(ဃ)-မြန်မာနိုင်ငံတွင်သက်ငယ်မုဒိမ်းမှုများနှင့်ပတ် သက်၍ပြစ်မှုကျူးလွန်သူများအားထိရောက်သည့်ပြစ် ဒဏ်များချမှတ်ရန် အစီအစဉ် ရှိ၊မရှိနှင့် စပ်လျဉ်း သည့်မေးခွန်း

ဒေါ်ခင်စန်းလှိုင်( ပုလဲ မဲဆန္ဒနယ်)မုဒိမ်းမှုဟု ကြားလိုက်ရသည်နှင့် ယဉ်ကျေးသည့် လူ့အဖွဲ့အစည်းဝင်တိုင်း စက်ဆုတ်ရွံရှာကြပါကြောင်း၊ပို၍ဆိုးသည်မှာ အသက်အရွယ်အရ အရွယ်မရောက်သေးသည့် ကလေးငယ်များနှင့် ဆယ်ကျော်သက အရွယ် မိန်းကလေးငယ်များ အပေါ် ကျူးလွန်သည့် မုဒိမ်းမှုများကို နေ့စဉ် ကြားသိမြင်တွေ့နေရခြင်းသည် သူ့၏ မိသားစုအသိုင်းအဝိုင်းအတွက်သာမက တစ်ဆင့်သတင်း ကြားသိရသူများပင် စိတ်ထိခိုက်ကြေကွဲ ကြရပါကြောင်း၊

မုဒိမ်းမှု ပြစ်မှုကျူးလွန်သူများသည် မိသားစုသွေးသားများမှ ဖြစ်ပွားသည့်အမှုများပါ တွေ့လာရပါကြောင်း၊ ထိုအဖြစ်အပျက်များကို မြင်တွေ့လာရသဖြင့် မောင်နှမ၊ သားအဖ၊ ဦးလေး၊ ဆရာတပည်‌့ ဆိုသည့် ဆွေးမျိုးသားခြင်း ရပ်ဆွေရပ်မျိုးများ၏ ခင်မင်ရင်းနှီး၊ နွေးထွေးဖော်ရွေသော နှစ်သက်မြတ်နိုးဖွယ်ရာ ယုံကြည်မှုနှင့် မေတ္တာတရားဆိုသည့် လူမှုဆက်ဆံရေး ပုံသဏ္ဍာန်များသည် ပျက်ယွင်း သွားသည်ကို ဝမ်းနည်းဖွယ်ရာ တွေ့မြင်ရပါကြောင်း၊ မိမိတို့ လူ့အဖွဲ့အစည်းသည် ယခုကဲ့သို့ အဖြစ်အပျက်မျိုးကို တစ်ရှက်မှ နှစ်ရှက်ဖြစ်မည် စိုး၍ လက်သုံးစကားအတိုင်း လူသိခံရမည်ကို ရှက်လွန်းသဖြင့် တိတ်တဆိတ် ဖြေရှင်းသည်များ များပါကြောင်း၊ သို့သော် ယခုကဲ့သို့ ကျယ်ကျယ်ပြန့်ပြန့် ဖြစ်ပွားလာသည်ကို ကြည့်ခြင်းအားဖြင့် မျက်ကွယ်၌ ယခုကဲ့သို့ ဖြစ်ရပ်ဆိုးများ မည်မျှ များပြားနေမည် ကို တွေးဆကြည့်နိုင်ပါကြောင်း၊ ကိန်းဂဏန်းများအရ ၂၀၁၆ ခုနှစ် စက်တင်ဘာလအထိ မုဒိမ်းမှုပေါင်း ၇၆၁ မှုတွင် ၄၆၁ မှုသည် အရွယ်မရောက်သေးသည့် ကလေးသူငယ်များအပေါ် ကျူးလွန်ခဲ့သည့် အမှုများဖြစ်ပါကြောင်း၊ သက်ငယ်မုဒိမ်းမှုသည် ၃ ရက်တွင် ၂ မှုနှုန်း ဖြစ်ပွာနေသည်ကို မှုခင်းကိန်းဂဏန်းများအရ သိရပါကြောင်း၊ မြန်မာနိုင်ငံ မှုခင်းရဲတပ်ဖွဲ့စာရင်းများအရ ၂၀၁၆ ခုနှစ်တွင် ကလေးသူငယ်များအပေါ်ကျူးလွန်သည့် သက်ငယ်မုဒိမ်းမှုသည် လွန်ခဲ့သည့် ၃ နှစ်ကာလနှင့် နှိုင်းဆကြည့်ပါက ၂၀ ရာခိုင်နှုန်းခန့် ပိုမိုမြင့်မားလာသည်ဟု သိရပါကြောင်း၊ တစ်နိုင်ငံလုံး အတိုင်းအတာဖြင့် ကျူးလွန်ခံရသူများသည် အသက် ၂ နှစ်မှ ၅ နှစ်အထိ ၁၂ မှု၊ အသက် ၆ နှစ်မှ ၁၀ နှစ်အထိ ၆၃ မှု၊ အသက် ၁၁ နှစ်မှ ၁၃ နှစ်အထိ ၁၃၆ မှုနှင့် အသက် ၁၄ နှစ်မှ ၁၆ နှစ်အထိက ၃၂၃ မှုဖြစ်ပါကြောင်း၊

သက်ငယ်မုဒိမ်းမှုများ ဖြစ်ပွားရခြင်းနှင့်ပတ်သက်၍ အခြေခံအကြောင်းအရင်းကို လေ့လာကြည့်ရာတွင် ၂၂ ရာခိုင်းနှုန်းသည် ယုံကြည်မှုလွန်ကဲခြင်းနှင့် အနေနီးစပ်မှုကြောင့်‌ဖြစ်ပြီး ဖျားယောင်းသွေးဆောင်ခြင်း ကြောင့် ဖြစ်ပွား သည့်နှုန်းသည် ၂၁ ရာခိုင်နှုန်းရှိကာ အခွင့်အရေးရလွယ်ခြင်းကြောင့် ဖြစ်ပွားသည်နှုန်းသည် ၁၇ ရာခိုင်နှုန်းရှိပါကြောင်း၊ ကျန် ၄၀ ရာခိုင်နှုန်းသည် အတင်းအဓမ္မ Forced Case များ ဖြစ်နေသည်ကို လေ့လာသိရှိရပါကြောင်း၊ ထို့ကြောင့် ၆၀ ရာခိုင်နှုန်းသည် ကြိုတင်ကာကွယ်၍ရသည့် အမှုအခင်းမျိုးဖြစ်ပါကြောင်း။

မြန်မာနိုင်ငံအနေဖြင့် ကလေးသူငယ်များ အခွင့်အရေးဆိုင်ရာ ကုလသမဂ္ဂကွန်ဗင်းရှင်း UNCRC သဘောတူစာချုပ်ကို ၁၉၉၁ ခုနှစ်တွင် လက်မှတ်ရေးထိုးခဲ့ပြီး အဖွဲ့ဝင်နိုင်ငံတစ်နိုင်ငံဖြစ်ခဲ့သည့် အားလျော်စွာ ကျူးလွန်ခံရသည့် ကလေးများအား အပြစ်တင်ခြင်း၊လူ့အသိုင်းအဝိုင်းတွင် ပြစ်ပယ်ထားခြင်းမျိုးများ မပြုကြဘဲ စိတ်ပိုင်းဆိုင်ရာ၊ရုပ်ပိုင်းဆိုင်ရာ ကျန်းမာရေး၊ လူမှုရေးပိုင်းဆိုင်ရာ ပြန်လည်ကုစားရန်လိုအပ်သကဲ့သို့ ပြစ်မှုကျူးလွန်သူများကိုလည်း ရာဇဝတ်ကျင့်ထုံးဥပဒေများအရသာ မဟုတ်ဘဲ ကလေးသူငယ်များအပေါ် ကျူးလွန်သည့်သူများကို ဥပဒေများ ပြဋ္ဌာန်းပြီး ထိရောက်သည့် အမြင့်ဆုံးပြစ်ဒဏ်များ သတ်မှတ်၍ အပြစ်ပေးအရေးယူရန် လိုအပ်ပါကြောင်း၊ ပြစ်မှုကျူးလွန်သူ တစ်ဦးကို ထိရောက်သည့် ပြစ်ဒဏ်များပေးခြင်းဖြင့် ကလေးသူငယ်ပေါင်းများစွာကို ကယ်တင်နိုင်မည် ဖြစ်ပါကြောင်း၊

အဆိုပါကိစ္စနှင့်ပတ်သက်ပြီး နိုင်ငံတော်အစိုးရအနေဖြင့် သာမန်ဖြစ်ရိုးဖြစ်စဉ် ရာဇဝတ်မှုများကဲ့သို့ မဟုတ်ဘဲ တရားစီရင်ရေးနှင့် အုပ်ချုပ်ရေးမဏ္ဍိုင်တို့မှ အပြစ်ရှိသူအား ထိရောက်ပြင်းထန်သည့် အမြင့်ဆုံးပြစ်ဒဏ်ပေးရန် မည်ကဲ့သို့စီစဉ်ဆောင်ရွက်နေသည်ကို သိရှိလိုပါကြောင်း၊ ကျူးလွန် ခံရသူ ကလေးငယ်များ၏ အညွန့်ချိုးခံလိုက်ရသည့် အနာဂတ်လက်ကျန်အချိန်များတွင် စိတ်ပိုင်းဆိုင်ရာ၊ လူမှုရေးပိုင်းဆိုင်ရာ ဒဏ်ရာဒဏ်ချက်များကို ကုစားပေးမည့် Psycho Social Support အစီအစဉ်များ ဆောင်ရွက်နိုင်ရန်အတွက် ပြည်သူလူထုအား အမျိုးသားရေးတာဝန်တစ်ရပ်အနေဖြင့် ပညာပေး အစီအစဉ်များ ကျယ်ကျယ်ပြန့်ပြန့်ဆောင်ရွက်ပေးရန် အစီအစဉ်ရှိ/မရှိ သိရှိလိုကြောင်း မေးမြန်း ပါသည်။


 

ဖြေကြားသူ
ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်အောင်စိုး
ဖြေကြားသည့် ဝန်ကြီးဌာန
အဖြေ

ပြည်ထဲရေးဝန်ကြီးဌာန၊ဒုတိယဝန်ကြီး ဗိုလ်ချုပ်အောင်စိုးပြည်ထဲရေးဝန်ကြီးဌာန၊ ရဲတပ်ဖွဲ့အနေဖြင့် ပြစ်မှုများကို ကြိုတင်ကာကွယ်ခြင်း၊ ဖြစ်ပွားသည့် ပြစ်မှုအားလုံးကို စုံစမ်းဖော်ထုတ် တရားစွဲတင်ခြင်းများ ဆောင်ရွက်လျက်ရှိပြီး မြန်မာနိုင်ငံရဲတပ်ဖွဲ့၌ ပြစ်မှု အမှုကြီး ၁၀ မျိုး၊ အခြားအမှု ၁၀ မျိုး၊ ကြိုတင်ကာကွယ်မှု ၁၀ မျိုး သတ်မှတ်ဆောင်ရွက်လျက်ရှိရာ မုဒိမ်းမှုကို အမှုကြီးအဖြစ် သတ်မှတ်ဆောင်ရွက်လျက်ရှိပါကြောင်း၊ မြန်မာနိုင်ငံ မုဒိမ်းဖြစ်ပွားမှု အခြေအနေနှင့်ပတ်သက်ပြီး သိရှိနိုင်စေရန်နှင့် မုဒိမ်းဖြစ်ပွားမှုများကို တာဝန်ရှိသူများနှင့်အတူ ပြည်သူ တစ်ရပ်လုံးကလည်း သိရှိပြီး ကလေးသူငယ်များအပေါ် အဓမ္မပြုကျင့်ခံရမှုကနေပြီး ဝိုင်းဝန်း ကာကွယ်စောင့်ရှောက်စေရန် ရည်ရွယ်ချက်နှင့် ကိန်းဂဏန်းအချက်အလက်များနှင့်တကွ သုံးသပ်တင်ပြသွားမည်ဖြစ်ပါကြောင်း၊

မြန်မာနိုင်ငံ၌ သက်ငယ်မုဒိမ်းမှုဖြစ်ပွားမှုရာခိုင်းနှုန်းသည် ၂၀၁၃ ခုနှစ်၌ မုဒိမ်းမှု၏ ၄၂.၉၁ ရာခိုင်နှုန်း၊ ၂၀၁၄ ခုနှစ်၌ မုဒိမ်းမှု၏ ၄၄.၁၈ ရာခိုင်နှုန်း၊ ၂၀၁၅ ခုနှစ်၌ မုဒိမ်းမှု၏ ၄၆.၃၃ ရာခိုင်နှုန်းနှင့် ၂၀၁၆  နိုဝင်ဘာလအထိ မုဒိမ်းမှု၏ ၆၁.၁ ရာခိုင်နှုန်းဖြစ်ပွားလာသည်ကို တွေ့ရှိရသည့်အတွက် နှစ်အလိုက် မုဒိမ်းဖြစ်ပွားမှုများ များလာသကဲ့သို့ သက်ငယ်မုဒိမ်းဖြစ်ပွားမှု ရာခိုင်နှုန်များကလည်း မြင့်မားလာ သည်ကို စိုးရိမ်ဖွယ် တွေ့ရှိရပါကြောင်း၊ ၂၀၁၆ ခုနှစ် နိုင်ဝင်ဘာလအထိ သက်ငယ်မုဒိမ်းကျင့်ခံရသူများနှင့် ပတ်သက်ပြီး အသက်အပိုင်းအခြားအလိုက် ကျူးလွန်ခံရမှုများကို စိစစ်ရာတွင် ၂ နှစ်မှ ၅ နှစ်အထိ ၂.၄၇ ရာခိုင်နှုန်း၊ ၆ နှစ်မှ ၁၀ နှစ်အထိ ၁၂.၈၃ ရာခိုင်နှုန်း၊ ၁၀ နှစ်မှ ၁၄ နှစ်အထိ ၂၄.၈၃ ရာခိုင်နှုန်း၊ ၁၄ နှစ်မှ ၁၆ နှစ်အထိ ၅၉.၈၆ ရာခိုင်နှုန်းဖြစ်ကြောင်း တွေ့ရသည့်အတွက် အသက် အရွယ်အလွန်ငယ်သည့် ကလေးငယ်များတွင်ပင် အဓမ္မကျူးလွန်ခံရနေရသည်ကို ကိန်းဂဏန်းများအရ တွေ့ရှိရမည်ဖြစ်ပါကြောင်း၊

ထို့အပြင် ၁၆ နှစ်အောက်လူငယ် ၅.၀၉ ရာခိုင်နှုန်း၊ ၁၆ နှစ်မှ ၁၈ နှစ်အထိလူငယ် ၈.၃၇ ရာခိုင်နှုန်း၊ ၁၈ နှစ်မှ ၅၀ နှစ်အထိလူငယ် ၈၀.၃ ရာခိုင်နှုန်းနှင့် ၅၀ နှင့်အထက် ၆.၂၄ ရာခိုင်နှုန်းဖြစ်ကြောင်း တွေ့ရသည့်အတွက် အသက် ၁၆ နှစ်အောက်လူငယ်များပင်လျှင် အဓမ္မကျူးလွန်မှုများကို ပြုလုပ်လာကြောင်းလည်း စိုးရိမ်ဖွယ်ရာတွေ့ရှိရပါကြောင်း၊ အများဆုံးမှာ အသက် ၁၈ နှစ်မှ ၅၀ အကြား အရွယ်များသည် ကလေးသူငယ်အဓမ္မပြုကျင့်မှုကို အများဆုံးကျူးလွန်ကြောင်းကိုလည်း လေ့လာသုံးသပ် တွေ့ရှိရပါကြောင်း၊ ထို့အပြင် ကျူးလွန်သူများနှင့် ကျူးလွန်ခံရသူများ၏ တော်စပ်မှုများကို လေ့လာကြည်‌့ရာ ဖခင်အရင်းကကျူးလွန်ခြင်းသည် ၅.၀၉ ရာခိုင်နှုန်း၊ ပထွေးကကျူးလွန်ခြင်းသည် ၃.၇၈ ရာခိုင်နှုန်း၊ ဆွေမျိုးသားချင်းကကျူးလွန်ခြင်းသည် ၅.၀၉ ရာခိုင်နှုန်းနှင့် သူစိမ်းကကျူးလွန်ခြင်းသည် ၈၆.၀၄ ရာခိုင်နှုန်းဖြစ်ကြောင်း တွေ့ရှိရသည့်အတွက် လွှတ်တော် ကိုယ်စားလှယ်ကြီးဆွေးနွေး သကဲ့သို့ သွေးရင်းသားရင်းများပင်လျှင် ယခုအမှုကိစ္စများကို အံ့သြဖွယ်ကျူးလွန်လာကြောင်းလည်း တွေ့ရှိရပါ ကြောင်း၊ ကျူးလွန်မှု၏ ကာလများကို ကြည်‌့ရာတွင် နေ့အချိန်ကျူးလွန်မှုသည် ၅၇.၀၇ ရာခိုင်နှုန်း၊  ညအချိန်ကျူးလွန်မှုသည် ၄၂.၉၃ ရာခိုင်နှုန်းဖြစ်ပြီး မြို့ပေါ်၌ဖြစ်ပွားမှုသည် ၄၃.၄၂ ရာခိုင်နှုန်း၊ ကျေးလက်ဖြစ်ပွားမှုသည် ၅၆.၅၈ ရာခိုင်နှုန်းဖြစ်ပွားကြောင်း တွေ့ရှိရပါကြောင်း၊

ထို့အပြင် ဖြစ်ပွားသည့် အကြောင်းအရင်းများကို လေ့လာကြည်‌့ရာတွင် လွှတ်တော်ကိုယ်စားလှယ်ကြီး ဆွေးနွေးသွားသကဲ့သို့ အနေနီးစပ်မှုက ၁၆.၆၁ ရာခိုင်နှုန်း၊ ယုံကြည်မှုလွန်ကဲမှုကြောင့် ၁၁.၆၈ ရာခိုင်နှုန်း၊ အဓမ္မပြုကျင့်မှု ၃၁.၉၁ ရာခိုင်နှုန်း၊ အဖော်မဲ့သွားလာမှုကြောင့် ၆.၂၅ ရာခိုင်နှုန်း၊ ဖျားယောင်း သွေးဆောင်မှုကြောင့် ၂၅.၄၉ ရာခိုင်နှုန်း၊ အခွင့်အရေးရယူမှုသည် ၈.၀၆ ရာခိုင်နှုန်းဖြစ်သည်ကို တွေ့ရှိရပါကြောင်း၊ ထို့ကြောင့် သက်ငယ်မုဒိမ်းဖြစ်ပွားမှုများနှင့် ပတ်သက်ပြီး လေ့လာကြည်‌့ရာတွင် ဖော်ပြပါကိန်းဂဏန်းများအပေါ် မူတည်ပြီး ဖြစ်ပွားသည့် အသက်အရွယ်၊ အပိုင်းအခြား အချိန်ကာလနှင့် အကြောင်းတရားများအပေါ် လေ့လာသုံးသပ်မှုများ စဉ်ဆက်မပြတ် ဆောင်ရွက် လျက်ရှိပါကြောင်း၊

ထို့ကြောင့် ပြည်ထဲရေးဝန်ကြီးဌာနနှင့် မြန်မာနိုင်ငံရဲတပ်ဖွဲ့အနေဖြင့် သက်ငယ်မုဒိမ်းများဖြစ်ပွားမှုပေါ်မှာ အခြေအနေ အကြောင်းအရင်းမှန်ကို လေ့လာသုံးသပ်ပြီး သက်ငယ်မုဒိမ်းမှုများ လျော့နည်းကျဆင်းရေး အတွက် စီမံချက်များရေးဆွဲကာ အသိပညာပေးလုပ်ငန်းများကို တိုးမြှင့်ဆောင်ရွက်ခြင်း၊ ပြစ်မှုဖြစ်ပွားမှုကို တွန်းအားပေးစေတဲ့ ကြိုတင်ကာကွယ်မှုများကိုလည်း ထိထိရောက်ရောက်ဖမ်းဆီးအရေးယူဆောင်ရွက် ခြင်း၊ ဖြစ်ပွားလာသည့်အမှုများကို သက်သေခံအထောက်အထားခိုင်လုံစွာဖြင့် ဥပဒေနှင့်အညီ တရားစွဲ တင်နိုင်ရေး ဆောင်ရွက်ခြင်း၊ ပြစ်ဒဏ်ချမှတ်ခြင်းများကိုလည်း သက်ဆိုင်ရာတရားရုံးမှဆောင်ရွက်ပြီး ထိရောက်သော ပြစ်ဒဏ်ရရှိရေးအတွက် ဥပဒေရုံး၊ တရားရုံးများနှင့် ညှိနှိုင်းဆောင်ရွက်၍ တရားရုံးက နေချမှတ်သည့် ပြစ်ဒဏ်နှင့်စပ်လျဉ်းပြီး ပြစ်မှုပြစ်ဒဏ်မျှတမှုမရှိသည့် အမှုများကို စိစစ်ပြီး အယူခံမှု၊ ပြင်ဆင်မှုများ တက်ရောက်ခြင်းများကိုလည်း အလေးအနက် ထား ဆောင်ရွက်လျက်ရှိပါကြောင်း၊ထို့အပြင် သက်ငယ်မုဒိမ်းဖြစ်ပွားမှုနှင်‌့ပတ်သက်ပြီး ဖော်ထုတ်ဖမ်းဆီးအရေးယူမှုအပိုင်းမှာ အားနည်းချက်ရှိသည့် ဝန်ထမ်းများနှင့်ပတ်သက်၍ တပ်ဖွဲ့ဝင်များအပေါ် တည်ဆဲစည်းမျဉ်းစည်းကမ်း များနှင့်အညီ ထိရောက်စွာ အရေးယူဆောင်ရွက်လျက်ရှိပါကြောင်း၊ ထို့အပြင် ထူးခြားမှုတစ်ခုအနေဖြင့် တာဝန်ရှိသူ ဌာနဆိုင်ရာများ၏ ဆောင်ရွက်ချက်အပြင် ယခုအချိန်တွင် ဖြစ်ပွားလျက်ရှိသော သက်ငယ်မုဒိမ်းကျင့်သူများအပေါ် လူထုက ဆန့်ကျင်ဆန္ဒပြမှုများလည်း ပြုလုပ်လာသည်ကို တွေ့ရှိရပါကြောင်း၊

 မြန်မာနိုင်ငံရဲ တပ်ဖွဲ့အနေဖြင့် သက်ငယ်မုဒိမ်းမှုများကို စုံစမ်းပြီး တရားရုံးများကို တရားစွဲတင်ပို့ခဲ့ရာတွင် ၂၀၁၆ ခုနှစ် နိုဝင်ဘာလအထိ မြို့နယ်တရားရုံးသို့ ၉၉ မှု၊ ခရိုင်တရားရုံးသို့ ၄၁၈ မှု စုစုပေါင်းအမှုပေါင်း ၅၁၇ မှုကို တရားစွဲတင်ပို့နိုင်ခဲ့ပြီးဖြစ်ပါကြောင်း၊ တရားရုံးတွင် သက်ငယ်မုဒိမ်းကျူးလွန်သူများကို ပြစ်ဒဏ်ချမှတ်မှုအနေဖြင့် ၂၀၁၆ ခုနှစ်အတွင်း၌ ထောင်ဒဏ် ၁ နှစ်မှ ၅ နှစ်အထိ ၆၅ ဦး၊ ထောင်ဒဏ် ၆ နှစ်မှ ၇ နှစ်အထိ ၄၆ ဦး၊ ထောင်ဒဏ် ၈ နှစ်မှ ၁၀ နှစ်အထိ ၇၂ ဦး၊ ထောင်ဒဏ် ၁၀ နှစ်မှ အနှစ် ၂၀ အထိ ၂၂ ဦး ပေါင်း ၂၀၆ ဦးကို တရားရုံးမှ ပြစ်ဒဏ်များအသီးသီး ချမှတ်ခဲ့ကြောင်းလည်း တွေ့ရှိရပါကြောင်း၊ ရာဇသတ်ကြီးပုဒ်မ ၃၇၆ အရ မုဒိမ်းမှုအများဆုံးချမှတ်နိုင်သည့် ပြစ်ဒဏ်သည် ထောင်ဒဏ်အနှစ် ၂၀ ဖြစ်ပြီး ကျူးလွန်သူများကို ဥပဒေနှင့်အညီ ထိရောက်သည့်ပြစ်ဒဏ်များ ချမှတ်နိုင်ရေးအတွက် ခရိုင်တရားရုံးများသို့ သက်ဆိုင်ရာ တရားသူကြီးများနှင့် ညှိနှိုင်းပြီး တရားစွဲတင်ခြင်း၊ ကလေးသူငယ်များကို မုဒိမ်းမှုကျူးလွန်ခြင်းကြောင့် အသက်ဘေးအန္တရာယ်ဖြစ်စေနိုင်ခြင်း၊ ရောဂါဝေဒနာစွဲကပ်နိုင်စေခြင်း၊ ဂုဏ်သိက္ခာထိခိုက်ကျဆင်းစေမှုကို ဖြစ်စေသည့်အတွက် ၁၉၉၃ ခုနှစ် ကလေးသူငယ်ဥပဒေပုဒ်မ ၆၅ ပုဒ်မခွဲ(က)အရလည်း ထပ်မံတရားစွဲ အရေးယူလျက်ရှိပါကြောင်း၊

ကျူးလွန်ခံရသူများကို လူကုန်ကူးမှုတားဆီးကာကွယ်ရေးဥပဒေအရ စည်းရုံးခြင်း၊ သယ်ဆောင်ခြင်း၊ ခေါင်းပုံဖြတ်ခြင်းများ စစ်ဆေးပေါ်ပေါက်ပါက လူကုန်ကူးမှု တားဆီးကာကွယ်ရေး ဥပဒေအရ ထပ်မံအရေးယူ ဆောင်ရွက်ခြင်း၊ ပြစ်မှုကျူးလွန်သူများကို ဥပဒေနှင့်အညီ ထိရောက်သော ပြစ်ဒဏ်ချမှတ်နိုင်ရေးအတွက် သက်ဆိုင်ရာတရားရုံး၊ ဥပဒေရုံးများနှင့် ပေါင်းစပ်ညှိနှိုင်း ဆောင်ရွက်မှုများကိုလည်း အလေးထားဆောင်ရွက်လျက်ရှိပါကြောင်း၊ ထို့အပြင် သက်ငယ်မုဒိမ်းမှုများဖြင့် ပတ်သက်ပြီး ထိရောက်သော ပြစ်ဒဏ်ချမှတ်နိုင်ရေးအတွက်ကို လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနမှ ၁၉၉၃ ခုနှစ် ကလေးသူငယ်ဥပဒေကို ကလေးသူငယ်အခွင့် အရေးများဆိုင်ရာ ကုလသမဂ္ဂကွန်ဗင်းရှင်း၏ မြန်မာနိုင်ငံအပေါ် အကြံပြုချက်များနှင့်အညီ ကလေးသူငယ် အခွင့်အရေးများဆိုင်ရာ ဥပဒေအဖြစ် ပြန်လည်ရေးဆွဲဆောင် ရွက်လျက်ရှိသည့်အပြင် အမျိုးသမီးများအပေါ် အကြမ်းဖက်မှု တားဆီးကာကွယ်ရေးဥပဒေကိုလည်း အသစ်ရေးဆွဲဆောင်ရွက် လျက်ရှိပါကြောင်း၊ အဆိုပါ ဥပဒေကြမ်းများသည် ကလေးနှင့် အမျိုးသမီးများ၊ မသန်စွမ်းသူအမျိုးသမီးများ အပေါ်၌ ကျူးလွန်သည့် မုဒိမ်းမှုများနှင့် ပတ်သက်ပြီး ထိရောက်ဟန့်တားသည့် ပြစ်ဒဏ်များ ချမှတ်နိုင်ရေးကိုလည်း ထည့်သွင်းရေးဆွဲလျက်ရှိပါကြောင်း။

သက်ငယ်မုဒိမ်းမှုများလျော့နည်း ပပျောက်ရေးအတွက် ပညာပေးဟောပြောမှုများ ဆောင်ရွက်ရာတွင် မြန်မာနိုင်ငံရဲ့တပ်ဖွဲ့၊ မြို့နယ်၊ ရပ်ကွက်၊ ကျေးရွာအုပ်ချုပ်ရေးအဖွဲ့များ၊ ဥပဒေအရာရှိများ၊ လူမှုဝန်ထမ်း ဦးစီးဌာနမှ တာဝန်ရှိသူများ၊ အမျိုးသမီးရေးရာအဖွဲ့များ၊မိခင်နှင်‌့ ကလေး စောင့်ရှောက်ရေးအဖွဲ့များ၊လူမှုအဖွဲ့အစည်းများနှင့် ပူးပေါင်းပြီး ရပ်ကွက်ကျေးရွာများအထိလည်းကောင်း၊ စာသင်ကျောင်းများ၌ လည်းကောင်း ကျယ်ကျယ်ပြန့်ပြန့် ဆောင်ရွက် လျက်ရှိပါကြောင်း၊ ထို့အပြင် ဘာသာရေးဆိုင်ရာ သင်တန်းများမှာလည်း သက်ငယ်မုဒိမ်းမှုများအပါအဝင် မှုခင်းများ မဖြစ်ပွားစေရေးအတွက် ပညာပေးဟောပြောမှုများကိုလည်း ပူးပေါင်းဆောင်ရွက်လျက် ရှိပါကြောင်း၊

ဆောင်ရွက်မှုအနေဖြင့် ၂၀၁၆ ခုနှစ် နိုဝင်ဘာလ အထိ ပညာပေးဟောပြောမှုပေါင်း အကြိမ်ပေါင်း ၁၃၅၉၆ ကြိမ်၊ ပညာပေးလက်ကမ်းစာစောင်ဖြန့်ဝေ မှု ၅၉၉၄ ကြိမ်၊ စာစောင်ရေ ၅ သိန်းကျော်၊ ဆိုင်းဘုတ်၊ ပိုစတာ စိုက်ထူမှု ၆၆၄ ခု၊ မော်တော်ယာဉ်ဖြင့် ပြည်သူလူထုအတွင်း သွားရောက်ပညာပေးဟောပြောမှု ၂၁၄၆ ကြိမ် ဆောင်ရွက်ခဲ့ပါကြောင်း၊ ဆက်လက်၍လည်း အလေးထား ဆောင်ရွက်လျက်ရှိပါကြောင်း၊ သက်ငယ် မုဒိမ်းနှင့် ပတ်သက်ပြီး ပြည်သူ တစ်ရပ်လုံးသို့ အသိပညာပေးဟောပြောမှုနှင့် ကြိုတင်ကာကွယ်ရေး အတွက် အဓိကလုပ်ငန်းစဉ် တစ်ရပ်အဖြစ် အလေးထား ဆောင်ရွက်လျက်ရှိပါကြောင်း၊ ထိုသို့ ပြည်သူလူထုအတွင်း ပညာပေးဟောပြောမှု များ ပြုလုပ်ရာတွင် ပြည်ထဲရေးဝန်ကြီးဌာနနှင့် မြန်မာနိုင်ငံ ရဲတပ်ဖွဲ့သာမကဘဲ ဆက်စပ်ဝန်ကြီးဌာနများနှင့်လည်း ပေါင်းစပ်ညှိနှိုင်း ပူးပေါင်းဆောင်ရွက်ခြင်း၊ လူမှုရေးအသင်းအဖွဲ့များ၊ ဘာသာရေး အသင်းအဖွဲ့များနှင့်လည်း ပူးပေါင်းဆောင်ရွက်ခြင်းများ အလေးအနက်ထား ဆောင်ရွက်လျက်ရှိပါကြောင်း၊ သက်ငယ်မုဒိမ်းမှုများအပါအဝင် မုဒိမ်းမှု လျော့နည်းကျဆင်းရေးအတွက် ကြိုတင်ကာကွယ်ရေးအမှုများအနေဖြင့် ညစ်ညမ်းရုပ်ရှင်ပြသခြင်း ၊ ရောင်းချခြင်းများကို ဥပဒေနှင့်အညီ ဝင်ရောက်ရှာဖွေဖမ်းဆီးခြင်း၊ လိုင်စင်မဲ့ အရက်ချက်လုပ် ရောင်းချသူများ၊ မူယစ်ဆေးဝါးရောင်းချသုံးစွဲ သူများအရေးယူခြင်း၊ မိန်းကလေးငယ်များ ကာအိန္ဒြေပျက်အောင် ထိခိုက်နှောက်ယှက်သူများကို ဥပဒေအရအရေးယူခြင်း၊ ခွင့်ပြုချက်မရှိသော လိင်ပိုင်းဆိုင်ရာဆေးဝါးများ ရောင်းချခြင်းကို ဖော်ထုတ် ဖမ်းဆီးအရေးယူခြင်းများကိုလည်း အလေးအနက်ထား ဆောင်ရွက်ခဲ့ပါကြောင်း၊

ထိုသို့ ဆောင်ရွက်ခဲ့မှုကြောင့် ၂၀၁၆ ခုနှစ် နိုင်ဝင်ဘာလကုန်အထိ ကြိုတင်ကာကွယ်ရေးအတွက် ဖမ်းဆီးမှု၌ ပြည့်တန်ဆာမှု ၉၉၈ မှု၊ ယစ်မျိုးမှု ၈၁၂၁ မှု၊ မူးယစ်ဆေးဝါးမှု ၈၁၄၄ မှု၊ ဆင်ဆာမဲ့ဗွီဒီယိုဖမ်းဆီးမှု ၆၉၈ မှုတို့ကိုလည်း ဖမ်းဆီးအရေးယူခဲ့ပြီး ပိုမိုတိုးမြှင့်ဆောင်ရွက်နိုင်ရေးလည်း အလေးထားဆောင်ရွက်လျက်ရှိပါကြောင်း၊

သို့ပါ၍ ပြည်ထဲရေးဝန်ကြီးဌာနအနေဖြင့် သက်ငယ်မုဒိမ်းမှုဖြစ်စဉ်သည် မည်သို့မျှ လက်ခံနိုင်ဖွယ် မရှိသော လူမဆန်သည့် လုပ်ရပ်ဖြစ်သောကြောင့် ဖြစ်စဉ်များ လျော့နည်းပပျောက်ပြီး အနာဂတ် မျိုးဆက်ကလေးသူငယ်များကို ထိရောက်စွာ အကာအကွယ်ပေးနိုင်ရေးအတွက် ပြည်သူလူထုတစ်ရပ်လုံး ပူးပေါင်းပါဝင်လာစေရန် မြို့ပေါ်နှင့် ကျေးလက်ဒေသများ လူထုလူတန်းစား အလွှာအသီးသီး၌ ဥပဒေအသိပညာနှင်‌့ မှုခင်းအသိပညာများပေးခြင်း လုပ်ငန်းများကို ကျယ်ကျယ်ပြန့်ပြန့် ဆောင်ရွက် နိုင်ရေး အလေးထားဆောင်ရွက်လျက်ရှိပါကြောင်း၊ ပြစ်မှုဖြစ်ပွားမှုကို တွန်းအားပေးစေသည့် ကြိုတင် ကာကွယ်မှုများကိုလည်း ထိထိရောက်ရောက် ဖမ်းဆီးအရေးယူ ဆောင်ရွက် လျက်ရှိပါကြောင်း၊ ဖြစ်ပွားရသည့် အကြောင်းအရင်းများအပေါ်၌ သုံးသပ်ပြီး ထိရောက်သည့် အစီအမံများ ရေးဆွဲ အကောင်အထည်ဖော် ဆောင်ရွက်လျက်ရှိပါကြောင်း၊ ထို့အပြင် ဖြစ်ပွားလာသည့် ပြစ်မှုများအပေါ် ခိုင်မာစွာတရားစွဲတင်ပြီး ဥပဒေနှင့်အညီ ထိရောက်သည့် ပြစ်ဒဏ်ချမှတ်ရေးကိုလည်း အလေးအနက်ထား ဆောင်ရွက်လျက်ရှိပါကြောင်း၊ ထို့အပြင် ကလေးသူငယ်များဆိုင်ရာဥပဒေကို ပြင်ဆင်ရေးဆွဲခြင်းနှင့် အမျိုးသမီးများအပေါ် အကြမ်းဖက်မှု တားဆီးကာကွယ်ရေးဥပဒေကိုလည်း သက်ဆိုင်ရာဝန်ကြီးဌာနများမှ အသစ်ရေးဆွဲလျက်ရှိပါကြောင်း၊ ပြစ်မှုကျူးလွန်ခံရသူကလေးသူငယ်များ၏ ကျန်းမာရေး၊ စိတ်ပိုင်းနှင့် ရုပ်ပိုင်းဆိုင်ရာ စောင့်ရှောက်ပေးနိုင်ရေးအတွက် သက်ဆိုင်ရာဌာနများ၊ လူမှုအဖွဲ့အစည်းများနှင့် နီးကပ်စွာ ပူးပေါင်းဆောင်ရွက်လျက်ရှိပါကြောင်း ရှင်းလင်းဖြေကြားပါသည်။

ဒေါ်ခင်စန်းလှိုင်(ပုလဲ) က ဆက်စပ်မေးခွန်း မေးမြန်းပါသည်။

အမျိုးသမီးများအပေါ် အကြမ်းဖက်မှုပပျောက်ရေးဥပဒေကို မည်သည့်အချိန်တွင် ပြဋ္ဌာန်းနိုင်မည်နှင့် ၎င်းဥပဒေ ရေးဆွဲသည့်အချိန်တွင် မည်သူများပါဝင်ရေးဆွဲ ဆောင်ရွက်မည်ကို သိလိုကြောင်း  မေးမြန်းပါသည်။

 ပြည်ထဲရေးဝန်ကြီးဌာန၊ ဒုတိယဝန်ကြီး ဗိုလ်ချုပ်အောင်စိုး

ကလေးသူငယ်အခွင့်အရေးဆိုင်ရာ ဥပဒေရေးဆွဲခြင်းကို ဆောင်ရွက်လျက်ရှိကြောင်း၊ အမျိုးသမီးများအပေါ် အကြမ်းဖက်မှု တားဆီးကာကွယ်ရေးဥပဒေပြစ်မှု၊ ပြစ်ဒဏ်များကိုလည်း မူကြမ်းအဖြစ် ရေးဆွဲထားရှိပြီးဖြစ်ပါကြောင်း၊ ဥပဒေတစ်ခု အတည်ပြုနိုင်ရန်အတွက် သက်ဆိုင်ရာ ဝန်ကြီးဌာနမှနေပြီး တည်ဆဲလုပ်ထုံးလုပ်နည်းများနှင့်အညီ အဆင့်ဆင့် ဆောင်ရွက်ရသည့်အတွက် မိမိတို့အနေဖြင့် အချိန်ကာလကို အတိအကျ ဖြေဆိုနိုင်ခြင်းမရှိပါကြောင်း၊ သို့သော် အမြန်ဆုံး ပြဋ္ဌာန်းနိုင်ရေးကို အလေးအနက်ထား ဆောင်ရွက်လျက်ရှိပါကြောင်းနှင့် ပြည်ထဲရေးဝန်ကြီးဌာနအနေဖြင့် ၎င်းဥပဒေပြဋ္ဌာန်းနိုင်ရေးအတွက်ကို အလေးအနက်ထား၍ ပူးပေါင်းဆောင်ရွက်သွားမည်ဖြစ်ပါကြောင်း ရှင်းလင်းဖြေကြားပါသည်။