(ဋ) ပြည်ထောင်စုလမ်းမကြီး ပြန်လည်ပြုပြင်ပေးရန်နှင်‌့စပ်လျဉ်းသည့်မေးခွန်း

ဦးမောင်လှ(ပုလောမဲဆန္ဒနယ်)။ ။ လေးစားအပ်ပါသော ပြည်သူ့လွှတ်တော်ဥက္ကဋ္ဌကြီးနှင့် ပြည်ထောင်စုဝန်ကြီးများ၊ ပြည်သူ့လွှတ်တော်ကိုယ်စားလှယ်များ၊ ဧည့်သည်တော်များအားလုံး မင်္ဂလာပါလို့ နှုတ်ခွန်းဆက်သအပ်ပါတယ်။ ကျွန်တော်ကတော့ တနင်္သာရီတိုင်းဒေသကြီး၊ ပုလော မဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမောင်လှ ဖြစ်ပါတယ်။ ကျွန်တော်တို့ တနင်္သာရီတိုင်း ဒေသကြီးမှာ တောင်နှင့်မြောက်လမ်းအရှည် ၅၁၂ မိုင် ၆ ဖာလုံရှိသော ပြည်ထောင်စုလမ်းမကြီးသည် တောင်ဘက်ကော့သောင်းမြို့မှ မြောက်ဘက် ရေဖြူမြို့နယ်၊ ကလိန်အောင်မြို့နယ်ခွဲ မလွှဲတောင် နယ်စပ်အထိဖြစ်ပါသည်။ ပြည်ထောင်စုလမ်းမကြီးသည် တိုင်းရင်းသားညီအစ်ကို သွေးချင်းများ ချစ်ကြည်ရင်းနှီးကူးလူးဆက်ဆံသွားလာနိုင်ရန် မြန်မာနိုင်ငံတောင်ဘက်မှ  မြောက်ဘက်အဆုံး သွေးချင်းညီအစ်ကိုများဖြစ်သည့် မွန်၊ ကရင်မှစ၍ ရှမ်း၊ ကချင်အဆုံး တစ်နိုင်ငံလုံးဆက်စပ် ဖောက်လုပ်ထားသော ပြည်ထောင်စုလမ်းမကြီးဖြစ်ပါသည်။ ၎င်းပြည်ထောင်စုလမ်းမကြီးသည် တိုင်းရင်းသားညီအစ်ကိုများနေထိုင်သော အခြားပြည်နယ်/တိုင်းဒေသကြီးတွေမှာ လမ်းအပိုင်းများ ကောင်းမွန်၍ ကျွန်တော်တို့ တနင်္သာရီတိုင်းဒေသကြီးမှာ တောင်ဘက်ကော့သောင်းမြို့မှ ခမောက်ကြီး မြို့နယ်ခွဲ ယုဇနဆီအုန်းစိုက်ခင်းအထိ မိုင်၅၀ကိုသာ ကတ္တရာလမ်းအချောခင်းထားပြီး ခရသီရိမြို့နယ်ခွဲ မှ  ဘုတ်ပြင်း၊ ဘုတ်ပြင်းမှ ပြည်ကြီးမဏ္ဍိုင်မြို့နယ်ခွဲ၊ ပြည်ကြီးမဏ္ဍိုင်မြို့နယ်ခွဲမှ တနင်္သာရီ-မြိတ်အပိုင်း၊ မြိတ်မှ ပုလော၊ ပုလောမှပလောက်၊ ပလောက်မှ သရက်ချောင်းမြို့နယ်အပိုင်း၊ ရေဖြူ-ကလိန်အောင်၊ မလွှဲတောင်နယ်စပ်အထိ လမ်းအပိုင်းမှာ ပျက်စီးနေပြီ ဖြစ်ပါတယ်။ ကျွန်တော်တို့ တနင်္သာရီတိုင်း ဒေသကြီးသည် မိုးရေချိန်လက်မများသည်‌့အပြင် တစ်နှစ်လျှင် မိုးရှစ်လခန့် ရွာသွန်းသည့်အတွက် ကြောင့်လမ်းများသည် ချိုင့်မှချောက်များ ဖြစ်သွားရပါသည်။ ကလိန်အောင်နှင့်ထားဝယ် နှစ်နာရီ ခရီးကို ငါးနာရီလောက်သွားရသဖြင့် အချိန်ကြာမြင့်ပြီး အခြားလမ်းအပိုင်းတွေမှာလည်း ယခုအတိုင်း ဖြစ်နေ၍ တနင်္သာရီတိုင်းဒေသကြီးရှိ ပြည်ထောင်စုလမ်းမကြီးသည် အခြားသော ပြည်နယ်/ တိုင်းဒေသကြီးအသီးသီးမှ ပြည်သူများနှင့်ကုန်စည်များ တနင်္သာရီတိုင်းဒေသကြီးအတွင်းသို့ လည်းကောင်း၊ တနင်္သာရီတိုင်းဒေသကြီးမှ ကုန်စည်များကို အခြားပြည်နယ်တိုင်းဒေသကြီး အသီးသီး သို့လည်းကောင်း ကူးလူးဆက်သွယ်ပို့ဆောင်ရာတွင် အသုံးပြုလျက်ရှိသည့် တစ်ခုတည်းသော ပြည်ထောင်စုလမ်းမကြီး ဖြစ်ပါတယ်။ မိုးရာသီရောက်တိုင်း ရာသီဥတုဆိုးရွားမှုကြောင့် ကုန်ပစ္စည်း များအား ရေကြောင်းလမ်းမှ သယ်ယူရန် ကန့်သတ်ချက်များရှိပါသဖြင့် ပြည်ထောင်စုလမ်းမကြီးကိုသာ အားကိုးအားထားပြုလျက် မော်တော်ယာဉ်များဖြင့် သယ်ယူပို့ဆောင်ရပါတယ်။ အကယ်၍ မိုးရာသီတွင် အကြောင်းအမျိုးမျိုးကြောင့် ပြည်ထောင်စုလမ်းမကြီးပြတ်တောက်သွားပါက ကုန်စည်စီးဆင်းမှု ရပ်တန့်သွားနိုင်ပြီး အကျိုးဆက်များအဖြစ် ကုန်ဈေးနှုန်းကြီးမြင့်ခြင်း၊ ကုန်ပစ္စည်းရှားပါးပြတ်လပ်ခြင်း နှင့် ဒေသခံစီးပွားရေးထိခိုက်နစ်နာမှုများဖြစ်ပေါ်လာနိုင်ပါသည်။ ရေး-ချောင်း-ထားဝယ်-ရေဖြူပိုင်းမှာ သွားလာနိုင်သည်‌့အဆင့်ရှိပြီး ရေး-ချောင်း-ပုလော-မြိတ်-ထားဝယ်-ဘုတ်ပြင်း-ခမောက်ကြီးလမ်းပိုင်းမှာ ယိုယွင်းပျက်စီးနေသဖြင့် ရန်ကုန်-မြိတ်တစ်ညအိပ်နှစ်ရက်ခရီးကို နှစ်ညအိပ်သုံးရက်ခရီးသွားလာ နေရ၍ ခရီးသွားပြည်သူများအချိန်ကြာမြင့်သဖြင့် ပင်ပန်းဒုက္ခကြီးစွာသွားလာနေရပါသည်။ လမ်း အပိုင်းအလိုက် ထိန်းသိမ်းပြီး B.O.T စနစ်မရှိသဖြင့် အလွန်ပျက်စီးလျက်ရှိနေကြောင်း တွေ့ရှိရ ပါသည်။ ပြည်ထောင်စုလမ်းမကြီး၏ ထားဝယ်-ရေးကားလမ်းမိုင်တိုင်အမှတ် ၄၆/၁ အနီးရှိ ၆၀၄ ပေအရှည်တံတားအမှတ် ၁/၄၇ ကလိန်အောင်တံတား၊ မိုင်တိုင်အမှတ် ၄၆/၃ အနီးရှိ ၁၆၀ ပေ အရှည်တံတားအမှတ် ၃/၄၇ တံတားဖြူတံတားတို့သည် အင်္ဂလိပ်လက်ထက် ၁၉၃၉ ခုနှစ်ကတည်းက တည်ဆောက်ထားသော အောက်ခြေအမျိုးအစားကွန်ကရစ်၊ အပေါ်ထပ်အမျိုးအစား သံပေါင် သစ်သားခင်းတံတားများ ဖြစ်ကြပါသည်။ အဆိုပါတံတားနှစ်စင်း၏ကြံ့ခိုင်မှုအား နှစ်စဉ်စိစစ်လျက် လိုအပ်ချက်များအား ပြင်ဆင်ပေးလျက်ရှိပါသော်လည်း တံတားများမှာသက်တမ်းအားဖြင့် ၇၃ နှစ် ရှိပြီဖြစ်ကြောင်းနှင့် ကြံ့ခိုင်မှုအခြေအနေမှာအန္တရာယ်ရှိနိုင်သည်‌့ အနေအထားတွင်ရောက်ရှိနေ ပါသည်။ အဆိုပါတံတားသည် ကျွန်တော်တို့ တနင်္သာရီတိုင်းဒေသကြီးနှင့် အခြားပြည်နယ်/တိုင်း ဒေသကြီးများဆက်သွယ်ရာတစ်ခုတည်းသော ပြည်ထောင်စုလမ်းမကြီးအပေါ်တွင်ရှိပြီး ၎င်းတံတား ပြိုကျပျက်စီးခဲ့မည်ဆိုပါက လမ်းလွှဲပြုလုပ်ရန် အလွန်ပင်ခက်ခဲကြောင်း အဆိုပါတံတားနှစ်စင်းအား အမြဲတမ်းသံကူကွန်ကရစ်တံတားအဖြစ်အသစ်တည်ဆောက်ပေးရန် အစီအစဉ် ရှိ၊ မရှိ။ ပြည်ထောင်စု လမ်းမကြီးကိုလည်း အခြားပြည်နယ်/တိုင်းဒေသကြီးလမ်းများကဲ့သို့ အဆင့်မြင့်လမ်းမကြီးများအဖြစ် ပြုပြင်ပေးရန် အစီအစဉ်ရှိ၊ မရှိ။ အကယ်၍အစီအစဉ်ရှိပါကမည်သည်‌့အချိန်တွင်ဆောင်ရွက်ပေးမည်။ ပြည်ထောင်စုလမ်းမကြီးဖြစ်သဖြင့် ပြည်ထောင်စုအစိုးရမှ ဦးစားပေးဆောင်ရွက်ပေးပါရန် တနင်္သာရီ တိုင်းဒေသကြီး ပြည်သူလူထုရဲ့ဆန္ဒအရ‌ လေးစားစွာတင်ပြထားပါသည်။

ဖြေကြားသူ
ဦးခင်မောင်မြင့် ပြည်ထောင်စုဝန်ကြီး
ဖြေကြားသည့် ဝန်ကြီးဌာန
အဖြေ

 လေးစားအပ်ပါသော ပြည်သူ့လွှတ်တော်ဥက္ကဋ္ဌကြီးနှင့် ပြည်သူ့လွှတ်တော်ကိုယ်စားလှယ်များခင်ဗျား။ တနင်္သာရီတိုင်း ဒေသကြီး၊ ပုလောမဲဆန္ဒနယ်မှ ပြည်သူ့လွှတ်တော်ကိုယ်စားလှယ် ဦးမောင်လှ(ခ) ဦးလှမြင့်ကနေပြီး တင်ပြသွားသော တနင်္သာရီတိုင်းဒေသကြီး တောင်နှင့်မြောက်လမ်းအရှည် ၅၁၂ မိုင် ၆ ဖာလုံကို ပြည်ထောင်စုလမ်းမကြီးအဖြစ် ကော့သောင်းမြို့ကနေပြီး မလွှဲတောင်နယ်စပ်အထိဖောက်လုပ်ထား တဲ့ လမ်းမကြီးကို ပြည်ထောင်စုအစိုးရကနေပြီး ဦးစားပေးဆောင်ရွက်ပေးရန်အခြေအနေရှိ၊ မရှိ သိလို တဲ့မေးခွန်းကို ကျွန်တော့်အနေနဲ့ရှင်းလင်းဖြေကြားသွားမှာဖြစ်ပါတယ်။ ပြည်သူ့လွှတ်တော်ဥက္ကဋ္ဌကြီး ခင်ဗျား။ တနင်္သာရီတိုင်းဒေသကြီးအတွင်း ရန်ကုန်-မြိတ် ပြည်ထောင်စုလမ်းမကြီးဟာ မလွှဲတောင်မှ ကော့သောင်းမြို့အထိ မြောက်မှတောင်သို့ ၅၁၂ မိုင် ၆ ဖာလုံ ရှည်လျားပါတယ်။ ၂၀၁၁-၂၀၁၂ ဘဏ္ဍာရေးနှစ်မှာ တနင်္သာရီတိုင်းဒေသကြီးတွင် မိုးတွင်းကာလ မိုးရွာသွန်းမှုများပြားခြင်းကြောင့်မို့ လမ်းတွေ၊ တံတားတွေဟာ လွန်စွာမှပျက်စီးခဲ့ပါတယ်။ ဒီဟာတွေကို စစ်ဆေးနိုင်ဖို့အတွက် ရုံးချုပ်က နေပြီးတော့ပုဂ္ဂိုလ်များနှင့် ပြည်နယ်အတွင်းမှာရှိတဲ့ အင်ဂျင်နီယာများပါဝင်တဲ့ စစ်ဆေးရေးအဖွဲ့တွေ ဖွဲ့စည်းပြီးတော့ ကွင်းဆင်းစစ်ဆေးဆောင်ရွက်ခဲ့ပါတယ်။ ၎င်းစစ်ဆေးချက်အရ ရန်ကုန်-မြိတ်လမ်း ပျက်စီးမှုများပြုပြင်ပြီး လမ်းအဆင့်မြှင့်တင်ရေးလုပ်ငန်းများ ဆောင်ရွက်ရေးတို့ကို ဆောက်လုပ်ရေး ဝန်ကြီးဌာနကနေဆောင်ရွက်ခဲ့ပါတယ်။ အဲ့ဒီ မိုးတွင်းပျက်စီးမှုများကို အချိန်တိုကာလအတွင်းမှာ ပြုပြင်ပေးတဲ့အတွက် လက်ရှိခရိုင်အထူးအဖွဲ့များအပြင် ဆောက်လုပ်ရေးဝန်ကြီးဌာနကနေပြီးတော့ ရန်ကုန်မှာရှိနေသော လမ်းအထူးအဖွဲ့ ၁၆ ကို ထားဝယ်သို့ အပြီးရွှေ့ပြောင်းလိုက်ပြီ ဖြစ်ပါတယ်။ ထို့အတူပဲ တံတားတည်ဆောက်ရေးလုပ်ငန်းအထူးအဖွဲ့ ၁၆ ဟာ အမ်းမြို့မှာရှိပါတယ်။ ၎င်း အဖွဲ့ကိုပဲ အမ်းမြို့ကနေပြီးတော့ မြိတ်ကိုအပြီးရွှေ့ပြောင်းလိုက်ပြီ ဖြစ်ပါတယ်။ အထူးအဖွဲ့ ၂ဖွဲ့ကို တနင်္သာရီတိုင်း ဒေသကြီးမှာ အားဖြည့်ပြီးတော့ ဆောင်ရွက်လျက်ရှိပါတယ်။ ဒါကြောင့် ထားဝယ်-မလွှဲတောင်အပိုင်း ဝ/၀ မိုင်ကနေပြီးတော့ ၃၀/၀ မိုင်အထိ မိုင် ၃၀ ကို ထားဝယ်ခရိုင်က လည်းကောင်း၊ မိုင်တိုင် ၃၀/၀ ကနေပြီးတော့ ၈၁/၆ အထိ ၅၁ မိုင် ၆ ဖာလုံကို လမ်းဖောက်လုပ်ရေး အထူးအဖွဲ့ ၁၆ က လည်း ကောင်း၊ ထားဝယ်-မြိတ်အပိုင်း ဝ/၀ မိုင်မှ ၄၅/၀ အထိ ၄၅ မိုင်ကို ထားဝယ်ခရိုင်ကလည်းကောင်း၊ မိုင်တိုင် ၄၅/၀ မှ ၉၅/၀ အထိ ၅၀ မိုင်ကို လေယာဉ်ကွင်းဆောက်လုပ်ရေးအထူးအဖွဲ့ ၆ က လည်းကောင်း၊ မိုင်တိုင် ၉၅/၀ မှ ၁၅၄/၆ အထိ ၅၉ မိုင် ၆ ဖာလုံကို မြိတ်မြို့ရှောင် ကွင်းလမ်း ၅၀ မိုင် ၄ ဖာလုံကို မြိတ်မြို့အဖွဲ့ကလည်းကောင်း ၁-၁၁-၂၀၁၁ ရက်နေ့မှာ လမ်းတိုးတက်ရေးအတွက် အားလုံးတာဝန်တွေခွဲပေးပြီးဖြစ်ပါတယ်။ မလွှဲတောင်မှ ကော့သောင်းအထိလမ်းပိုင်းများကို ဆောင်ရွက် ရန်အတွက်လည်း ယန္တရား ၉၄ စီးပို့ထားပြီးဖြစ်ပါတယ်။ မြေထိုးစက် ၈ စီး၊ မြေတူးကော်တင်စက် ၅ စီး၊ မြေတင်စက် ၆ စီး၊ မြေညှိစက် ၇ စီး၊ မြေသယ်ယာဉ် ၃၁ စီး၊ လမ်းကြိတ်စက် ၃၃ စီး၊ မြေသိပ်သည်း စက် ၂ စီး၊ ရေသယ်ယာဉ် ၂ စီးတို့ဖြစ်ပါတယ်။ ၂၀၁၁-၂၀၁၂ ဘဏ္ဍာရေးနှစ်ခွဲဝေ ရန်ပုံငွေအရ ငွေလုံးငွေရင်းရန်ပုံငွေကနေပြီးတော့ လုပ်ခဲ့တဲ့လုပ်ငန်းများကို တင်ပြလိုပါတယ်။ ထားဝယ်နဲ့ မလွှဲတောင်လမ်းအပိုင်းမှာ တံတားအမှတ် ၄/၇၀ လော့သိုင်းတံတားကို သံကူကွန်ကရစ်တံတားအဖြစ် တည်ဆောက်ပေးခဲ့တာ တစ်စင်းရှိပါတယ်။ ထို့အတူပဲ တံတားအမှတ် ၁/၁၃ ကျောက်ကညာတံတား ကိုလည်း သံကူကွန်ကရစ်တံတားအဖြစ်တစ်စင်းတည်ဆောက်ပေးခဲ့ပါတယ်။ ထားဝယ်နှင့် မြိတ်လမ်း အပိုင်းမှာတော့ ၃၄ ပေအကျယ်မြေလမ်းတာပေါင်ချဲ့တာက ၁ မိုင် ၅ ဖာလုံဆောင်ရွက်ပေးခဲ့ပြီး ကတ္တရာလမ်းအနိမ့်အမြင့်ညှိဖို့အတွက် ရေပိတ်လွှာလောင်းခြင်းက ၁ မိုင် ၄ ဖာလုံ၊ ကတ္တရာလမ်း ထပ်ပိုးလွှာတင်တာက ၁ မိုင် ၁ ဖာလုံ၊ တံတားအမှတ် ၂/၆၁၊ ၂/၆၃၊ ၁/၁၁၁ တို့မှာ သံကူကွန်ကရစ် တံတားသုံးစင်းတည်ဆောက်ပေးခဲ့ပါတယ်။ ထို့အတူပဲ တနင်္သာရီနဲ့ ဘုတ်ပြင်းကြားမှာဆိုရင် ၁၂ ပေ အကျယ် ကျောက်လမ်းကနေ ကတ္ကရာလမ်းအဖြစ်တိုးချဲ့ပေးတာ ၁ မိုင် ၁ ဖာလုံဖြစ်ပါတယ်။ ၂၀၁၁-၂၀၁၂ ဘဏ္ဍာရေးနှစ်ခွဲဝေရန်ပုံငွေမှာ ပြင်ဆင်ထိန်းသိမ်းရေးရန်ပုံငွေနဲ့ လုပ်ခဲ့တဲ့လုပ်ငန်းများလည်းရှိ ပါတယ်။ အဲ့ဒီလုပ်ငန်းတွေကတော့ ထားဝယ်နဲ့ မလွှဲတောင်ကြားမှာ လမ်းအနိမ့်အမြင့်ညှိ၍ ကတ္တရာ ရေပိတ်လွှာလောင်းတာ ၃ မိုင် ၂ ဖာလုံ၊ လမ်းချိုင့်များအား ကျောက်ကတ္တရာလောင်းပြင်ဆင်တာ    ၃၉ မိုင် ၃ ဖာလုံ၊ ကျောက်၊ ဂဝံနဲ့ချိုင့်ပေါက်ဖာထေးတာက ၂၃ မိုင် ၆ ဖာလုံ၊ မြင့်တက်နေသောလမ်း ပခုံးများကို မြေညှိစက်ဖြင့်ညှိတာက ၈ မိုင် ၄ ဖာလုံ၊ ရေပြွန်များတည်ဆောက်ခြင်းက ၇ စင်း၊ သစ်သား တံတားများကြမ်းခင်းများနဲ့ ဘီးလမ်းများ၊ ယက်မများပြင်ဆင်တာ ၉ စင်းတို့လုပ်ခဲ့ပါတယ်။ ထို့အတူပဲ ထားဝယ်နှင့် မြိတ်လမ်းအပိုင်းမှာဆောင်ရွက်မှုကတော့ လမ်းအနိမ့်အမြင့်ညှိရာမှာ ကတ္တရာရေပိတ် လွှာလောင်းတာက ၆ မိုင် ၃ ဖာလုံ၊ ကျောက်ဂဝံနဲ့ချိုင့်ပေါက်များဖာထေးတာက ၃၉ မိုင် ၄ ဖာလုံ၊ ကတ္တရာထပ်ပိုးလွှာတင်တာက ၂ ဖာလုံ၊ လမ်းပခုံးများမြေညှိစက်ဖြင့်ဖြတ်ညှိတာက ၄၆ မိုင် ၁ ဖာလုံ၊ လမ်းဘေးဝဲယာရေနုတ်မြောင်းများတူးတာက ၃၇ မိုင် ၇ ဖာလုံ၊ ရေပြွန်များတည်ဆောက်တာက ၂၉ စင်းနှင့် သစ်သားတံတားတွေရဲ့ကြမ်းခင်း၊ ဘီးလမ်း၊ ယက်မများပြင်ဆင်တာက ၂၆ စင်းတို့ဖြစ်ပါတယ်။ ဒါ့အပြင် တနင်္သာရီနှင့် ဘုတ်ပြင်းလမ်းအပိုင်းဆောင်ရွက်ချက်ကတော့ လမ်းပေါက်များအား ကျောက် ကတ္တရာဖာထေးတာက ၁၄ မိုင် ၆ ဖာလုံ၊ တောင်ပြိုမြေဖယ်ရှားတာက ကျင်း ၂၀၀၀၊ ကျောက်ရော မြေခင်းပြီး လမ်းချောတာက ၂၃ မိုင် ၆ ဖာလုံ၊ သံကူကွန်ကရစ်တံတားတည်ဆောက်တာက ၄ စင်း၊ သစ်သားတံတားငယ်များတည်ဆောက်တာက ၈ စင်း၊ လမ်းသားပြိုကျတဲ့နေရာများမှာ မျောတိုင်ဖြင့် မြေထိန်းနံရံလုပ်တာက နှစ်နေရာ၊ သစ်သားတံတားများနှင့် တိုင်စင်အသစ်များလဲလှယ်တာက ၇ စင်း တို့လုပ်ခဲ့ပါတယ်။ ၂၀၁၁-၂၀၁၂ ဘဏ္ဍာရေးနှစ်မှာ ငွေလုံးငွေရင်းရန်ပုံငွေနဲ့ ပြင်ဆင်ထိန်းသိမ်းခြင်း ရန်ပုံငွေတို့ကနေပြီးတော့ ဆက်သွယ်သွားလာမှုမပြတ်တောက်စေရေးအတွက် လမ်းချောမွေ့စွာသွား လာနိုင်ရေး ဦးစားပေးဆောင်ရွက်ခဲ့တဲ့အခြေအနေကို စုပေါင်းတင်ပြရရင် လမ်းအနိမ့်အမြင့်ညှိ၍ ကတ္တရာရေပိတ်လွှာလောင်းခြင်းက ၁၁ မိုင် ၁ ဖာလုံ၊ ကတ္တရာထပ်ပိုးလွှာတင်ခြင်းက ၁ မိုင် ၃ ဖာလုံ၊ ကတ္တရာလမ်းသစ်ခင်းတာက ၁ မိုင် ၁ ဖာလုံ၊ လမ်းပေါက်လွှာများအား ကျောက်သဲဖာထေးတာက ၁၁၇ မိုင် ၃ ဖာလုံ၊ လမ်းတာပေါင် ၃၄ ပေအကျယ်ချဲ့တာက ၁ မိုင် ၅ ဖာလုံ၊ ပြင်ဆင်ထိန်းသိမ်းရေး လုပ်ငန်းများဆောင်ရွက်ခြင်းက ၁၁၆ မိုင်၊ သံကူကွန်ကရစ်တံတားတည်ဆောက်ခြင်းက ၉ စင်း၊ သစ်သားတံတားများပြုပြင်တာက ၄၂ စင်း၊ ရေထုတ်ပြွန်များလုပ်တာ ၃၆ စင်းတို့ကို ယခုပွင့်လင်း ရာသီမှာ အပြီးဆောင်ရွက်ခဲ့တဲ့အတွက် အဆင်ပြေစွာသွားလာနိုင်တာဖြစ်ပါတယ်။ ၂၀၁၂-၂၀၁၃ လာမယ့်ဘဏ္ဍာရေးနှစ်မှာ ငွေလုံးငွေရင်းရန်ပုံငွေကို မလွှဲတောင်ကနေ ကော့သောင်းအထိ ရန်ပုံငွေ ကျပ်သန်းပေါင်း ၁၄၁၄၂ သန်း၊ တစ်နည်းအားဖြင့်ပြောရင် ၁၄.၁၄၂ ဘီလီယံ တင်ပြထားပြီး ဖြစ်ပါ တယ်။ ၎င်းငွေရရှိမယ်ဆိုရင် ပေ ၄၀ အကျယ်လမ်းတာပေါင်ချဲ့ခြင်းက ၈၃ မိုင် ၄ ဖာလုံ၊ ကျောက်စီ ရေမြောင်းနှင့် မြေထိန်းနံရံဖြတ်လမ်းငယ်များနှင့် ပေ ၅၀ အောက်တံတားများတည်ဆောက်ခြင်းက ၁၄၉ စင်း၊ ကတ္တရာလမ်းအနိမ့်အမြင့်တည်ဆောက်ခြင်းက ၆၂ မိုင် ၆ ဖာလုံ ဆောင်ရွက်သွားမှာ ဖြစ်ပါတယ်။ မြိတ်-တနင်္သာရီလမ်းအပိုင်း ၅၀ မိုင်နှင့် ၅ ဖာလုံကိုတော့ ကော့သောင်းကနေ ခမောက် ကြီးမြို့နယ်ခွဲအဆုံး ၅၀ မိုင်ကိုတော့ ယုဇနဆောက်လုပ်ရေးကုမ္ပဏီကနေပြီးတော့ B.O.T စနစ်နဲ့ လမ်းတံတားမြှင့်တင်ခြင်းများဆောင်ရွက်နေပါတယ်။ လမ်းတစ်လျှောက်မှာရှိတဲ့ အဖွဲ့အစည်းအသီးသီး ဟာကတ္တရာလမ်းအဆင့်ထိန်းတဲ့နေရာမှာပြင်ဆင်ခြင်း၊ထိန်းသိမ်းခြင်းလုပ်ငန်းများ ဆောင်ရွက်ပြီးတော့ ကတ္တရာအဆင့်မြှင့်တင်ခြင်းလုပ်ငန်းများကိုလည်းဆောင်ရွက်ပေးမှာဖြစ်ပါတယ်။

          ပြည်သူ့လွှတ်တော်ဥက္ကဋ္ဌကြီးခင်ဗျား။ဆောက်လုပ်ရေးဝန်ကြီးဌာနအနေနဲ့ ယခင်ဘဏ္ဍာရေးနှစ် တွေက ရန်ပုံငွေအ‌ြခေအနေအရလုပ်ငန်းအပေါ်မူတည်ပြီးငွေလုံးငွေရင်းရန်ပုံငွေနှင့်ပြင်ဆင်ထိန်းသိမ်း ရေးရန်ပုံငွေတို့ဖြင်‌့ တစ်လမ်းလုံးချောမွေ့စွာသွားလာနိုင်ရေးအတွက် လုပ်ငန်းကိုသာ ဦးစားပေး ဆောင်ရွက်ရတဲ့အတွက် လမ်းအဆင့်မြှင့်တင်ခြင်းလုပ်ငန်းဆောင်ရွက်မှုကတော့ အားနည်းခဲ့တာဖြစ် ပါတယ်။ လမ်းများအဆင့်မြှင့်တင်ခြင်းဟာလည်း တဖြည်းဖြည်းနိမ့်ကျခဲ့ပါတယ်။ ၂၀၁၂-၂၀၁၃ ဘဏ္ဍာရေးနှစ်မှာ နှစ်တိုနှစ်ရှည်စီမံကိန်းများချမှတ်ပြီး လမ်းအဆင့်မြှင့်တင်ခြင်းလုပ်ငန်းများကို စီမံကိန်းအလိုက်တိုးမြှင့်ဆောင်ရွက်သွားမှာဖြစ်ပါတယ်။ ယခုတင်ပြခဲ့တဲ့လမ်းပိုင်းဟာ မြန်မာနိုင်ငံရဲ့ ပြည်ထောင်စုလမ်းမကြီးဖြစ်တာနှင့်အညီ ၂၄ ပေအကျယ်ကတ္တရာလမ်းမကြီးအဖြစ်မျှော်မှန်းပြီးတော့ အိမ်နီးနားချင်းနိုင်ငံများနှင့် အဆင့်မီလမ်းမကြီးဖြစ်ရန်အတွက် စီမံဆောင်ရွက်သွားမည်ဖြစ်ကြောင်း ရှင်းလင်းတင်ပြ‌ဖြေကြားထားပါသည်။