ဒုတိယအကြိမ် ပြည်သူ့လွှတ်တော် အဋ္ဌမပုံမှန်အစည်းအဝေး (၁၄) ရက်မြောက်နေ့ အစည်းအဝေးမှတ်တမ်း အကျဉ်းချုပ်

 

ပြည်ထောင်စုသမ္မတမြန်မာနိုင်ငံတော်

 

ဒုတိယအကြိမ် ပြည်သူ့လွှတ်တော် အဋ္ဌမပုံမှန်အစည်းအဝေး (၁၄)ရက်မြောက်နေ့

 

အစည်းအဝေးမှတ်တမ်းအကျဉ်းချုပ်

 

(၂၀၁၈ ခုနှစ်၊ ဇွန်လ ၁၃ ရက်)

၁။       ဒုတိယအကြိမ် ပြည်သူ့လွှတ်တော် အဋ္ဌမပုံမှန်အစည်းအဝေး (၁၄)ရက်မြောက်နေ့ကို        ၂၀၁၈ ခုနှစ်၊ ဇွန်လ  ၁၃ ရက်နေ့ နံနက် ၁၀ နာရီ အချိန်တွင် စတင်ကျင်းပပြီး တက်ရောက်ခွင့်ရှိသူ လွှတ်တော်ကိုယ်စားလှယ်(၄၃၁)ဦးအနက် (၃၈၇)ဦးတက်ရောက်သည်။

၂။       လွှတ်တော်အစည်းအဝေးတွင် ပြုလုပ်ခဲ့သည့်ဆောင်ရွက်ချက်များမှာ အောက်ပါအတိုင်း ဖြစ်ပါသည်-

(က)   ကြယ်ပွင့်ပြမေးခွန်း(၆)ခုမေးမြန်းဖြေကြားခြင်း

          (၁)    ဒေါက်တာဦးခင်မောင်သင်း၊ အရာတော်မဲဆန္ဒနယ်မှ မေးမြန်းသော ပြည်တွင်း ပြည်ပ ပညာရှင်များပါဝင်သော စီးပွားရေးညီလာခံတစ်ရပ်ကျင်းပပြီး အမှန်တကယ် အလုပ်ဖြစ်နိုင်မည့် မဟာဗျူဟာတစ်ရပ်ဖော်ထုတ်နိုင်ရန် အစီအစဉ်ရှိ၊ မရှိ မေးခွန်း နှင့်စပ်လျဉ်း၍ စီမံကိန်းနှင့်ဘဏ္ဍာရေးဝန်ကြီးဌာန ဒုတိယဝန်ကြီး ဦးမောင်မောင်ဝင်း က နိုင်ငံတော်က ဆောင်ရွက်လျက်ရှိသည့် MSDP နှင့် PIP လုပ်ငန်းစဉ်များကို ပြည်တွင်းပြည်ပပညာရှင်များနှင့် စဉ်ဆက်မပြတ် ဆွေးနွေးဆောင်ရွက် ဖော်ထုတ် ခြင်းအားဖြင့်  ပကတိအခြေအနေကိုထင်ဟပ်ပြီး အမှန်တကယ်အလုပ်ဖြစ်နိုင်မည့် မဟာဗျူဟာတစ်ရပ်ကို ရရှိလာနိုင်ရန် မျှော်မှန်းဆောင်ရွက်လျက် ရှိပါကြောင်း ပြန်လည် ဖြေကြားခဲ့သည်။

          (၂)    ဦးမောင်မြင့်၊ မင်းကင်းမဲဆန္ဒနယ်မှ မေးမြန်းသော ၂၁-၂-၂၀၁၈ ရက်နေ့ထုတ် မြန်မာ့အလင်းသတင်းစာတွင် မည်သည့်အတွက် Zero Line, Zero Line Area, No Man Land စကားလုံးများသုံးစွဲရသည်ကို ရှင်းပြပါရန်နှင့် အဆိုပါ Zero Line Area တွင် နေထိုင်သူများမရှိစေရေး မည်ကဲ့သို့ဆောင်ရွက်သွားမည်ကို   သိလိုခြင်းမေးခွန်းနှင့်စပ်လျဉ်း၍ ပြန်ကြားရေးဝန်ကြီးဌာန ဒုတိယဝန်ကြီး ဦးအောင်လှထွန်း က Zero Line, Zero Line Area, No Man Land စကားလုံး များကို သုံးစွဲဖော်ပြခဲ့ခြင်းနှင့်စပ်လျဉ်း၍ စိစစ်ခဲ့ပြီး သတင်းရယူခဲ့သည့် သတင်း ထောက်အပါအဝင် အယ်ဒီတာအဖွဲ့အဆင့်ဆင့်က စိစစ်၊ ထောက်ပြ၊ ပြင်ဆင်ရန် အားနည်းခဲ့ခြင်းကြောင့် တရားဝင်အသုံးအနှုန်းဖြစ်သည့် နယ်နိမိတ်မျဉ်း (Boundary Line)ကို မဖော်ပြနိုင်ခဲ့တာဖြစ်ကြောင်း တွေ့ရှိရပြီး နောင်အလားတူ မဖြစ်စေရန် စီစဉ်ဆောင်ရွက်ထားရှိပြီးဖြစ်ပါကြောင်း၊ Zero Line Area တွင် နေထိုင်သူများမရှိစေရေးအတွက် ပြည်ထဲရေးဝန်ကြီးဌာန၊ နိုင်ငံခြားရေးဝန်ကြီး ဌာန၊ ရခိုင်ပြည်နယ်အစိုးရအဖွဲ့အပါအဝင် သက်ဆိုင်ရာအစိုးရအဖွဲ့အစည်းများက တည်ဆဲဥပဒေများနှင့်အညီ ညှိနှိုင်းဆောင်ရွက်လျက်ရှိပါကြောင်း ပြန်လည်ဖြေကြား ခဲ့သည်။

(၃)    ဦးတင်ကိုကိုဦး(ခ) ဦးအတွတ်၊ ဘီးလင်းမဲဆန္ဒနယ်မှ မေးမြန်းသော  နိုင်ငံအတွင်း နေထိုင်သူအားလုံးအား ID နံပါတ်တစ်ခုချင်းစီဖြင့် Database တည်ဆောက်ခြင်းကို ဦးစားပေး ဆောင်ရွက်ပေးရန် အစီအစဉ်ရှိ၊မရှိမေးခွန်းနှင့်စပ်လျဉ်း၍ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ က NEID စနစ်စီမံကိန်း အကောင်အထည်ဖော်ဆောင်ရွက်နိုင်ရန် လေ့လာဆန်းစစ်ခြင်း၊ စမ်းသပ်ဆောင်ရွက်ခြင်း၊ မူဝါဒရယူခြင်းနှင့်ကော်မတီများ ဖွဲ့စည်းခြင်းလုပ်ငန်းများကို နိုင်ငံတော်အစိုးရ၏ လမ်းညွှန်ချက်နှင့် အညီ ဆောင်ရွက်လျက်ရှိပြီး နိုင်ငံအတွင်းနေထိုင်သူအားလုံးကို  ID နံပါတ်တစ်ခုချင်းစီဖြင့် Database တည်ဆောက်ခြင်းကို ဦးစားပေးလုပ်ငန်းအဖြစ် ဆောင်ရွက်လျက်ရှိပါကြောင်း ပြန်လည်ဖြေကြား ခဲ့သည်။

(၄)    ဦးဖေသန်း၊ မြေပုံမဲဆန္ဒနယ်မှ မေးမြန်းသော ရခိုင်ပြည်နယ်အတွင်းရှိ စာရင်း မကောက်ယူနိုင်သေးသော ဘင်္ဂါလီ ခန့်မှန်းလူဦးရေ(၁၀၉၀၀၀၀)ဦး စာရင်းကို မည်သို့တွက်ချက်ရယူခဲ့ပြီး မည်မျှတိကျမှန်ကန်မှုရှိပါသနည်း၊ လူဦးရေစာရင်းကို အတိအကျရရှိအောင် မည်ကဲ့သို့ ဆက်လက်ဆောင်ရွက်သွားမည်နှင့် နိုင်ငံသားစိစစ် ရေးလုပ်ငန်းများ အောင်မြင်စွာပြီးစီးနိုင်ရန် မည်သို့အရေးယူဆောင်ရွက်သွားမည် တို့ကို သိလိုခြင်းမေးခွန်းနှင့်စပ်လျဉ်း၍ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ က ၂၀၁၄ ခုနှစ်၊ သန်းခေါင်စာရင်းကောက်ယူခြင်း လုပ်ငန်းဆောင်ရွက်ရာမှာ နိုင်ငံတော်မှ အသိ အမှတ်မပြုသည့် လူမျိုးအမည်ကို ဖြေဆိုခွင့်မရရှိသည့်အတွက် စာရင်းအကောက် မခံသည့် ဒေသများမှ လူဦးရေကိုခန့်မှန်းရာမှာ မြေပုံရေးဆွဲခြင်းလုပ်ငန်းမှရရှိသည့် လူဦးရေကိုအခြေခံ၍ ခန့်မှန်းခဲ့ခြင်းဖြစ်ပါကြောင်းနှင့် ရခိုင်ပြည်နယ် တည်ငြိမ် အေးချမ်းမှုနှင့် ဖွံ့ဖြိုးတိုးတက်မှု အကောင်အထည်ဖော်ရေး ဗဟိုကော်မတီ၏ လမ်းညွှန်ချက်ကိုခံယူပြီး ၁၉၈၂ ခုနှစ်၊ မြန်မာနိုင်ငံသားဥပဒေနှင့်အညီ နိုင်ငံသား စိစစ်ရေးလုပ်ငန်းစဉ်နှင့် နိုင်ငံသားစိစစ်ရေးလုပ်ငန်းများကို စဉ်ဆက်မပြတ် ဆောင်ရွက်လျက်ရှိပြီး လုပ်ငန်းများအောင်မြင်စွာ ဆောင်ရွက်နိုင်ရန်အတွက် စီမံ ခန့်ခွဲရေးနည်းလမ်း၊ အုပ်ချုပ်ရေးနည်းလမ်းနှင့် အမျိုးသားအကျိုးစီးပွားကို အမြင့်မားဆုံးဖော်ဆောင်နိုင်မည့် နည်းလမ်းတို့ဖြင့် တည်ဆဲဥပဒေများနှင့်အညီ ဆက်လက်ဆောင်ရွက်လျက်ရှိပါကြောင်း  ပြန်လည်ဖြေကြားခဲ့သည်။

(၅)    ဒေါက်တာဒေါ်ခင်စည်သူ၊ လွိုင်ကော်မဲဆန္ဒနယ်မှ မေးမြန်းသော ကယားပြည်နယ် နယ်စပ်ကုန်သွယ်ရေးစခန်းမှ မြန်မာ၊ ထိုင်း နှစ်နိုင်ငံနယ်စပ်ဝင်ပေါက် BP-13 မှတစ်ဆင့် လွိုင်ကော်မြို့အထိ နှစ်ဖက်နိုင်ငံခရီးသွားများအား တရားဝင်လုံခြုံစွာ ခရီးသွားလာခွင့်ရရှိနိုင်ရေးအတွက် ပြည်ထောင်စုအဆင့်နှင့် ပြည်နယ်အဆင့်မှ နယ်စပ် ဖြတ်သန်းသွားလာခွင့်ပြုပေးရန် အစီအစဉ် ရှိ၊ မရှိ မေးခွန်းနှင့်စပ်လျဉ်း၍ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စု ဝန်ကြီး ဦးသိန်းဆွေ က လတ်တလောမှာ တရားဝင်နယ်စပ်ဖြတ်သန်းသွားလာ ခွင့်အား ခွင့်ပြုပေးရန် အစီအစဉ်မရှိသေးပါကြောင်းနှင့် တစ်ဖက်နိုင်ငံနှင့် ညှိနှိုင်း ဆောင်ရွက်လျက်ရှိပါကြောင်း ပြန်လည်ဖြေကြားခဲ့သည်။

          (၆)    ဒေါ်ခင်စောဝေ၊ ရသေ့တောင်မဲဆန္ဒနယ်မှ မေးမြန်းသော မြန်မာနိုင်ငံအတွင်း နေထိုင်လျက်ရှိသည့် ကမန်လူမျိုး လူဦးရေ စုစုပေါင်းနှင့် မြို့နယ်အလိုက် ကမန် လူဦးရေ မည်မျှရှိသည်ကို သိလိုခြင်းမေးခွန်းနှင့်စပ်လျဉ်း၍ အလုပ်သမား၊ လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေ က အမြန်ဆုံးထုတ်ပြန်နိုင်အောင် သက်ဆိုင်ရာအဖွဲ့အစည်းများနှင့် ပူးပေါင်းပြီး ကြိုးစားလျက်ရှိပါကြောင်း ပြန်လည်ဖြေကြားခဲ့သည်။

(ခ)    အဆို (၁) ခု ဆွေးနွေးခြင်းနှင့် လွှတ်တော်၏ အဆုံးအဖြတ်ရယူခြင်း

ဦးမြင့်သိန်း၊ ဝက်လက်မဲဆန္ဒနယ်က တင်သွင်းသည့် နိုင်ငံတော်အတွက် ရသင့် ရထိုက်သည့် အခွန်အကောက်များ အပြည့်အဝရရှိရေးအတွက် ပွင့်လင်းမြင်သာစွာဖြင့် စနစ်တကျစိစစ်ကြပ်မတ်ကောက်ခံပေးနိုင်ရေး ပြည်ထောင်စုအစိုးရအား တိုက်တွန်း ကြောင်းအဆိုကို ကိုယ်စားလှယ်(၁၁)ဦးမှဆွေးနွေးပြီး လွှတ်တော်က အတည်ပြုကြောင်း  ဆုံးဖြတ်ခဲ့သည်။

(ဂ)    ဥပဒေကြမ်း(၂)ခု နှင့်စပ်လျဉ်း၍ လွှတ်တော်၏အဆုံးအဖြတ်ရယူခြင်း

        (၁) ပြည်သူ့လွှတ်တော်၊ သယံဇာတနှင့် သဘာဝပတ်ဝန်းကျင်ထိန်းသိမ်းရေးဆိုင်ရာ ကော်မတီက တင်သွင်းသော မြန်မာ့ပုလဲလုပ်ငန်းဥပဒေကို ဒုတိယအကြိမ် ပြင်ဆင်သည့်ဥပဒေကြမ်း ကို ဥပဒေကြမ်းကော်မတီ၏ အစီရင်ခံစာတင်ပြချက် အတိုင်း ပြင်ဆင်ချက်ဖြင့်အတည်ပြုကြောင်းနှင့်  ၂၀၁၃ ခုနှစ်၊ ပြည်သူ့လွှတ်တော် ဆိုင်ရာ နည်းဥပဒေ ၁၉၁ အရ ဆက်လက်ဆောင်ရွက်သွားမည်ဖြစ်ကြောင်း ကြေညာသည်။

          (၂)  အမျိုးသားလွှတ်တော်က ပြင်ဆင်ချက်ဖြင့် အတည်ပြု၍ပေးပို့လာသော မြေလွတ်၊ မြေလပ်နှင့် မြေရိုင်းများစီမံခန့်ခွဲရေးဥပဒေကို ပြင်ဆင်သည့် ဥပဒေကြမ်း(၂၀၁၇ ခုနှစ်) တစ်ရပ်လုံးကို ပြင်ဆင်ထားသည့်  အပိုဒ်၊ အပိုဒ်ခွဲများအတိုင်း အတည်ပြု ကြောင်းနှင့် ၂၀၁၃ ခုနှစ်၊ ပြည်သူ့လွှတ်တော်ဆိုင်ရာနည်းဥပဒေ ၂၀၀ အရ ဆက်လက်ဆောင်ရွက်သွားမည်ဖြစ်ကြောင်း ကြေညာသည်။

          ၃။       အစည်းအဝေးကို မွန်းလွဲ ၁၄ နာရီ  ၃၀ မိနစ်တွင်ရပ်နားပြီး ဒုတိယအကြိမ် ပြည်သူ့လွှတ်တော် အဋ္ဌမပုံမှန်အစည်းအဝေး (၁၅)ရက်မြောက်နေ့ ကျင်းပမည့်ရက်ကို ၁၅.၆.၂၀၁၈ ရက် (သောကြာနေ့) နံနက်  ၁၀ နာရီတွင် လျာထားပါသည်။