Skip to main content

ဌာနဆိုင်ရာ အစိုးရဝန်ထမ်းများအား အရေးယူအပြစ်ပေးရာ၌ (၁) ဝေးလံဒေသသို့ ပြောင်းရွှေ့တာဝန်ပေးခြင်း၊ (၂) ရာထူးတစ်ဆင့်လျှော့ခြင်း၊ (၃) လစာငွေ ပြတ်တောက်ခြင်း၊ (၄) နှစ်တိုးရပ်ဆိုင်းခြင်း စသဖြင့် ယနေ့အထိ ကျင့်သုံးနေသည်မှာ ဌာနလုပ်ထုံးလုပ်နည်းသဖွယ်ဖြစ်လာပါသည်။ အချို့ဝန်ထမ်းများအနေဖြင့်လည်း ပြည်မမှ စိတ်စေတနာကောင်းဖြင့် ဝေးလံသော နယ်စပ်ဒေသများတွင် တာဝန်ကျေပွန်စွာ ထမ်းဆောင်လျက်ရှိသော ဝန်ထမ်းများလည်း ရှိပါကြောင်း၊  အပြစ်ပေးခံရ၍ ပြောင်းရွှေ့လာရသူ ဝန်ထမ်းများအနေဖြင့် စိတ်ဆင်းရဲပြီး ဘဝပျက်သည်အထိ သောက်စားတတ် လာခြင်း၊ ဒေသနေပြည်သူများ မုန်းလာ၍ “အထက်သို့ တိုင်ကြားပြီး ပြန်ပြောင်းရမယ်” ဟူသော စိတ်အတွေးများ ဝင်လာကြသည့်အတွက် ပြည်သူ့ အကျိုးအတွက်လည်း မဖြစ်ထွန်းနိုင်ပါကြောင်း၊ သို့ဖြစ်၍ ဝေးလံဒေသသို့ တာဝန်ကျေ ဝန်ထမ်းများကို ထိုက်သင့်သော ချီးမြှောက်ဂုဏ်ပြု သင့်ပါကြောင်း၊ အပြစ်ဖြင့်ပြောင်းရွှေ့ခြင်းဆိုသည့် လုပ်ထုံးလုပ်နည်းကိုမူ ပယ်ဖျက်သင့် ပါကြောင်း၊ တချို့ဝန်ထမ်းများအနေဖြင့် တာဝန်ကျေပွန်စွာ ထမ်းဆောင်သော်လည်း အထက်လူကြီး၏ ကိုယ်ရေးကိုယ်တာသဘော၊ ပုဂ္ဂိုလ်ရေးသဘော မတိုက်ဆိုင်သည့်အခါများ တွင် ပြောင်းရွှေ့ အပြစ် ပေးခြင်းများလည်း ရှိပါကြောင်း၊ သို့ဖြစ်ရာ ဝေးလံဒေသများ သို့ ပြောင်းလဲတာဝန်ထမ်းဆောင်ရသော ဝန်ထမ်းများအနေဖြင့် ဝန်ထမ်းနှင့် သူ့မိသားစု လူမှုစီးပွားရေး ပို၍ဆင်းရဲလာခြင်း၊ ဒေသခံပြည်သူများ အနေဖြင့်လည်း အကျိုးဖြစ်ထွန်းမှုမရှိခြင်း၊ နိုင်ငံတော်အစိုးရကိုလည်း ဒေသခံပြည်သူများ အနေဖြင့် အကြည်ညိုပျက်စေခြင်းများ၊ တိုင်းရင်းသားစည်းလုံးညီညွတ်ရေးကိုလည်း အတားအဆီးဖြစ်စေခြင်း ထို့ပြင် ယင်းကဲ့သို့ အပြစ်ပေးလုပ်ထုံးလုပ်နည်းမှာ ဒီမိုကရေစီကျင့်စဉ်နှင့် လိုက်လျောညီထွေမှုလည်း မရှိပါကြောင်း သိုဖြစ်ပါ၍ မိမိအနေဖြင့် ဝေးလံခက်ခဲဒေသသို့ တာဝန်ကျေဝန်ထမ်းများ ထိုက်သင့်သော ချီးမြှောက် ဂုဏ်ပြုခြင်းသာ ဖြစ်သင့်ပြီး၊ အပြစ်ပေးတာဝန်ပေးခြင်းဟူသော လုပ်ထုံးလုပ်နည်းကို ပယ်ဖျက်ပေးရန် အစီအစဉ် ရှိ/မရှိ သိရှိလိုပါကြောင်းမေးမြန်းပါသည်။

ယခင် ကျင်းပပြီးစီးခဲ့သော ပထမအကြိမ် ပြည်သူ့လွှတ်တော် ပုံမှန်အစည်းအဝေးများတွင် အလားတူမေးခွန်းမျိုးကို အောက်ဖော်ပြပါ ပြည်သူ့ လွှတ်တော်ကိုယ်စားလှယ် အသီးသီးကမေးမြန်းခဲ့၍ ပြည်ထောင်စု ရာထူးဝန်အဖွဲ့မှ ပြန်လည် ရှင်းလင်း ဖြေကြားခဲ့ပြီးဖြစ်ပါသည်။ နောင်မွန်မဲ ဆန္ဒနယ် ပြည်သူ့လွှတ်တော်ကို ယ်စားလှယ် ဦးဂျီဖုန်ဆားရ်၊  ကချင်ပြည်နယ်၊ ချီဖွေမဲဆန္ဒနယ် ပြည်သူ့လွှတ်တော် ကိုယ်စားလှယ် ဦးဇုံးတိန့်၊ စစ်ကိုင်း တိုင်းဒေသကြီး၊ လေရှီးမဲဆန္ဒနယ် ပြည်သူ့လွှတ်တော်ကိုယ်စားလှယ် ဦးရှီသီး၊ ရသေ့တောင်မဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါ်ခင်စောဝေ တို့က အသီးသီးမေးမြန်းခဲ့ပြီးဖြစ်ရာ ယခုတစ်ဖန် အလားတူမေးခွန်းမျိုးကိုပင် ပြည်သူ့ လွှတ်တော် ကိုယ်စားလှယ် ဦးပိုက်လင်းက ထပ်မံမေးမြန်းလာသည့် အတွက် အောက်ပါ အတိုင်း ပြန်လည်ရှင်းလင်းဖြေကြားလိုပါကြောင်း။

“နိုင်ငံံ့ဝန်ထမ်းဥပဒေကို ၈-၅-၂၀၁၃ ရက်နေ့တွင် ပြည်ထောင်စုလွှတ်တော်ဥပဒေအမှတ် ၅ အဖြစ် ပြဋ္ဌာန်းခဲ့ပြီး၊ ယင်းနိုင်ငံ့ ဝန်ထမ်းဥပဒေပုဒ်မ ၅၃ ဌာနဆိုင်ရာအရေးယူမှုများ၌ ဝန်ထမ်းများအပေါ်ချမှတ်နိုင်သည့်ပြစ်ဒဏ် ၉ မျိုးကို အတိအလင်းပြဋ္ဌာန်းထားရှိပါသည်။ ယင်းတို့မှာ စာဖြင့်သတိပေးခြင်း၊ နှစ်တိုးလစာရပ်ဆိုင်းခြင်း၊ ရာထူးတိုးမြှင့်ခြင်းကိုရပ်ဆိုင်းခြင်း၊ လစာနှုန်းအတွင်း လစာလျှော့ချခြင်း၊ ရာထူးအဆင့်လျှော့ချခြင်း၊ ပေါ့လျော့ မှုကြောင့်ဖြစ်စေ၊ အမိန့်နှင်‌့ညွှန်ကြားချက်များကို မလိုက်နာမှုကြောင့်ဖြစ်စေ၊ ပေါ်ပေါက်သည့် ဆုံးရှုံးမှုတန်းဖိုး အပြည့်အဝ သို့မဟုတ် တစ်စိတ်တစ်ဒေသကို ပေးလျော်စေခြင်း၊ တာဝန်မှ ယာယီရပ်ဆိုင်းခဲ့သည့် ကာလအတွက်  လစာအပြည့်ခံစားခွင့်မပြုခြင်း သို့မဟုတ် ထိုကာလကို တာဝန် ချိန်အဖြစ် မသတ်မှတ်ခြင်း၊ ရာထူးမှထုတ်ပယ်ခြင်း၊ ဝန်ထမ်းအဖြစ်မှ ထုတ်ပစ်ခြင်းတို့ဖြစ်ပါသည်။

သို့ဖြစ်ရာ ဝန်ကြီးဌာနနှင့် အဖွဲ့အစည်းအကြီးအမှူးများသည် ပြစ်မှုကျူးလွန်သောဝန်ထမ်းများအား ကျူးလွန်သည့် ပြစ်မှုနှင့် လျော်ညီသောပြစ်ဒဏ်ကို နိုင်ငံ့ဝန်ထမ်းဥပဒေနှင့်အညီ ချမှတ်နိုင်ပါကြောင်း၊ ပြည်ထောင်စု အစိုးရအဖွဲ့ရုံးမှလည်း ၁၉-၈-၂၀၁၃ ရက်စွဲပါစာအမှတ်၊ ၈/၁၅၂ လမ်းညွှန်/အဖရ (၂၀၁၃)ဖြင့် နိုင်ငံ့ဝန်ထမ်းများအား ပြစ်မှုကျူးလွန်ခြင်းအတွက် အရေးယူအပြစ်ပေးရန်ရှိပါက ၂၀၁၃ ခုနှစ် နိုင်ငံဝန်ထမ်းဥပဒေ အခန်း (၁၁) ပုဒ်မ ၅၃ ပါ ဝန်ထမ်းစည်းမျဉ်းစည်းကမ်းဆိုင်ရာ ပြစ်ဒဏ် ချမှတ်ခြင်းနှင့် အယူခံခြင်းတွင် သတ်မှတ်ပြဋ္ဌာန်းထားသည့် ပြစ်ဒဏ်များအတိုင်းသာ ဌာနအားလုံး တစ်ပြေးညီ အပြစ်ပေးအရေးယူ ဆောင်ရွက်သွားရန်ဖြစ်ကြောင်းကို ဝန်ကြီးဌာနများနှင့် ဗဟိုအဖွဲ့အစည်းအားလုံးသို့ ထပ်ဆင့်ညွှန်ကြားထားပြီး ဖြစ်ပါကြောင်း။

မေးခွန်းပါ တာဝန်မကျေ၊ စာရိတ္တပျက်သည်ဟု အရေးယူအပြစ်ပေးခံရသော ဝန်ထမ်းများကို ဝေးလံ ခက်ခဲသော ဒေသသို့ ပြောင်းရွှေ့ တာဝန်ပေးခြင်းသည် နိုင်ငံ့ဝန်ထမ်းဥပဒေတွင် ပြစ်ဒဏ် အမျိုးအစားတွင် ပြဋ္ဌာန်း သတ်မှတ်ထားခြင်း မရှိပါသဖြင့် ပြည်ထောင်စုရာထူးဝန်အဖွဲ့ အနေဖြင့် ပယ်ဖျက်ပေးရန် အစီအစဉ် မရှိပါကြောင်း ရှင်းလင်ဖြေကြားပါသည်။”