Law Database | Mail | English Version

ပြည်ထောင်စုလွှတ်တော်နာယက ပြည်သူ့လွှတ်တော် ဥက္ကဋ္ဌ သူရဦးရွှေမန်း တောင်သူလယ်သမားနေ့ အခမ်းအနားသို့ ပေးပို့

ပြည်ထောင်စုသမ္မတမြန်မာနိုင်ငံတော်

ပြည်ထောင်စုလွှတ်တော်

နေပြည်တော်

 

တောင်သူလယ်သမားနေ့အခမ်းအနားသို့ပေးပို့သည့် သဝဏ်လွှာ

ရိုးသား အားထားရသော တောင်သူလယ်သမားများ ခင်ဗျား
၁။    ၂၀၁၅ ခုနှစ်၊ မတ်လ ၂ ရက်နေ့တွင် ကျရောက်သော တောင်သူလယ်သမားနေ့ အထိမ်းအမှတ် အခမ်းအနားသို့ ဝမ်းမြောက်စွာဖြင့် ဂုဏ်ပြုနှုတ်ခွန်းဆက်သအပ်ပါသည်။          
၂။    မြန်မာနိုင်ငံသည် စိုက်ပျိုးရေးကိုအခြေခံသောနိုင်ငံဖြစ်ပြီး (၇၀)ရာခိုင်နှုန်းသော နိုင်ငံ၏ လူဦးရေမှာ လည်း တောင်သူလယ်သမားများ ဖြစ်ကြပါသည်။ မြန်မာနိုင်ငံ၏ လူမှုစီးပွားရေးဘဝသည် လယ်ယာ စိုက်ပျိုးရေးလုပ်ငန်းပေါ်တွင် အဓိကအခြေခံလျက် ရှိပါသည်။
၃။    ယနေ့အချိန်အခါတွင် ပါတီစုံဒီမိုကရေစီနှင့် ဈေးကွက်စီးပွားရေးစနစ်ကိုကျင့်သုံးကာ ငြိမ်းချမ်း သာယာပြီး ခေတ်မီဖွံ့ဖြိုးတိုးတက်သောနိုင်ငံအဖြစ် ရည်မှန်းချက်ထားရှိ ဆောင်ရွက် နေချိန်လည်း ဖြစ်ပါသည်။ တောင်သူလယ်သမားထု၏ဘဝနှင့် လယ်ယာကဏ္ဍဖွံ့ဖြိုးရေး၊ တောင်သူလယ်သမားများ၏ အခက်အခဲနှင့် လိုအပ်ချက်များကို ကူညွီဖေရှင်းပေးရေး ကိစ္စရပ်များတွင် ပြည်ထောင်စုလွှတ်တော်နှင့် ပြည်ထောင်စုအစိုးရတို့က စေတနာမှန်၊ လုပ်နည်းလုပ်ဟန်မှန်များဖြင့် ပူးပေါင်းပါဝင် ဆောင်ရွက်ကြရန် လိုအပ်ကြောင်းကို ကောင်းစွာနားလည် သဘောပေါက်ကြရပါမည်။
၎။    ခေတ်အဆက်ဆက်က တောင်သူလယ်သမားကြီးများကို " ကျေးဇူးရှင် တောင်သူ လယ်သမားများ "၊  " တောင်သူလယ်သမားဦးကြီးများ " စသည်ဖြင့်‌ စာဖြင့်‌လည်းကောင်း၊ စကားအရာဖြင့်လည်းကောင်း ချီးကျူးဂုဏ်ပြုကာ စိတ်ကောင်းစေတနာဖြင့် တောင်သူ လယ်သမားများ၏ လူနေမှုဘဝကို မြှင့်‌တင်ရေး ဆောင်ရွက်ပေးခဲ့ကြပါသည်။ သို့သော် ယနေ့အချိန်အခါနှင့်‌ လက်တွေ့ဘဝအထိ တောင်သူလယ်သမားများ အနေဖြင့်‌ ဆင်းရဲဒုက္ခများနှင့် ကြုံတွေ့ခံစားနေကြရဆဲ ဖြစ်ပါသည်။
၅။    တောင်သူလယ်သမားများ ဆင်းရဲခြင်းမှလွတ်ကင်းစေရန် ရည်ရွယ်၍ ပြည်ထောင်စုလွှတ်တော်တွင် " တောင်သူလယ်သမား အခွင့်‌အရေးကာကွယ်ရေးနှင့်‌ အကျိုးစီးပွားမြှင့်‌တင်ရေးဥပဒေ " ကို တင်သွင်း  ပြဋ္ဌာန်းခဲ့ပါသည်။ ဥပဒေပြဋ္ဌာန်းပြီး ဖြစ်သော်လည်း စည်းမျဉ်းဥပဒေ၊ စည်းကမ်းဥပဒေ၊ အမိန့်ကြော်ငြာ စာများ ထွက်ရှိလာသည် အထိ ဆက်လက်ဆောင်ရွက်နိုင်မှသာ တောင်သူလယ်သမားများ အကျိုး သက်ရောက် ခံစားနိုင်မှာဖြစ်သည့်အတွက် လိုလားချက် အောင်မြင်စေရေး သက်ဆိုင်ရာဌာနများနှင့်‌ ညှိနှိုင်းဆောင်ရွက်လျှက်ရှိကြောင်း တောင်သူလယ်သမားရေးရာ လူထုတွေ့ဆုံပွဲများတွင် တင်ပြ ရှင်းလင်းခဲ့ပါသည်။
၆။    အဆိုပါဥပဒေတွင် တောင်သူလယ်သမားများအတွက် ချေးငွေပမာဏ တိုးမြှင့်‌ ပေးရန်၊ ချေးငွေပြန်ဆပ်ရန် အချိန်ကာလတိုးမြှင့်‌သတ်မှတ်ပေးရန်၊ သဘာဝဘေးအန္တရာယ်ကြောင့်‌ လယ်ယာ မြေများ၊ စိုက်ပျိုးရေးသီးနှံများ ပျက်စီးဆုံးရှုံးလျှင် ထောက်ပံ့ကြေးပေးရန်၊ တောင်သူ လယ်သမားများအား နည်းပညာအကူအညီပေးရန်၊ ထွက်ရှိလာသောသီးနှံများ သင့်‌တင့်မျှတသော ဈေးနှုန်းများရရှိစေရန်၊ ချေးငွေများ ချေးယူသည့်အခါတွင် လွယ်ကူပြီး ကိုယ့်တာဝန်ကိုယ်ခံနိုင်စေရန်၊ ကိုယ့်တာဝန် ကိုယ်ယူရန်  အတွက် ဝိုင်းကြီးချုပ်စနစ်က ကင်းလွတ်စေရန် စသောအချက်များ ထည့်သွင်းရေးဆွဲထားပါသည်။ ယခုအခါ နည်းဥပဒေ များရေးဆွဲပြီး ပြင်ဆင်သင့်သည်များပြင်ဆင်ကာ ၂၀၁၅-၂၀၁၆ ဘဏ္ဍာနှစ်မှစတင်၍ တောင်သူလယ်သမားများ လက်တွေ့အကျိုးခံစားနိုင်ရေးအတွက်လည်း ကြိုးစားဆောင်ရွက်လျက် ရှိပါသည်။
၇။    တောင်သူလယ်သမားများသည် ကိုလိုနီနယ်ချဲ့ဆန့်ကျင်ရေး၊ ဖက်ဆစ်တော်လှန် ရေး၊ ပြည်တွင်းသောင်းကျန်းမှုဆန့်ကျင်ရေးတို့တွင် တက်ကြွစွာ ပါဝင်ဆောင်ရွက်ခဲ့သည်ကို သမိုင်းမှတ်တမ်း များတွင် အထင်အရှား တွေ့ရှိရမည်ဖြစ်ပါသည်။ ယနေ့အချိန်အခါတွင် တောင်သူလယ်သမားများ၏ ရင်သွေးများကလည်း နိုင်ငံတော် ကာကွယ်ရေးအင်အားစု များတွင် အများစု ပါဝင်ထမ်းဆောင်နေသည်ကို ဂုဏ်ယူဝမ်းမြောက်စွာ တွေ့ရှိရမည် ဖြစ်ပါသည်။
၈။    ဤတောင်သူလယ်သမားနေ့ အခါသမယမှစတင်၍ တောင်သူလယ်သမားကြီး များသည် နိုင်ငံတော် တည်ငြိမ်အေးချမ်းရေးနှင့် ဖွံ့ဖြိုးတိုးတက်ရေးကို တိုးတက် ဆောင်ရွက်ကာ ငြိမ်းချမ်းသာယာပြီး ခေတ်မီဖွံ့ဖြိုးတိုးတက်သော ဒီမိုကရေစီ ပြည်ထောင်စု နိုင်ငံအဖြစ် ထူထောင်ရာတွင် တက်ကြွစွာ ပါဝင်ဆောင်ရွက်ကြမည်ဟု ယုံကြည်မျှော်လင့်ပါကြောင်းနှင့် တောင်သူလယ်သမားကြီးများ၏ တာဝန် ကျေပွန်မှုကို ဂုဏ်ပြုချီးကျူးရင်း သဝဏ်လွှာ ပေးပို့အပ်ပါသည်။

 

                                                                                                                                                                                                                                                                                                                                                  သူရရွှေမန်း

                                                                                                                                                                                                                                                                                                                                                နာယက၊ ပြည်ထောင်စုလွှတ်တော်

                                                                                                                                                                                                                                                                                                                                                      ဥက္ကဋ္ဌ၊ ပြည်သူ့လွှတ်တော်