးသားပြတိုက်ဦးစီးဌာနမှ ထိန်းသိမ်းထားရှိရမည့် မှတ်တမ်းစာရင်းဇယားများ ပါဝင်သည့် အဆောက်အဦများ မဟုတ်သဖြင့် လောလောဆယ် ပြုပြင်မွမ်းမံပေးရန် အစီအစဉ်မရှိသေးပါကြောင်း၊ စေတီတော်မြတ်ကြီး၏ ဂေါပကအဖွဲ့မှ ဆက်လက်ပြုပြင် မွမ်းမံထိန်းသိမ်းသွားရမည့် အနေအထားဖြစ်ပါကြောင်း၊ မန္တလေးလောကမာရဇိန် မဟာကုသိုလ်တော် ဘုရားကြီး၏ ရှေးဟောင်းပိဋကတ်ကျောက်စာများက ၂၀၁၄ ခုနှစ်မှစပြီး ကမ္ဘာ့ယဉ်ကျေးမှု အမွေအနှစ်စာရင်းဝင်ဖြစ်သည့် ယူနက်စကိုအပါအဝင် ကမ္ဘာ့နိုင်ငံများ၏ ကူညီထောက်ပံ့မှုနှင့် ထိန်းသိမ်းရခြင်းများ ရှိပါကြောင်း၊ ၂၀၁၄ ခုနှစ်တွင် ပျူမြို့သုံးမြို့ဖြစ်သည့် ဟန်လင်း၊ သရေခေတ္တရာ၊ ဗိဿနိုးမြို့သုံးမြို့ကိုလည်း ကမ္ဘာ့ယဉ်ကျေးမှုအမွေအနှစ် စာရင်းဝင်အဖြစ်ဖြင့် အသိအမှတ်ပြုခဲ့သည့်အခါ ယူနက်စကိုအဖွဲ့ချုပ်မှ ရှာပေးသည့် ပြင်သစ်၊ အီတလီ၊ စပိန်နှင့် ဥရောပနိုင်ငံများမှ နည်းပညာပိုင်းဆိုင်ရာ အထောက်အပံ့၊ ငွေကြေးပိုင်းဆိုင်ရာ အထောက်အပံ့များ ရရှိပါကြောင်း၊ အလားတူ မိမိတို့ ပုဂံဒေသကိုလည်း ၂၀၁၇ ခုနှစ် စက်တင်ဘာလနှင့် အောက်တိုဘာလတို့တွင် ကမ္ဘာ့ယဉ်ကျေးမှုအမွေအနှစ်စာရင်း တင်သွင်းနိုင်ရန်အတွက်ကို ပဏာမအဆိုပြုစာရင်း Initiative List ကို တင်သွင်းရန် ပြုစုနေပါကြောင်း၊ ကမ္ဘာ့အမွေအနှစ်စာရင်းကို ဝင်မဝင်ကို ၂၀၁၈ ခုနှစ်တွင် ယူနက်စကိုဌာနချုပ်မှ နိုင်ငံပေါင်းစုံပါဝင်သည့် ပညာရှင်များက ကွင်းဆင်းစစ်ဆေး အတည်ပြုပေးမည် ဖြစ်ပါကြောင်း၊ ယခု ဓနုဖြူမြို့က ရှေးဟောင်းသံစောင်းတန်းကြီးနှင့် ပိဋကတ်ကျောက်စာများက နှစ်တစ်ရာကျော်လွန်ခြင်း မရှိသေးပါကြောင်း၊ ဂေါပကအဖွဲ့က စဉ်ဆက်ထိန်းသိမ်းသည့်အပေါ် ဆက်လက်ထိန်းသိမ်းပေးရန် အခက်အခဲရှိပါက လိုအပ်သည့် နည်းပညာပိုင်းဆိုင်ရာများ ပံ့ပိုးနိုင်မှုအတွက်ကို ကျွမ်းကျင်ပညာရှင်များ စေလွှတ်ပြီးမှ အသေးစိတ်ညှိနှိုင်းမှုများ ဆောင်ရွက်ပေးသွားမည် ဖြစ်ပါကြောင်း ရှင်းလင်းဖြေကြားပါသည်။


 

ပြည်ထောင်စုဝန်ကြီး သူရဦးအောင်ကို