Skip to main content

၂၀၁၅ ခုနှစ် အပြည်ပြည်ဆိုင်ရာဒီမိုကရေစီနေ့အခမ်းအနားတွင် မိတ္ထီလာတက္ကသိုလ်မှ ဖတ်ကြားတင်သွင်းသည့် စာတမ်း

လေးစားအပ်ပါသော လွှတ်တော်အသီးသီးမှ နာယကကြီးနှင့် ဥက္ကဋ္ဌကြီးများ ပြည်ထောင်စုဝန်ကြီးများ၊ လွှတ်တော်ကိုယ်စားလှယ်များနှင့် ဖိတ်ကြားထားသော ဧည့်သည်တော်များ မင်္ဂလာအပေါင်းနှင့် ပြည့်စုံကြပါစေကြောင်း နှုတ်ခွန်းဆက်သရင်း ဆုမွန်ကောင်းတောင်းလိုက်ပါတယ် ရှင်။ ကျွန်မကတော့ မိတ္ထီလာတက္ကသိုလ် ဓာတုဗေဒအထူးပြု မဟာသုတေသနသင်တန်း တက်ရောက်နေသော ကျောင်းသူ မကေသွယ်နှင်းစိုး ဖြစ်ပါတယ်ရှင်။

ယနေ့ကျင်းပပြုလုပ်တဲ့  "အပြည်ပြည်ဆိုင်ရာဒီမိုကရေစီနေ့" အခမ်းအနားမှာ ကျောင်းသား၊ ကျောင်းသူများကိုယ်စား စာတမ်းတင်ပြဖတ်ကြားခွင့်ရတဲ့အတွက် များစွာဂုဏ်ယူဝမ်းမြောက်မိပါ ကြောင်း ဦးစွာပထမပြောကြားလိုပါတယ်။ ကျွန်မဖတ်ကြားမည့် စာတမ်းကတော့ "တက္ကသိုလ်ဆိုတာ ဒီမိုကရေစီလေ့ကျင့်စရာ" ဖြစ်ပါတယ်။

ယနေ့ခေတ် အချိန်အခါ မြန်မာနိုင်ငံတော်ကြီးသည် ဒီမိုကရေစီစနစ်ကို ကျင့်သုံး အကောင်အထည်ဖော် ဆောင်ရွက်နေခြင်းကို ကမ္ဘာကသိရှိပြီး ဖြစ်ပါတယ်။ ကျွန်မတို့ အသက်အရွယ် ကျောင်းသား၊ ကျောင်းသူများသည် ဒီမိုကရေစီကျင့်သုံးနေသည့် အချိန်အခါကို ဖြတ်သန်းနေရတဲ့ အတွက် ဒီမိုကရစီယဉ်ကျေးမှု ၊ ဒီမိုကရေစီကျင့်စဉ်များကို အမြဲမပြတ် လေ့လာနေရချိန်ပဲ ဖြစ်ပါတယ်။ နိုင်ငံတော်သည် ဖွဲ့စည်းပုံ အခြေခံဥပဒေကို ရေးဆွဲပြီး နိုင်ငံတော်၏ အာဏာ (၃)ရပ်ဖြစ်သော ဥပဒေပြုရေးအာဏာ၊ အုပ်ချုပ်ရေးအာဏာနှင့် တရားစီရင်ရေးအာဏာ များကို လက်တွေ့ခွဲဝေ ကျင့်သုံးနေသော နိုင်ငံအဖြစ် ရပ်တည်နေပါသည်။ ယနေ့ကျင်းပနေသော လွှတ်တော်များတွင် ဥပဒေပြဋ္ဌာန်းခြင်း၊ အဆိုတင်သွင်းခြင်း၊ အကြံပြုခြင်း၊ ကန့်ကွက်ခြင်း၊ ထောက်ခံခြင်း၊ မှတ်တမ်းတင်ခြင်း စသည့် လုပ်ငန်းရပ်များကို ဝါဒစွဲ လူမျိုးစွဲပါတီစွဲ၊ ဘာသာစွဲကင်း ကင်းဖြင့် ဆွေးနွေးတိုင်ပင် ညှိနှိုင်းမှုများ ပြုလုပ်နေကြသည်ကို မီဒီယာများ မှတဆင့် လေ့လာမိပါသည်။ ဤသို့လေ့လာခြင်းဖြင့် ဒီမိုကရေစီတွင် သဘောထားကြီးခြင်း၊ ဥပေက္ခာပြုနိုင်ခြင်း၊ လိုက်လျောမှုပြု နိုင်ခြင်း၊ စိတ်ရှည်သီးခံနိုင်ခံခြင်း၊ ကိုယ်ကျိုးမကြည့် အများအကျိုးကြည့်နိုင်ခြင်း စသည့် ဒီမိုကရေစီ စံနှုန်းများရှိနေကြောင်း မှတ်ထားရပါသည်။

အဆင့်မြင့် ပညာကဏ္ဍတွင်လည်း ကျောင်းသားကျောင်းသူများကို မိမိဆန္ဒအလျောက် လွတ်လပ်စွာ ထုတ်ဖော်တတ်ရန်၊ ယဉ်ကျေးစွာ ပြောဆိုတတ်ရန် မိမိအလုပ်၊ မိမိတာဝန်ယူတတ်ရန်၊ ဆရာနှင့်တပည့် အပြန်အလှန်ဆွေးနွေးမှု၊ လေးစားယုံကြည်မှု၊ ညှိနှိုင်းမှု ပြုလုပ်တတ်စေရန် စသည့် ဒီမိုကရေစီအလေ့အထများ လေ့ကျင့်ပေးလျက်ရှိပါသည်။ ကျွန်မတို့ ပညာဆည်းပူးရာ မိတ္ထီလာတက္ကသိုလ်တွင် ပါမောက္ခချုပ်ဆရာကြီးက ဘာသာရပ်ပေါင်းစုံမှ ကျောင်းသားကိုယ်စားလှယ် များနှင့် တစ်ပတ်တစ်ကြိမ်တွေ့ဆုံကာ ကျောင်းသားကျောင်းသူများ၏ လိုအပ်ချက်များ၊ ဆန္ဒများကို လွတ်လပ်စွာ ထုတ်ဖော်စေရန် အပြန်အလှန်ဆွေးနွေးမှုများ ဆောင်ရွက်လျက် ရှိပါသည်။ ကျောင်းသားကိုယ်စားလှယ်များကို ကျောင်းသားတို့၏ သဘောတူညီချက်ဖြင့်သာ ရွေးချယ်ခဲ့ခြင်းဖြစ် ပါသည်။ ကျောင်းသားကိုယ်စားလှယ်များကလည်း မိမိကိုယ်ကိုကောင်းမွန်ရန် ဦးစွာလေ့ကျင့် ရပါမည်။ ထိုမှတဆင့် မိမိဘာသာရပ်ဌာနနှင့် ကျောင်းသားထုတစ်ရပ်လုံး အဆင်ပြေကောင်းမွန်စေရန် ကြိုးပမ်းဆောင်ရွက်ပြီး အမိတက္ကသိုလ်ကျောင်းတော်ကြီး ဖွံ့ဖြိုး တိုးတက်စေရန် ကြိုးပမ်းဆောင်ရွက် လျက်ရှိပါသည်။ မိမိကိုယ်မိမိတာဝန်ယူနိုင်စွမ်း၊ အများအကျိုးအတွက် ဆောင်ရွက်နိုင်စွမ်းနှင့် ” ဘုံရည်မှန်းချက် “ ဖြစ်စေ၊ ကျောင်းတော်ကြီး၏ ဂုဏ်သိက္ခာမြင့်မားအောင် အကောင်အထည်ဖော်နိုင် ခြင်းသည် ဒီမိုကရေစီ၏ အနှစ်သာရများဖြစ်ပါသည်။

ယခုနှစ် ဇူလိုင်၊ သြဂုတ်လများတွင် မြန်မာနိုင်ငံတွင် ကျရောက်သွားသော သဘာဝဘေး အန္တရာယ်ကြောင့် ကျွန်မတို့ ကျောင်းသားကျောင်းသူများ၏ စိတ်တွင် ဂရုဏာစိတ်၊ ရိုင်းပင်း ကူညီလိုသည့်စိတ်များ၊ ပရဟိတစိတ်များတိုးပွားလာကြပါသည်။ ပါမောက္ခချုပ် ဆရာကြီး ဦးစီးဦးဆောင်ပြု၍ ကျောင်းတစ်ကျောင်းလုံး အနေအထားဖြင့် ရေဘေးသင့်ပြည်သူများအား ပစ္စည်းများ၊ ငွေများ လှူဒါန်းသကဲ့သို့ ကျောင်းသား၊ ကျောင်းသူများကိုယ်တိုင် ဦးစီးဦးဆောင်ပြု၍ ဘာသာရပ်အလိုက် ပစ္စည်းများလှူဒါန်းကြပါသည်။ ကျောင်းသား၊ ကျောင်းသူများအား ခေါင်းဆောင်ကောင်း တစ်ဦး၏စိတ်ဓာတ်များ၊ တစ်ဦးနှင့်တစ်ဦး သီးခံစိတ်ရှည်တတ်သော စိတ်ဓာတ်များ၊ ညီညွတ်သောစိတ်ဓာတ်များ၊ မိမိတို့ ကျရာတာဝန်ယူတတ်သော စိတ်ဓာတ်များနှင့် အများအကျိုးသယ်ပိုးတတ်သော စိတ်ဓာတ်များစသည်ဖြင့် သဘာဝဘေးကို အကြောင်းပြု၍ ဒီမိုကရေစီစိတ်ဓာတ်များ ဖြစ်ပေါ်လာစေပါသည်။

သဘာဝဘေးကို အကြောင်းပြု၍ ပြည်သူအများစုအတွက် ဂရုဏာစိတ်၊ ရိုင်းပင်းကူညီလိုသည့် စိတ်များ၊ ပရဟိတစိတ်များ တိုးပွားလာသည်ကို တွေ့ရသည်။ အချို့က ကိုယ်တိုင်ကိုယ်ကျမပါဝင်နိုင် သော်လည်း ရေဘေးကြောင့် မေတ္တာစိတ်ထား ကူညီထောက်ပံ့ကြသည်။ အချို့က ကိုယ်တိုင် ပြည်နယ်နှင့်တိုင်းဒေသကြီး (၁၁)ခုကို ကိုယ်တိုင်ကိုယ်ကျ ပါဝင်ကြသည်။ တစ်ချို့ကထဲထဲဝင်ဝင် မိမိဘဝကိုပါ မြှပ်နှံရန် ကူညီစောင့်ရှောက်ပေးနေကြသည်။ ပရဟိတ စိတ်ထားများနှင့် ညီညွတ်သောအသိစိတ်ဓာတ် တူညီသောမေတ္တာတရားများထားရန် ကြိုးပမ်းနေကြသည်။

ထို့အပြင် နှစ်အတန်ကြာ အဆက်ပြတ်နေခဲ့သော တက္ကသိုလ်ကျောင်းသား၊ ကျောင်းသူများ တက္ကသိုလ်ပရဝုဏ်အတွင်း ကျောင်းဆောင်နေထိုင်ရေးကိုလည်း စီစဉ်ဆောင်ရွက်ခဲ့ပြီဖြစ်ကြောင်း တင်ပြလိုပါသည်။ ကျောင်းဆောင်တွင် နေထိုင်ခြင်းဖြင့် အချင်းချင်းရိုင်းပင်း ကူညီခြင်း၊ အများနှင့် ညှိနှိုင်းနေထိုင်ဆောင်ရွက်တတ်ခြင်း၊ ခေါင်းဆောင်ကောင်းနှင့် နောက်လိုက်ကောင်းတို့၏ စွမ်းရည်များအတွက် အလေ့အကျင့်များ စသည့်ဒီမိုကရေစီ အခြေခံကောင်းများကို ကျောင်းသား၊ ကျောင်းသူများ တစ်ပါးတည်းရရှိသွားမည်ဖြစ်ပါသည်။ ထို့ကြောင့် မိတ္ထီလာ တက္ကသိုလ်သည် ဒီမိုကရစီအနှစ်သာရကို ဖော်ဆောင်ပေးရာ၊ လေ့ကျင့်ပေးရာ တက္ကသိုလ် ဖြစ်နေပါကြောင်း တင်ပြပါသည်။

နိုင်ငံတကာ အဆင့်မီတက္ကသိုလ်များ ပေါ်ထွန်းရေးနှင့် အရည်အသွေးပြည့် ပညာရှင်များ မွေးထုတ်နိုင်ရေးအတွက် တချို့သော တက္ကသိုလ်များသည် နိုင်ငံတကာအဆင့်မြင့် တက္ကသိုလ်များနှင့် ချိတ်ဆက်ပြီး (MoU, MoA) များရေးထိုးပြီး ဖြစ်ပါသည်။ ကိုယ်ပိုင်အုပ်ချုပ်ခွင့်ရ တက္ကသိုလ်များ ဖွင့်လှစ်နိုင်ရေး၊ ပညာရေးလွတ်လပ်မှုများ၊ (Academic freedom) ရရှိနိုင်ရေးတို့ကို ပညာရေးမြှင့် တင်မှုကော်မတီ၊ ပညာရေးဝန်ကြီးဌာနနှင့် ကျွမ်းကျင်ပညာရှင်များက ဆွေးနွေးညှိနှိုင်း တိုင်ပင်လျက်ရှိ ကြောင်း သိရှိရပါသည်။ ထို့ကြောင့် မျိုးဆက်သစ်ကျောင်းသား၊ ကျောင်းသူများအတွက် ဝမ်းမြောက်ဖွယ် ဖြစ်ပါသည်။

အဆင့်မြင့်ပညာရေးသည် ကျွန်မတို့ကို သူ့ဘက် ကိုယ့်ဘက် ကြည့်တတ်အောင် ဘက်ပေါင်းစုံမှ တွေးခေါ်တတ်အောင်၊ ကြည့်မြင်တတ်အောင်၊ တည်ငြိမ်ရင့်ကျက်လာအောင်၊ လောကအလယ်၌ ကိုယ်ပိုင်အသိ၊ ကိုယ်ပိုင်အမြင်၊ ရပ်တည်နိုင်စွမ်းရှိလာအောင် လေ့ကျင့်ပေးနေ ခြင်းဖြစ်ပါသည်။ ထို့ကြောင့် ကျောင်းသား၊ ကျောင်းသူ လူငယ်ထုကလည်း မိမိ၏ ကိုယ်စွမ်းကိုယ်စကို အကျိုးရှိမှန်ကန်စွာ အသုံးချတတ်ပြီး အတ္တကိုရှေ့တန်းမတင်ဘဲ အများအကျိုးရွက်သယ်ပိုးလိုစိတ်များ ထားရှိပြီး ဒီမိုကရစီ လူ့ဘောင်တွင် လူသားအချင်းချင်း ချစ်ခင်ခြင်း၊ ကြင်နာမြတ်နိုးခြင်း၊ ဂရုဏာထားခြင်းဆိုသည့် ဒီမိုကရေစီစိတ်ဓာတ်များ မွေးမြူရမည် ဖြစ်ပါသည်။

နိဂုံးချုပ်အားဖြင့် တက္ကသိုလ်ကျောင်းသား၊ ကျောင်းသူများသည် အဆင့်မြင့်ပညာကို လေ့လာဆည်းပူးရင်း တက္ကသိုလ်လှုပ်ရှားမှုများတွင် ပါဝင်ရင်း ဒီမိုကရေစီအနှစ်သာရများ၊ ဒီမိုကရေစီစံနှုန်းများနှင့် ဒီမိုကရေစီစိတ်ဓာတ်များဖြင့် အမိတက္ကသိုလ် ဖွံ့ဖြိုးတိုးတက်အောင် ဆောင်ရွက်ရင်း မြန်မာနိုင်ငံတော်ကြီးအား ခေတ်မီဖွံ့ဖြိုးတိုးတက်သော ဒီမိုကရေစီနိုင်ငံတော်ကြီးအဖြစ် ရပ်တည်သွားနိုင်အောင် ကြိုးပမ်းဆောင်ရွက်သွားမည်ဟု တက္ကသိုလ် ကျောင်းသား၊ ကျောင်းသူများ ကိုယ်စား ဝန်ခံကတိပြုရင်း နိဂုံးချုပ်အပ်ပါသည်။