(င)-ဒေသဖွံ့ဖြိုးတိုးတက်ရေးစီမံကိန်းများအရသိမ်းယူခဲ့သော လယ်ယာမြေများကို လယ်ယာမြေဥပဒေ နှင့်အညီဖြစ်စေရန်နှင့်စပ်လျဉ်းသည့်မေးခွန်း

 

တစ်နိုင်ငံလုံးမှာ ဒီမိုကရေစီပြုပြင်ပြောင်းလဲရေးအတွက် အားလုံးဟာ ဒီမိုကရေစီရင့်ကျက်အောင်လို့ ကျွန်တော်တို့ လေ့ကျင့်ပျိုးထောင်ကြိုးစားဆောင်ရွက်နေတဲ့အချိန်မှာ အုပ်ချုပ်ရေးပိုင်းတာဝန်ရှိတဲ့ လူတွေအနေနဲ့ တည်ဆဲဥပဒေတွေကို အသေးအဖွဲလို့သဘောမထားဘဲနဲ့ ထိန်းသိမ်းကြပ်မတ်စေလိုတဲ့ ရည်ရွယ်ချက်နဲ့ မေးခွန်း ၃ ခုကို မေးမြန်းရခြင်းဖြစ်ပါတယ်။ ကျွန်တော့် အနေနဲ့ လယ်ယာမြေနှင့် အခြားမြေများသိမ်းဆည်းခံရမှုကြောင့် ပြည်သူများနစ်နာမှုမရှိစေရေး အတွက် ဖွဲ့စည်းထားတဲ့ ကော်မရှင်အဖွဲ့(၁)မှာ အဖွဲ့ဝင်အဖြစ်ကျွန်တော်ပါဝင်ပြီးတော့မှ လယ်မြေသိမ်းတဲ့ကိစ္စတွေကို ကျွန်တော်တို့ လိုက်လံစုံစမ်းတဲ့အခါမှာ ဒီလယ်ယာမြေကိစ္စတွေနဲ့ ပတ်သက်ပြီးတော့မှ ဥပဒေကိုသိလျက်နဲ့ဖြစ်စေ၊ မသိလို့ပဲဖြစ်စေဖောက်ဖျက်နေတဲ့ကိစ္စတွေတွေ့ရှိနေရပါတယ်။ ဒီလို ဥပဒေဖောက်ဖျက်တဲ့ကိစ္စတွေကို ဒါဟာ ဥပဒေနဲ့မညီညွတ်ဘူး။ ဖောက်ဖျက်နေပြီ။ ထိုက်သင့် သလိုအရေးယူပေးပါ။ ထိုက်သင့်သလို စီမံဆောင်ရွက်ပေးပါဆိုပြီးတော့ ကျွန်တော်တို့ ကော်မရှင် အနေနဲ့စာထွက်ပေမယ့် တချို့ကုမ္ပဏီတွေကအောက်ခြေဝန်ထမ်းတွေဟာ အဲ့ဒီစာတွေကို ဆုတ်ဖြဲပြီး တော့မှ သူတို့နဲ့မဆိုင်ဘူးဆိုပြီးတော့ ဆက်ပြီးတော့မှ လ/န (၃၉) မကျသေးတဲ့ လယ်မြေတွေမှာ ခြံစည်းရိုးခတ်တာတို့၊ လမ်းဖောက်တာတို့ကို ဆက်ပြီးတော့ဆောင်ရွက်နေပါတယ်။ လ/န(၃၉)မကျ သေးတဲ့လယ်မြေတွေမှာ ခြံစည်းရိုးခတ်တယ်၊ လမ်းဖောက်တာဟာ လယ်ယာမြေဥပဒေကိုဖောက်ဖျက် တယ်ဆိုတာ လူတိုင်းသိပါတယ်။ ဒီကိစ္စတွေကို မြို့နယ်အဆင့်တာဝန်ရှိတဲ့လူတွေကို ပြောတဲ့အခါမှာ လည်း ဆက်လက်အရေးမယူပါဘူး။ တိုင်းအဆင့်တာဝန်ရှိတဲ့လူတွေဆီကို စာနဲ့ အကြောင်းကြားပြီး တော့မှ အကြိမ်ကြိမ်အကြောင်းကြားတဲ့အခါကျမှ တားဆီးတာကိုတွေ့ရပါတယ်။ အဲ့တော့ ဥပဒေတွေ ကို အသေးအဖွဲလို့သဘောထားပြီးတော့မှ ချိုးဖောက်နေမယ်ဆိုရင် အမှိုက်ကစ ပြဿဒ်မီးလောင် ဆိုသလို တဖြည်းဖြည်းအလေ့အကျင့်ဖြစ်သွားပြီးတော့မှ ကျွန်တော်တို့သွားနေတဲ့ ဒီမိုကရေစီပြုပြင် ပြောင်းလဲရေးဟာ နောက်ပြန်လည်သွားနိုင်တဲ့အတွက် ကျွန်တော့်အနေနဲ့ ဒီမေးခွန်း ၃ ခုကို မေးမြန်းရ ခြင်း ဖြစ်ပါတယ်။

ဒေသဖွံ့ဖြိုးတိုးတက်ရေးစီမံကိန်းများအရ ယခင်က မြေသိမ်းဆောင်ရွက်ခဲ့ရာတွင် လယ်ယာမြေများကို အခြားနည်းအသုံးပြုခွင့် လ/န(၃၉) ခွင့်ပြုမိန့် မကျသေးသောမြေများသည် ဥပဒေအရလယ်ယာမြေအဖြစ်သာတည်ရှိနေဆဲဖြစ်၍ ထိုမြေများတွင် သက်ဆိုင်ရာလယ်သမားများ ထွန်ယက်စိုက်ပျိုးလုပ်ကိုင်ခွင့်မရအောင် တားဆီးဟန့်တားနေခြင်း၊ ထိုလယ်ယာမြေများတွင် လယ်ယာမြေဥပဒေကိုဖောက်ဖျက်ကာ ကွန်ကရစ်လမ်းများကို ကုမ္ပဏီက ဖောက်လုပ်နေခြင်း၊ လယ်ယာမြေများကိုခြံခတ်နေခြင်းများရှိနေသည်ကို ပြည်ထောင်စုအစိုးရအနေနဲ့ သိပါသလား။ သိရှိပါက လယ်ယာမြေဥပဒေနှင့်အညီဖြစ်စေရန် ဖောက်ဖျက်နေသူတို့ကို မည်ကဲ့သို့ အရေးယူဆောင်ရွက်မည်နည်း။ ထိုလယ်မြေလုပ်ပိုင်ခွင့်ရထားသောလယ်သမားများ မိမိတို့၏ လယ်ယာမြေများကို လွတ်လွတ်လပ်လပ်လုပ်ကိုင်ခွင့်ရအောင် မည်သို့ဆောင်ရွက်ပေးမည်ကိုသိလိုပါ တယ်။ 

စီမံကိန်းအရ မြေသိမ်းဆောင်ရွက် ပေမယ့် လ/န(၃၉) အမိန့်မကျသေးသဖြင့် လယ်သမားများမှ စိုက်ပျိုးနေသောလယ်မြေများကို ခြံစည်းရိုးကာရံခြင်းကြောင့် မိုးရေတွေမစီးထွက်ဘဲ စပါးပင်များရေနစ်သေဆုံးသဖြင့် လယ်သမားအချို့ နစ်နာဆုံးရှုံးနေမှုများရှိနေတာကို တွေ့နေရပါတယ်။ လ/န(၃၉) အမိန့်မကျသေးတဲ့ လယ်မြေအား ခြံစည်းရိုးခတ်ခြင်းသည် လယ်ယာမြေဥပဒေနှင့်ညီညွတ်မှုမရှိ၍ ဥပဒေနှင့်ညီညွတ်စေရန်မည်‌ကဲ့သို့ အရေးယူဆောင်ရွက် ပေးမည်ကိုသိလိုပါတယ်။

ဌာနဆိုင်ရာအချို့ဟာ လယ်သမားများ ဓားမဦးချလုပ်ကိုင် နေတဲ့ ဦးပိုင်အမည်မပေါက်သေးသော လယ်မြေအချို့ကို ဦးပိုင်အမည်ဖောက်၍ စာရွက်ပေါ်တွင် သိမ်းဆည်းလိုက်ပြီး အမှန်တကယ်ဓားမဦးချစိုက်ပျိုးလုပ်ကိုင်နေသူများထံမှ ဥပဒေကိုမျက်ကွယ်ပြု၍ သီးစားခများ တောင်းခံနေခြင်း၊ ဦးပိုင်အမည်မပေါက်ခြင်းကိုအကြောင်းပြု၍ မူလဓားမဦးချလုပ်ကိုင် နေသူများအားဖယ်ရှား၍ အခြားသူများအားလုပ်ကိုင်စေပြီး သီးစားခရယူနေခြင်းများလည်းရှိနေသဖြင့် လယ်သမားအချို့မှာနစ်နာမှုများရှိနေပါတယ်။ လယ်ယာမြေဥပဒေနှင့်အညီဖြစ်စေရန်အတွက် မည်ကဲ့သို့ကြပ်မတ်ဆောင် ရွက်ပေးမည်ကို သိရှိလိုပါကြောင်း မေးမြန်းပါသည်။

ဖြေကြားသူ
လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန၊ ဒုတိယဝန်ကြီး ဦးခင်ဇော်
အဖြေ

ရန်ကုန်တိုင်းဒေသကြီး အစိုးရအဖွဲ့ရဲ့ ဖြေကြားချက်အရ အောက်ပါအတိုင်းရှင်းလင်း ဖြေကြားအပ်ပါတယ်-

          (က) လယ်ယာမြေများအား ခြံစည်းရိုးကာရံခြင်းပြုလုပ်လိုလျှင် အဆိုပါလယ်ယာမြေအား ယခင်က လယ်ယာမြေနိုင်ငံပိုင်ပြုလုပ်ရေးအက်ဥပဒေပုဒ်မ ၃၉ လျှောက်ထားပြီး ခွင့်ပြုမိန့်ရရှိမှသာ ကွန်ကရစ်လမ်းဖောက်ခြင်း၊ ခြံစည်းရိုးကာရံခြင်းအားဆောင်ရွက် ရန်၊ ခွင့်ပြုမိန့်မရရှိပါက ဆောင်ရွက်ခွင့်မရှိပါကြောင်း၊ ဆောင်ရွက်မည်ဆိုပါက လယ်ယာမြေဥပဒေအရ အရေးယူခြင်းခံရမည် ဖြစ်ပါကြောင်းကို ရန်ကုန်တိုင်းဒေသကြီး အစိုးရအဖွဲ့မှ ကုမ္ပဏီအဖွဲ့အစည်းများသို့ အကြောင်းကြား ထားပြီးဖြစ်ပါတယ်။

          (ခ)     ယင်းသို့ဆောင်ရွက်ခြင်းသည် တောင်သူလယ်သမားများ လွတ်လပ်စွာစိုက်ပျိုးခွင့်ရရှိ စေရန်ဆောင်ရွက်ပေးခြင်းဖြစ်ကြောင်း၊ သို့ရာတွင် လယ်သမားများမှ လယ်ယာမြေများ ရောင်းချပြီး သို့မဟုတ် ညှိနှိုင်းပြီးငွေအချို့ရယူထားပါက သက်ဆိုင်ရာလယ်သမားနှင့် ကုမ္ပဏီတို့၏ကိစ္စသာဖြစ်၍ တရားရုံး၌သာရင်ဆိုင်ရမည်ဖြစ်ပါတယ်။

          (ဂ)     ရန်ကုန်တိုင်းဒေသကြီးအစိုးရအဖွဲ့၏ဆောင်ရွက်ချက်များအနက် သာဓကအားဖြင့် ရန်ကုန်မြောက်ပိုင်းခရိုင်၊ မင်္ဂလာဒုံမြို့နယ်တွင် ၂၀၀၀ ခုနှစ်က မြို့ရွာနှင့် အိုးအိမ် ဖွံ့ဖြိုးရေးဦးစီးဌာနနှင့် ဇေကမ္ဘာကုမ္ပဏီလီမီတက်တို့ အကျိုးတူပူးပေါင်းစာချုပ်ချုပ် ဆိုခဲ့သော ရန်ကုန်စက်မှုဇုန်အပိုင်း(၄)နယ်မြေအတွင်းရှိ လယ်မြေ ၈၁၅ ဧကအား လုပ်ကိုင်သော လယ်သမား ၁၀၄ ဦးနှင့် ဇေကမ္ဘာကုမ္ပဏီတို့တွေ့ဆုံညှိနှိုင်းခဲ့ပြီး နှစ်ဖက်သဘောတူနစ်နာကြေးငွေများ ပေးချေမှုရှိခဲ့ပါကြောင်း၊ ငွေလက်ခံရယူသည့် လယ်သမားများမှာလည်း ကျေးရွာအုပ်စုအေးချမ်း သာယာရေးနှင့် ဖွံ့ဖြိုးရေးကောင်စီ ထံသို့လက်မှတ်ရေးထိုးပြီး မြေလုပ်ကိုင်ခွင့်ပြန်လည် အပ်နှံမှုရှိခဲ့ကြောင်း၊ ကျေးရွာအုပ်စု အေးချမ်းသာယာရေးနှင့် ဖွံ့ဖြိုးရေးကောင်စီမှလည်း ဇေကမ္ဘာကုမ္ပဏီသို့ သီးစား လုပ်ပိုင်ခွင့်ချထားခဲ့သည်ကိုတွေ့ရှိရပါကြောင်း ဖြေကြားအပ်ပါတယ်။

          ပြည်သူ့လွှတ်တော်ကိုယ်စားလှယ်တော်ကြီးရဲ့ ဒုတိယမေးခွန်းနှင့်စပ်လျဉ်းပြီးတော့ အောက်ပါ အတိုင်း ရှင်းလင်းဖြေကြားအပ်ပါတယ်-

          လယ်ယာမြေဆက်စပ်ပတ်သက်လျက်ရှိသည့် နိုင်ငံသားအားလုံး လယ်ယာမြေဥပဒေ၊ နည်းဥပဒေ၊ လုပ်ထုံးလုပ်နည်းများကို အကောင်အထည်ဖော်ဆောင်ရွက်နိုင်ရန်အတွက် ရန်ကုန်တိုင်း ဒေသကြီး လယ်ယာမြေစီမံခန့်ခွဲမှုအဖွဲ့ကို တိုင်းဒေသကြီးဝန်ကြီးချုပ်မှ ဥက္ကဋ္ဌအဖြစ်ဦးဆောင်သည့် အဖွဲ့ဝင်စုစုပေါင်း ၁၀ ဦးဖြင့် ၂၀၁၂ ခုနှစ်၊ ဒီဇင်ဘာလ ၁၃ ရက်နေ့ ရက်စွဲဖြင့် ဖွဲ့စည်းပြီးဖြစ်ပါ ကြောင်း ခရိုင်အဆင့်၊ မြို့နယ်အဆင့်၊ ရပ်ကွက်ကျေးရွာအုပ်စု လယ်ယာမြေစီမံခန့်ခွဲမှုအဖွဲ့များ ကိုလည်း လယ်ယာမြေဥပဒေ၊ နည်းဥပဒေများနှင့်အညီ ဖွဲ့စည်းပြီးဖြစ်၍ အခြားနည်းအသုံးပြုခွင့်၊ ခွင့်ပြုမိန့်မကျသေးသောမြေများအပါအဝင် လယ်ယာမြေအား ခွင့်ပြုချက်မရရှိဘဲ အခြားနည်းဖြင့် အသုံးပြုပါက စိစစ်ဖော်ထုတ်အရေးယူ သွားမည်ဖြစ်ကြောင်း ရှင်းလင်းဖြေကြားအပ်ပါတယ်။

တတိယမေးခွန်းနှင့်စပ်လျဉ်း၍ ရှင်းလင်းဖြေကြားအပ်ပါတယ်-

          (က)    ရန်ကုန်တိုင်းဒေသကြီးအတွင်းရှိ အကောင်အထည်ဖော်ဆောင်ရွက်လျက်ရှိသော စီမံကိန်းများမှာ ယခင်အစိုးရလက်ထက်ကဆောင်ရွက်ခဲ့သော စီမံကိန်းများဖြစ်ပြီး မြို့ပြ စီမံကိန်းများအဖြစ် အကောင်အထည်ဖော်ခဲ့သည့် ဒဂုံမြို့သစ်မြို့နယ်၊ လှိုင်သာယာ မြို့နယ်၊ ရွှေပြည်သာမြို့နယ်စသည့် စက်မှုအိမ်ရာမြေကွက်တိုးချဲ့အကောင်အထည် ဖော်ထုတ်သည့် အိမ်ရာစီမံကိန်းများအား ယခင်အစိုးရမှ လယ်ယာမြေနိုင်ငံပိုင်ပြုလုပ် ရေးအက်ဥပဒေပုဒ်မ ၃၉ ခွင့်ပြုချထားသည့်မြေများဖြစ်ပြီး အစိုးရသစ်လက်ထက်တွင် မြို့ပြမြေယာတိုးချဲ့ခြင်း၊ စီမံကိန်းသစ်များဆောင်ရွက်ခြင်းမရှိပါကြောင်း ဖြေကြားအပ် ပါတယ်။

          (ခ)     ဓားမဦးချလုပ်ကိုင်နေသူများထံမှ သီးစားခတောင်းခံခြင်း၊ ဓားမဦးချလုပ်ကိုင်နေသူကို ဖယ်ရှား၍ အခြားသူများကိုလုပ်ကိုင်စေပြီး သီးစားရယူခြင်းများနှင့်စပ်လျဉ်း၍ ရန်ကုန်တိုင်းဒေသကြီးအစိုးရအဖွဲ့အနေဖြင့် ထိုကဲ့သို့ကိစ္စများမဖြစ်ပေါ်စေရန် အထူး ကြပ်မတ်ဆောင်ရွက်လျက်ရှိပါကြောင်းဖြေကြားအပ်ပါတယ်။

          ပြည်သူ့လွှတ်တော်ကိုယ်စားလှယ်တော်ကြီး၏မေးခွန်းနှင့်စပ်လျဉ်း၍ ယခုလက်ရှိအချိန်တွင် လယ်ယာမြေဥပဒေကို နိုင်ငံတော်သမ္မတက ၂၀၁၂ ခုနှစ်၊ မတ်လ ၃၀ ရက်နေ့တွင် လက်မှတ်ရေးထိုး ထုတ်ပြန်ခဲ့ပြီး နိုင်ငံတော်သမ္မတရုံး၏ ၂၀၁၂ ခုနှစ်၊ သြဂုတ်လ ၃၁ ရက် ရက်စွဲပါအမိန့်ကြော်ငြာစာ အမှတ် (၆၂/၂၀၁၂) အရ လယ်ယာမြေဥပဒေကို ၂၀၁၂ ခုနှစ်၊ သြဂုတ်လ ၃၁ ရက်နေ့မှ စတင် အာဏာတည်ခဲ့ပြီးဖြစ်ပါတယ်။ လယ်ယာမြေနည်းဥပဒေကို လယ်ယာမြေဥပဒေပုဒ်မ ၄၂ ပုဒ်မခွဲ(က) အရ လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန၏ ၂၀၁၂ ခုနှစ်၊ သြဂုတ်လ ၃၁ ရက်ရက်စွဲပါ အမိန့်ကြော်ငြာစာအမှတ် (၂/၂၀၁၂) ဖြင့် အတည်ပြုထုတ်ပြန်ခဲ့ပြီးွဖစ်ပါတယ်။ လယ်ယာမြေဥပဒေ အရ နေပြည်တော်ကောင်စီနယ်မြေအပါအဝင် တိုင်းဒေသကြီး/ပြည်နယ်အသီးသီးတွင် နေပြည်တော်၊ တိုင်းဒေသကြီး၊ ပြည်နယ်၊ ခရိုင်၊ မြို့နယ်နှင့် ရပ်ကွက်ကျေးရွာအုပ်စုလယ်ယာမြေ စီမံခန့်ခွဲမှုအဖွဲ့ အဆင့်ဆင့်တို့ကို ဖွဲ့စည်းတာဝန်ပေးအပ်ခဲ့ပြီးဖြစ်ပါတယ်။ သို့ဖြစ်ပါ၍ လွှတ်တော်ကိုယ်စားလှယ်တော်ကြီး မေးမြန်းထားသည်‌့ မေးခွန်းများနှင့်စပ်လျဉ်း၍ လယ်ယာမြေဥပဒေ၊ နည်းဥပဒေ၊ လုပ်ထုံးလုပ်နည်း များနှင့်ညီညွတ်စွာဖြင့် နယ်မြေလိုက်နေပြည်တော်ကောင်စီဥက္ကဋ္ဌနှင့် သက်ဆိုင်ရာတိုင်းဒေသကြီး/ ပြည်နယ်အစိုးရအဖွဲ့ဝန်ကြီးချုပ်များက ဥက္ကဋ္ဌအဖြစ်ပါဝင်သော တိုင်းဒေသကြီး/ပြည်နယ် လယ်ယာ မြေစီမံခန့်ခွဲမှုအဖွဲ့၏ကြီးကြပ်မှုဖြင့် ဆိုင်ရာခရိုင်၊ မြို့နယ်နှင့် ရပ်ကွက်ကျေးရွာအုပ်စုလယ်ယာမြေ စီမံခန့်ခွဲမှုအဖွဲ့အဆင့်ဆင့်တို့က မြေပြင်ပကတိအခြေအနေမှန်အတိုင်း တိုက်ဆိုင်စိစစ်ပြီး ဥပဒေနှင့် အညီ မှန်ကန်တရားမျှတစွာဖြေရှင်း ဆောင်ရွက်ပေးသွားနိုင်မည် ဖြစ်ပါကြောင်း ရှင်းလင်းဖြေကြားပါသည်။

ဦးအောင်သိန်းလင်း (တောင်ဥက္ကလာပမဲဆန္ဒနယ်) က ဆက်စပ်မေးခွန်း မေးမြန်းပါသည်။

တချို့မြေတွေဟာ လ/န (၃၉) ကျမယ်၊ မကျမယ်ဆိုတာမသေချာပါဘူး။ လတ်တလောအခြေ အနေမှာတော့ လ/န (၃၉) မကျသေးတဲ့မြေတွေကို ခြံစည်းရိုးတွေခတ်ထားတဲ့အတွက် စိုက်ပြီးသား စပါးပင်တွေ ရေမြုပ်နေတာကို ကျွန်တော်တို့တွေ့ခဲ့ရပါတယ်။ လာမယ့် မိုးရာသီမှာ ဆက်စိုက်ဖို့ဟာ အဲ့ဒီခြံစည်းရိုးတွေ ပြန်ဖျက်ပေးမှဖြစ်မှာ ဖြစ်တဲ့အတွက် ဒီခြံစည်းရိုးတွေပြန်ဖျက်ဖို့ဟာ ဘယ်လိုများ ဆောင်ရွက်ပေးနိုင်မလဲဆိုတာသိလိုပါတယ်။ နောက်တစ်ခါ အချို့ လ/န(၃၉) မကျသေးတဲ့ မြေတွေမှာ အိမ်ရာအဆောက်အဦတွေဆောက်ဖို့အတွက် ကွန်ကရစ်လမ်းတွေဖောက်ထားတာတွေရှိပါ တယ်။ အဲ့ဒီမြေဟာ လာမယ့်မိုးရာသီမှာစိုက်ဖို့အတွက် ကွန်ကရစ်လမ်းတွေကို ပြန်ဖျက်ပေးဖို့အတွက် သက်ဆိုင်ရာဝန်ကြီးဌာနက နေပြီးတော့မှ မည်ကဲ့သို့များ ဆောင်ရွက်ပေးနိုင်မည်ကို သိရှိလိုပါကြောင်း မေးမြန်းပါသည်။

လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန၊ ဒုတိယဝန်ကြီး ဦးခင်ဇော

လယ်ယာစိုက်ပျိုးရေးနှင့် ဆည်မြောင်းဝန်ကြီးဌာန အနေနဲ့ လွှတ်တော်ကိုယ်စားလှယ်တော်ကြီး တင်ပြသွားတဲ့လုပ်ငန်းနဲ့ပတ်သက်၍ ရန်ကုန်တိုင်း ဒေသကြီးအစိုးရအဖွဲ့နဲ့ ကျွန်တော်တို့ ညှိနှိုင်းပြီးတော့ ကွင်းဆင်းစစ်ဆေးပြီးတော့ လိုအပ်တဲ့ဟာကို ဆက်လက်ဆောင်ရွက်သွားမည် ဖြစ်ကြောင်း ရှင်းလင်းဖြေကြားပါသည်။